31
1 Feh-ohatse amo mizotso mb’e
Mitsraime mb’eo hipay olotse,
miato aman-tsoavala,
naho mirampy an-tsarete kanao maro,
vaho amo mpiningitse ama’eo
katao maozatse;
f’ie tsy mitolike amy Masi’ Israele,
tsy paia’ iareo t’Iehovà!
2 Fa mahihitse ka re hindesa’e hankàñe,
vaho tsy hampoli’e o tsara’eo;
f’ie hiongake hiatreatre
ty anjomba’ o lo-tserekeo
naho ty fañimba’ o mikitro-karatiañeo.
3 Ondaty ‘nio o nte-Mitsraimeo
fa tsy Andrianañahare,
naho nòfotse o soavala’eo fa tsy angatse;
aa le hatora-kitsi’ Iehovà ty fità’e,
le hitsikapy ty mpañimba
naho hikorovoke i imbaeñey,
vaho songa hitrao-pihotrake.
4 Fa hoe t’Iehovà amako:
Hambañe ami’ty liona
naho ty liona tora’e,
ie mitromoroñe ambone’ i nitsàtsa’ey,
ndra te maro ty mpiarak’añondry
nikoiheñe ty ama’e,
tsy mañembañe aze ty feo’ iareo,
tsy mañembetse aze ty fikorà’ iareo;
zay ty hizotsoa’ Iehovà’ i Màroy
hialia’e am-bohi-Tsione,
naho an-kaboa’e eo;
5 Manahake ty fihelahela’ o voroñeo,
ty hañarova’ Iehovà’ i Màroy t’Ierosalaime;
katao mañaro, mamotsotse,
kanao ihelaña’e ambone, mandrombake.
6 Mitoliha amy loho niolà’ areoy,
ry ana’ Israeleo.
7 Ie amy andro zay,
songa hañary ze sare-sokim-bolafoti’e
naho o saren-draha volamena’eo,
o tsinene am-pitañe aman-kakeoo.
8 Toe hampikorovohe’ ty fibara
tsy a’ ondaty ty Asore;
ty fibara tsy a’ ondaty ty hamotsek’ aze;
aa le tsy hibotatsaha’e i fibaray,
vaho ho mpitorom-pamorekèke
o ajalahi’eo.
9 Hihelañe añe am-pirevendreveñañe i hafatrara’ey,
naho hitsolofìñe amy saiñey
o mpifehe’eo, hoe t’Iehovà,
an-Tsione ao ty afo’e vaho
e Ierosalaime ao ty toña’e.