20
Ty Tsara Folo
Its. 5.1-22
1 Le nanao o hene tsara zao t’i Andrianañahare:
2 Izaho Iehovà Andrianañahare’o nampieng’ azo an-tane Mitsraime boak’ an-trañom-pandrohizañe ao.
3 Ko ho aman-drahare hatovoñ’ ahy irehe.
4 Ko mandranjy raham-pahasive, ndra saren’ inoñ’ inoñe andikerañe ambone eñe, ndra an-tane ambane atoy, ndra an-drano ambane tane ao.
5 Ko ibokobokoa’o ndra itoroña’o; fa Andrianañahare mpamarahy iraho Iehovà Andrianañahare’o, mpandilo anake ty amo hakeon-drae’eo pak’ an-tarira’e fahefatse naho fahatelo’ o tsy mañaoñe Ahikoo,
6 vaho mampiboake fikokoa-migahiñe ami’ ty tariratse fah’ arivo’ o mpikoko ahiko naho mañàmbeñe o lilikoo.
7 Ko vavè’o tsy vente’e ty tahina’ Iehovà Andrianañahare’o,
amy te tsy hihevea’ Iehovà
ze mivave i tahina’ey
ami’ty tsy fanjofaha’e.
8 Tiahio ty andro Sabotse
hañavaheñe aze.
9 Eneñ’ andro ty hitoloña’o
hanao ze hene tolon-draha’o.
10 Fe Fitofàñe am’ Iehovà Andrianañahare’o ty andro fahafito; ko mitoloñ’ ama’e irehe;
ihe, ndra ty ana-dahi’o
ndra ty anak’ampela’o
ndra ty ondevo’o lahy naho ampela,
ndra o hare’oo ndra o renetane mpimoneñe an-dalambei’oo.
11 Amy te eneñ’ andro ty namboare’ Iehovà o likerañeo naho ty tane toy
naho i riakey naho ze hene am’ iereo ao
vaho nitroatse ami’ty andro faha-fito;
le nitahie’ Iehovà ty andro Sabotse
vaho nimasiñe’e.
12 Miasia an-drae’o naho an-drene’o soa t’ie ho lava ohatse
an-tane hatolo’ Iehovà Andrianañahare’o azo.
13 Ko mañe-doza.
14 Ko mañarapilo.
15 Ko mampikametse.
16 Ko mitalily vilañe ondaty.
17 Ko mihàñe ty anjomba’ ondaty; ko mikiroke ty vali’ondaty,
ndra ty mpitoro’e lahilahy ndra ampela, ndra ty añombe’e ndra ty birike’e
ndra inoñ’inoñe amo fanaña’ ondatio.
18 Niisa’ ondatio o fipazakeo naho o helatseo naho ty hamatsiaña’ i antsivay naho i vohitse nañatoeñey, toe nahaisake ondatio le nititititike naho nijohañe ey avao,
19 vaho nanao ty hoe amy Mosè, Misaontsia ama’ay, le ho janjiñe’ay, fe ko ampitsarae’o ama’ay t’i Andrianañahare tsy mone hikoromake.
20 Aa hoe t’i Mosè am’ondatio, Ko hembañe; ie hitsok’ anahareo ty nivotrahan’ Añahare, hañeveña’ areo, tsy handilara’ areo.
21 Fe nijohañe ey avao ondatio vaho nitotoke mb’amy filodolodoan-drahoñe nitoeran’ Anaharey ao t’i Mosè.
22 Hoe t’Iehovà amy Mosè: Ty hoe ty hatao’o amo ana’ Israeleo, Toe nioni’ areo ty nivolañako boak’ amo likerañeo:
23 Ko mamboatse saren-drahare volafoty hatovoñ’ ahy ndra mitsene saresaren-drahare volamena ho anahareo.
Ty Lili’ o Kitrelio
24 Kitrely tane ty hamboara’o ahy, le ama’e ty hisoroña’o o enga horoa’o naho o sorom-panintsiña’oo, o añondri’oo naho o añombe’oo; amy ze tane ampitiahiako ty añarako, le homb’ ama’o mb’eo iraho hitahy azo.
25 Aa naho amboara’o kitrelim-bato le ko anoe’o am-bato finandrake; amy te mahativa aze te añoharam-pàndrake.
26 Vaho ko mitroatse am-panongañe tsy mone hiboake ty heña’o.