TITUS
HENGA
PAUL LEKHA THOT
Kipana thupha agomlam'a kisei
Hinkhoa napha tong dinga lungset mana kilhatdoh
Titus lekhathot sung thu
Hiche Lekhathot chomchan avetsah chu Houbung pha umdohsah ding hi a'itih a dingin chou-na ahijing e, tihi ahi–Thulhun Thah nikholai jengin jong. Hiche hin, khangthah lamkai Houbunga thuhil dihlouho kinelpi jou thei, Titus chun Houbung sunga mitoh kilung tohlou ho suhdihna a, chule lamkaipha semdoh thei ahina ding ahil'in ahi. Pathen Lhagao mapuina jenga jong, Houbung hinkho hi kiphal thengna tampi ngaicha ahi. Solchah Paul in jong thohhat tah'a natong ding in atil khouvin ahi. Aman, “Hiche thu kisei hi ginchat umtah ahi chule nangman hiti thudol ahin thu akichehje chu seiyin Pathen tahsanho chun thilpha bolna lama makaijing ding gelleu kalung ahi,” ati 3:8.
Solchah Paul in hiche alekhathot chomcha leh thahattah'a kon hin kithuhilna le anatoh achekop dan agomkhom in, tonsot thutahle nitin kisemthahna achekhom sah in ahi. Hiche lekhabu hi koitobang Kipana Thupha ngaicha tuntun, atahsa tah'a sodoh goho dinga ahi. Hiche ahin, houbung sunga lamkaiho lhinna alhangpin akimudoh theijin ahi. Pathen ngaisah ho dinga lampi kilhung, achungchon'a, Pathen phattheiboh insung, gollepai, chule kiloikhomna jong ahopthan ahi.
Lekhathot jihpa chule ajih kum
Hiche Lekhathot hi solchah Paul leh Titus Missionary kholjin'a Juda hole Chidang namdang ho koma Kipana Thupha phutdoh'a achena lhon thusim in akipan in ahi. Hiche kholjinna thuhi Luke lekhasut na'a ajaokhah loujeh in, mi atamjo lunggel in hiche Lekhathot hung kisut na hi, Luke thusimbu kisut jou, AD 63 le 65 kikah, Paul Rome songkul atan masat, ahung kilhadoh jouva akholjin laiya anasut hitei dingin agingchauve.
Koi henga chule ipi jeh'a ajih ham?
Titus henga Paul in athot ahi. Paul in hiche kihilchah na lekhathot hi Titus kithopi dinga, Chidang namdang Christian lamkai len khat ahung hidoh nading le, Crete twikol-a Houbung thahho puihoi theina dinga asut ahi.
1
Salam thu
Hiche Lekhathot hi Pathen soh chule Jesu Christa solchah, Paul'a kon ahi. Keima Pathen in alhendoh saho laha tahsan thudol seiphong ding le Pathen mite hindan ahetthem theina diu thutah chu hil dinga ei kisol ahi. Chuche thutah, jou seitheilou Pathen in vannoi bul kiphudoh masanga ana tepsa, chun tonsot hinna aneiyu chu kisonna apeh ahi. Chule tua aphat alhintaha hiche thuhi aman ahin phondoh'a, keihon mijouse laha kasei phongleu ahi. Hiche hi eihuhhing uva Pathen a kona thupeh, ama na tong dinga keima ei kinganse ahi. Keiman, kakikop pi tahsanna jal'a kachapa dihtah, Titus henga kasut ahi. Pa Pathen chule eihuhhing uva Christa Jesun chamna le lungmon nape tahen.
Crete mun'a Titus natoh
Keiman nangma Crete twikol a kadalhah chu, inatoh lhon nasuhbulhit a chule kahilna banga khopi tinchenga upa ho napansah na dinga kadalhah nahi. Upa khat chun nolnabei hinkho amanding ahi. Ainneipi dinga kitahna neimi hiding, chule achate chu atahsan chonchatvaina lamle thua nunlouna lama seiset changlou hiding ahi. Upa khat chu Pathen insunga gouching ahi, hijeh a chu nolna beiya hinkho amanding ahi. Ama chu kichamsah, lungsabai, ju'a loplou hiding, alamlouva sum ngailu mi hilouding ahi. Maljin phatbol mi, a-in'a jin alhunle kipah, chule Pathen ginga, chondihtaha hinkho mang mi hiding, thilpha ngailu, lunglimgeh, chondih, amachang kitimthei, Pathen ging mi hiding ahi. Tahsan umtah thu ana kihilna ho detchet a tuhchah mi hiteiding ahi; chutileh aman midang ho chu kihilna hoitah a atilkhou thei ding chule mi nelkal hatho jong athemmonau akomu peh thei ding ahi. 10 Ajeh chu adoudal ah mi tamtah panna bei thuseiya thanom chule milhemlha tamtah aume. Hiche hi ahideh'a cheptan vanga sochatna um ahi tia sei holah'a aum nom e. 11 Amaho chu suhthip ding ahiuve, ajeh chu athuhil dihlou uva kon chun insung tamtah apuimangun ahi. Chule hiche athilbol u chu sum ngailut jeh a bou abolu ahi. 12 Amaho lah jenga jong, mi khat, Crete a kona themgao khat, in amaho thudol hitin aseiyin, “Crete miho hi abon'uva mijou, gam sahang, chule mithase nehlop ahiuve” ati. 13 Hichehi adihtah mong ahi. Chuti ahijeh chun amaho hi tahsan kicheh mi ahi nadingun hatah in phohsal in. 14 Thutah'a kona mi puikon thei, Juda ho moh thusimle miho thupeh ah lunglut dauhen. 15 Alung theng dinga imajouse thengsoh kei ahi, ahinlah akisuboh atahsanlouho ding vanga athenga khatcha umlou ahi, ajeh chu alunggel ule selepha hetna alungsungu bohji a ahi. 16 Hitobang miho chun akamsunguva Pathen kahenai tin aphongdoh nauvin, ahinlah ahinkho mandan uvin aseilep un ahi. Amaho chu thet umtah, thungailou ahiuvin, thilpha bolna lama panna bei ahiuve.
1:4 2 Crth 8:23; Gal 2:3; 2 Tim 4:10 1:6 1 Tim 3:2-7