15
Ty Sabo’ i Mosè naho i Miriamae
1 Le nisabo ty takasy toy am’ Iehovà t’i Mosè naho o ana’ Israeleo, nipoña-peo ami’ty hoe:
Ho saboeko t’Iehovà,
onjono an-tiotiotse ey,
Nafetsa’e an-driak’ ao
ty soavala reke-mpiningi’e.
2 Haozarako naho saboko t’Iehovà,
Ie fandrombahañe ahiko henaneo.
Andrianañahareko re, le ho rengeko,
Andrianañaharen-draeko,
vaho honjoñeko.
3 Fanalolahy añ’ aly t’Iehovà,
Iehovà ty Tahina’e.
4 Navokovoko’e an-driak’ ao
o sarete’ i Paròo naho i valobohò’ey.
Nampiopoe’e an-dRia-Binda ao
o roandria jinobo’eo.
5 Manafots’iareo i lalekey,
nilempotse an-dalek’ ao hoe vato.
6 Toe engeñe an-kaozarañe o fità’o havanao, ry Iehovà.
Fa dinorodemom-pitàn-kavana’o
i rafelahiy, ry Iehovà.
7 Ami’ty hajabahinam-bolonahe’o
ty anjevoña’o ambane o mivoala ama’oo.
Ampihitrife’o mb’eo ty haviñera’o
mahatomonto iareo hoe tain’ ava.
8 Ami’ty fikofòm-piantsona’o ty nivotria’ i ranoy.
Nitroatse hoe rindriñe i sorotombahañey;
Nizitse an-tro’ i riakey o lalekeo.
9 Hoe ty asa’ i rafelahiy:
Ho horidañeko, ho trako,
Ho zaraeko o dinohitseo;
ie hañeneke ty haveloko.
Hapontsoako ty fibarako,
handrotsaha’ ty tañako.
10 Fe nitiofe’o an-kofò’o
Le nandipotse iareo i riakey.
Nilempotse hoe firake
An-drano nitabohazake ao.
11 Ia amo ndrahareo ty mañirinkiriñe Azo ry Iehovà? Ia ty hambañe ama’o?
Tsomerentsereñe an-kamasiñañe,
mampañeveñe an-drenge,
ry mpitolon-kalatsàñeo!
12 Nahiti’o ty fità’o havana
vaho nabea’ i taney iereo.
13 Am-pikokoa-migahiñe
ty niaoloa’o ondaty nijebañe’oo.
An-kafatrara’o ty nitehafa’o
mb’añ’akiban-kamasiña’o mb’eo.
14 Nahajanjiñe o kilakila ondatio
vaho nititititike;
Fineveneverañe ty nametreke o nte-Pilistio
15 Nirevendreveñe o mpifehe’ i Edomeo
nihondrahondra o roandria’ i Moabeo,
fonga nitranake o nte-Kanàneo;
16 nivotraha’ ty havorombeloñe
naho ty hetraketrake,
ami’ty haozaram-pità’o
nizitse hoe vato iereo—
Ampara’ te nitsake ondati’oo ry Iehovà, ampara’ te nitsake ondaty vinili’oo.
17 Hampimoahe’o ao iereo vaho haore’o am-bohi’ i lova’oy—
i toem-pimoneña’o hinalanka’oy,
ry Iehovà,
i fipalirañe naorem-pità’oy ry Talè.
18 Mifehe nainai’e donia t’Iehovà.
19 Fa nisorogodañ’ an-driak’ ao o soavala i Paròo rekets’ o sarete’eo naho o mpiningi’eo, le nampoli’ Iehovà am’ iereo o ranon-driakeo, vaho nitsake añivo’ i riakey an-tane maike o ana’ Israeleo.
20 Nandrambe kantsàñe amy zao t’i Miriamae mpitoky, rahavave’ i Aharone, le nañorik’ aze an-kantsàñe naho tsinjake o rakemba iabio
21 vaho nitakasie’ i Miriamae:
Misaboa am’ Iehovà
fa nandreketse am-pandreketam-bolonahetse.
Navokovoko’e an-driak’ ao ty soavala reke-piningi’e.
O Rano i Marà naho i Elima
22 Aa le nendese’ i Mosè nienga i Ria-Binday t’Israele naho nionjomb’ an-dRatraratra’ i Sore. Nañavelo telo andro am-patrambey ao iereo fe tsy nahatendreke rano.
23 Ie pok’e Marà ao, le tsy nihay kamaeñe i rano’ i Marày fa nafaitse. (Izay ty nanoañe ty hoe Marà i aoy.)
24 Aa le niñeoñeo amy Mosè ondatio ami’ty hoe: Ino ty hinome’ay?
25 Le nitoreo am’Iehovà re naho nitoroa’ Iehovà ty hatae, ze nahifi’e an-drano ao nahamamy i ranoy.
Teo ty nanoa’ Iehovà fañè naho zaka vaho teo ty nitsoha’e iareo.
26 Hoe re: Naho imanea’o haoñe ty fiarañanaña’ Iehovà Andrianañahare’o naho manao ty hahiti’e am-pivazohoa’e naho mijanjiñe o fandilia’eo vaho miambeñe o fañè’e iabio, le tsy hapoko ama’o o areteñe nafetsako amo nte-Mitsraimeoo, fa Izaho Iehovà Mpampijangañe azo.
27 Le nitotsake Elìme ao iereo, toetse an-dohan-drano manganahana folo ro’ amby naho satrañe fitom-polo; vaho nañialo marine’ o ranoo eo.