42
1 Intoy ty mpitoroko tohañako,
ty jinoboko toe mahafale troke,
le nakofòko ama’e ty troko
ie ty hinday ty hatò amo kilakila’ ndatio.
2 Tsy hikoikoike re tsy hampipoña-peo,
le tsy hampijanjiñe’e an-dalañey
ty fiarañanaña’e;
3 tsy ho potora’e ty vinda pineke
vaho tsy hakipe’e ty lamese miliriliry;
hampiboaha’e ty hatò ami’ty figahiña’e.
4 Tsy ho toiran-dre, tsy ho demoke,
ampara’ te najado’e an-tane atoy ty hatò;
naho hitamà i Hake o olon-taneo.
5 Hoe t’Iehovà Andrianañahare
Mpamboatse o likerañeo
naho nandafike iareo,
I namelatse ty tane toy naho
ze miboak’ ama’ey,
ie mampikofòke ondaty ama’eo
vaho manolotse arofo
amo midraidraitse aoo.
6 Zaho Iehovà, ty nitok’azo
an-kavañonañe,
nitintineko ty taña’o
naho nampitsoloheko,
vaho natoloko ho fañina
am’ondatio,
ho hazavàñe amo kilakila’ ndatio,
7 hanokake ty fihaino fey
hañakatse o mpirohy am-balabeio
naho o mitozòke alafem-porozò añ’ieñeo.
8 Zaho Iehovà, zay ty añarako;
tsy hatoloko ami’ty ila’e o volonahekoo,
ndra amo hazomangao ty engeko.
9 Heheke fa nihelañe o raha haehaeo,
o raha vaoo o tseizeko henaneo;
Ie mbe tsy mipoteake
ty ho taroñeko ama’ areo.
10 Misaboa sabo vao am’ Iehovà,
ibangò ry añ’olo-tane añeo;
ie mizotso mb’an-driakey,
naho ze he’e ama’e ao, o tokonoseo,
vaho o mpimoneñe ama’eo.
11 Hampionjonem-peo ty fatram-bey
naho o rova ama’eo,
o tanàñe añialoa’ i Kedareo,
naho hañonjo Hake t’i Selà,
vaho hipaza-kafaleañe boak’ ankaboa’ o vohitseo.
12 Ho rengè’ iereo t’Iehovà,
vaho hitsey ty enge’e amo tokonoseo.
13 Hionjom-b’eo hoe fanalolahy t’Iehovà,
ho troboe’e am-pamarahiañe
hoe lahin-defoñe;
hikaikaike naho hisehaseha,
hisenge amo rafelahi’eo ty haozara’e.
14 Loho ela ty nitsiñako,
nihendre vaho nifoneñe;
f’ie henane zao, hikoiake
hoe ampela mitsongo;
hisañasaña naho hisehaseha.
15 Ho koaheko o vohitseo
naho o haboañeo,
vaho ho forejejeko o ahe’eo;
hanoeko tokonose o oñe’eo,
naho ho riteko o antara’eo.
16 Hendeseko mb’an-dalañe
tsy nifohi’ iareo o goao;
hiaoloako añ’oloñoloñe tsy nahazatse iareo;
hanoeko hazavàñe aolo’ iereo eo ty ieñe,
hampiraeko ze tomoantoañe.
hanoeko iaby vaho tsy hapoko
ampara’ t’ie fonitse.
17 Hampiambohoeñe an-kasalarañe,
o miato an-tsamposampo sinokitseo,
ze manao amo sare nitranaheñeo,
‘ndrahare’ay nahareo’.
18 Mijanjiña ry kareñeñeo,
mahaisaha ry fey, hahavazohoa’ areo.
19 Ia ty goa naho tsy i mpitorokoy?
ndra kareñe manahake
i irako nafantokoy?
Ia ty fey mandikoatse i nampanintsiñekoy,
naho goa te amy mpitoro’ Iehovày?
20 Mahaisake raha maro nahareo
fe tsy mahaoniñe,
misokake o raven-tsofio
fe tsy mahatsendreñe.
21 Niehake t’Iehovà,
ty amy havañona’ey,
honjoñe’e naho ho renge’e i Tsara’ey.
22 Fe ondaty nikamereñe
naho nivoloseñe retoa,
songa tsinepake an-koboñe ao,
naetake am-balabey ao;
natao ho fitsatsàñe tsy amam-pandrombake, fikopahañe,
le tsy eo ty manao: Ampolio.
23 Ia ama’ areo ty hanolo-ravembia
amy zay?
Ia ty hitsendreñe naho hijanjiñe
amy ze añe zay?
24 Ia ty nanolotse Iakobe ho kopaheñe,
naho Israele ho amo mpamaokeo?
tsy Iehovà hao? I nanoantika hakeoy,
tsy nete nañavelo amo lala’eo iereo,
tsy norihe’ iareo o Tsara’eo.
25 Aa le nadoa’e ama’e
ty haforoforon-kaviñera’e,
naho ty hafatraran-kotakotake;
naho namiaña’e afo nañarikatok’aze
fe tsy hinao’e, vaho nampiforehete’e,
tsy rinambe’ ty arofo’e.