12
1 Tiahio i nitsene azo
an-tsan-kajalahi’o,
aolo’ ty fivotraha’ o andron-kasotriañeo,
naho ty hitotofa’ i taoñe hanoe’o ty hoe:
Tsy mahafale ahiko irezay;
2 aolo’ ty fañamaieñañe ty hazava’
i àndroy naho i volañey vaho o vasiañeo,
naho ty fibaliha’ o rahoñeo
ie fa añe i orañey;
3 amy andro hihondrahondrà’
o mpañambeñ’ anjombao,
naho hibokobokoha’ ondaty maozatseo,
naho hitroara’ o mpandisañeo
amy t’ie tsy ampe,
vaho mihamaieñe tsy hahaisaha’
ondaty mitilihitse amo lalan-kedeo;
4 ie mirindriñe o lalam-ban-dalam-beio,
naho migeongeoñe avao
o vato fandisanañeo,
naho mahatsekake ondaty
ty feom-boroñe,
vaho hene namptsiñeñe o anak’ ampela mpibekoo;
5 eka, mahahembañe ondatio
te an-kaboañe ey,
mirevendreveñe t’ie an-damoke eo;
mikò-foty o mahabiboo,
fe mikozozotse avao i valalay,
vaho milesa i vahen’ amaloy;
amy te migodañe mb’añ’akiba’e
nainai’e mb’eo ondatio,
ie midraidraitse an-dalañeo
o mpandàlao;
6 aolo’ te tampake i fole volafotiy,
naho foy i korobo volamenay,
naho señak’ am-bava’ i vovoñey
ty fitovy,
naho nipozak’ an-kadaha eo
i larom-pitarikey,
7 naho mibalike mb’an-tane
niboaha’e ao i debokey,
vaho mimpoly mb’
aman’Andrianamboatse azey
i kofòkey.
8 Habibin-kakafoahañe zay,
hoe t’i Mpañoke; kila kafoake.
9 Tovo i hihi’ey, nanare’ i Mpañokey hilala ondatio, ie nandanja naho nañotsohotso vaho nañity razan-tsaontsy maro.
10 Nitsoeke fisaontsy mahafale i Mpañokey, vaho nanokitse tsara-to am-palangesañe.
11 Hoe fitsipoke ty fisaontsi’ o mahihitseo, toe fati-by soa oreñe o razan-drehakeo, o natolo’ i Mpiarak’ añondriio.
12 Aa, le mitaoa ry anake
amo mandikoatse irezaio,
fa tsy ho modo ty fanoañe boke maro,
vaho mahamamake o nofotseo
ty halako-pihotsohotsoañe.
13 Ty figadoña’e, ie hene jinanjiñe:
Mañeveña aman’Añahare,
vaho ambeno o lili’eo;
ho a’ ze kila ondaty zay.
14 Hendesen’ Añahare mb’an-jaka
ze hene sata, ze he’e mietake,
ndra t’ie soa ndra te raty.