32
1 Aa ie amy androm-baloha’ ty volam-paha-folo-ro’ ambi’ i taom-paha-folo-roe-ambiy, le niheo amako ty tsara’ Iehovà manao ty hoe:
2 O ana’ondatio, ampionjono bekom-pandalàñe t’i Parò mpanjaka’ i Mitsraime le ano ty hoe,
Hambañe ami’ty liona tora’e
añivo’ o kilakila’ ndatio rehe,
naho manahake ty trozoñe an-driak’ ao,
ie nitsititiak’ amo saka’oo,
naho nitsoborè’o am-pandia o ranoo,
vaho linoto’o o fitsiritsioha’eo.
3 Aa hoe ty nafè’Iehovà Talè:
Ami’ty firimboñam-pifokoañe maro
le halafiko ama’o ty harato,
vaho hampionjoneñe
an-karatoko boak’ ao.
4 Le hafetsako an-tamboho eo,
naho havokovokoko an-kivoke eo,
hampivotraheko ama’o
o voron-dikerañeo,
vaho ho vontsiñeko ama’o iaby
ze kila bibi’ ty tane toy.
5 Le hapoko amo haboañeo ty nofo’o,
naho ho liporeko ami’ty haleora’o
o vavataneo.
6 Ho tondrahako amo lio’o
midoandoañeo i tane ilañoa’oy,
pak’ am-bohitse ey;
vaho ihe ty hibanara’ o sakao.
7 Aa ie nampimongoreko,
ho kolopofako i likerañey
naho hanoeko maieñe o vasia’eo;
ho saroñeko rahoñe i àndroy,
vaho tsy hañomey ty hazavà’e i volañey.
8 Hampimoromoroñeko ze hene hazavàñe
mireandreañe an-dikerañe ey ty ama’o,
vaho hapoko an-tane’o ao ty ieñe,
hoe t’Iehovà Talè.
9 Hampilonjereko ty arofo’ ondaty maro, ie hafetsako amo kilakila’ ndatio ty firotsaha’o, amo fifeheañe mboe tsy fohi’oo.
10 Vaho hampilatsàko ty rofòko maro, hampangebahebaheñe ty ama’o o mpanjaka’eo, ie ahelahelako aolo’ iareo eo ty fibarako, ie hitolom-pihondrahondra, songa hirombak’ aiñe, amy andro hikorovoha’oy.
11 Aa hoe ty nafè’ Iehovà Talè: Hiambotrak’ ama’areo ty fibaram-panjaka’ i Bavele.
12 Ty fibara’ o fanalolahio ty hampihotrako ondati’oo; songa lahitsiay amo kilakila’ ndatio;
Ho rotsahe’ iareo
ty firengevoha’ i Mitsraime,
vaho kila haitoañe i valobohò’ey.
13 Ho fonga zamaneko o hare’eo
boak’ amo rano’e maroo;
le lia’e tsy ho lotoem-pandia’ ondaty
ndra hòtrom-biby.
14 hampidreteko o saka’eo,
hampitsiritsioheko hoe menake
o toraha’eo,
hoe t’Iehovà Talè.
15 Ie hampangoakoaheko ty tane’
i Mitsraime,
ho tavaneñe añe ty havokara’ i taney,
naho lafaeko iaby o mpimoneñeo,
le ho fohi’ iereo te Zaho Iehovà.
16 Zay i bekom-pandalàñey le ho saboe’ iereo; ho saboe’ o anak’ ampela’ o kilakila’ ndatio, vaho ho bekoe’ iereo amy Mitsraime naho amo valobohò’e iabio, hoe t’Iehovà Talè.
17 Ie amy androm-paha-folo-lim’ ambi’ i volañeiy amy taom-paha-folo-roe ambiy, le niheo amako ty tsara’ Iehovà, manao ty hoe:
18 O ana’ ondatio, mibekoa amy valobohò’ i Mitsraimey le afetsaho ambane, mb’an-tsikeokeoke mb’eo, ie naho o anak’ampela’ o fifeheañe maozatseo, hitraofa’e amo migodañe an-koboñeo.
19 Ia ty andikoara’o ami’ty
hamontramontra’o?
Mizotsoa rehe, hampipololorañe
amo tsy nisavareñeo.
20 Hikorovok’ añivo’ o zinamam-pibarao iereo; natolotse amy meso-lavay; endeso mb’etoy re naho ze hene ondati’ e.
21 Hisaontsy ama’e naho amo mpañolots’ azeo ty maozatse amo fanalolahy boak’ an-Tsikeokeokeo ami’ty hoe: fa nigodañe ao iereo, mitsalalampatse amo tsy nisavareñeo, vinonom-pibara.
22 Ao ty Asore naho o mpirai-lia’e iabio; miarikoboñe aze o kibori’eo; kila zamañe, tsiningorom-pibara;
23 an-tsikeokeo’ i koboñey o kibori’ iareoo. Mandre mañohoke o kibori’eo o mpirai-lia’eo. Fonga mifitak’ ao o lahin-defo’eo. Fa zinamañ’an-kotakotak’ ao, ie nañembañ’ ondaty an-tane o veloñeo.
24 Ao t’i Elame rekets’ o fonga lahin-defo’eo miarikoboñe i kibori’ey. Songa vinono, nampikorovohem-pibara, nigodañe ambane tane ao o tsy nisavareñeo. Nampirevendreveñe’ iereo ondaty an-tanen-kaveloñeo, f’ie mitrao-kasalarañe amo nigodañe an-koboñeo henaneo.
25 Nandranjiam-pandreañe t’i Elame añivo’ o navetrakeo rekets’ i valobohò’ey. Fonga mañohok’ aze eo o kibori’eo, songa tsy nisavareñe, linihim-pibara ty amy fangebahebaha’ iareo ondaty an-tanen-kaveloñey. Aa le vavè’ iareo ty hameñarañe mindre amo mizotso an-koboñeo, ie napok’ an-teñateña’ o nikoromakeo.
26 Ao t’i Meseke Tobale vaho o valobohò’eo; sindre arikatohe’ o kibori’eo, songa tsy nisavareñe, zinamam-pibara ie nampivorombelo’ ondaty an-tanen-kaveloñe ao.
27 Toe tsy hitrao-pandreañ’ amo fanalolahy nitsingoritritse amo tsy nisavareñeoo iereo, o nigodañe an-Tsikeokeok’ ao rekets’ o fialia’ eoo naho miondam-pibara ambane’ o añambone’eo, ie amo taola’eo o hakeo’eo ami’ty nampitsololoha’ iareo ondaty an-tane o veloñeo.
28 Hete! ho folaheñe an-teñateña’ o tsy nisavareñeo rehe vaho hipololotse amo zinamam-pibarao.
29 Ao t’i Edome, naho o mpanjaka’eo, vaho o roandria’eo; songa mandre amo binaibaim-pibarao rekets’ o haozara’eo; hitrao-pitsalalampatse amo tsy nisavareñeo, o fa nigodañe an-koboñeo.
30 Ao ka o roandria’ tavaratseo, ie iaby, naho ze hene nte-Tsidone, ze fa nigodañe mañambane añe mitraok’ amo zinamañeo naho ami’ty fangebaheba’ iareo, salatse iereo amo haozara’eo; mandre ami’ty tsy fisavara’ iereo ao rekets’ o zinamam-pibarao, mivave o fisalara’eo mindre amo migodañe mb’an-koboñeo.
31 Hahaisake iareo t’i Parò ie hampitsiñeñe amy valobohò’ey; eka, i Parò naho o fonga lia-rai’eo songa binaibaim-pibara, hoe t’Iehovà Talè.
32 Amy te nitsitsifeko an-tanen-kaveloñe ao ty fangetraketraha’e, le handre añivo’ o tsy nisavareñeo amo zinevom-pibarao t’i Parò naho i valobohò’ey, hoe t’Iehovà Talè.