5
1 Ho bekoeko i kokoakoy,
toe beko’ i rañeko,
ty amy tanem-balobo’ey,
Aman-tanem-bahy ankaboan-
kobokara añe i kokoakoy.
2 Nitrabahe’e, nahoro’e boak’ao o vato’eo,
naketsa’e ao ty vahe soa-joboñe,
rinanji’e tilik’abo an-teñateña ao,
vaho nitsenea’e fipiritan-divay:
le nitamà’e valoboke,
f’ie namokatse valoboke vìlañe.
3 Ie henane zao ry mpimoneñe e
Ierosalaime ao, ry ondati’ Iehodào,
ihalaliako : mizakà añivoko naho
i tondam-balobokoy.
4 Ino ka ty hanoako
amy tetem-bahekoy,
ze mboe tsy nanoako?
Ie nitamàko hamokatse valoboke
soa, ro nañomey valoboke lo?
5 Aa ie zao, hampahafohineko anahareo
ty hanoako amy tanem-bahekoy;
hombotako i fahe’ey, le horoañe;
le harotsako ambane i kijoli’ey,
ho lialiàñe.
6 Hampangoakoaheko,
tsy ho birabiraeñe, tsy havaeñe ka;
fa hitirian-kisatse naho fatike:
ho lilieko ka o rahoñeo
ty tsy hampahavy orañe.
7 Ty anjomba’Israele,
ty tondam-bahe’ Iehovà’ i Màroy,
ondati’ Iehodào, i hatae ifalea’ey,
nipay to re fe nizò fanjamanañe;
nitsoeke havañonañe fe inao ty kaikaike.
8 Hankàñe amo mampifanoitoy
kibohotse an-kivoho,
naho tonda toien-tetekeo,
ampara’ t’ie tsy malalake,
vaho bangy rehe añivo’ i taney.
9 Amo sofikoo ao! hoe t’Iehovà’ i Màroy,
Toe maro ty anjomba ho kòake,
ty jabajaba naho ty fanjaka
tsy ho ama’ ondaty.
10 Eka, hamokatse sajoa raike
ty tanem-bahe folo lasarý,
le hahafoe tsikotoke raike
ty tabiry zahetse raike.
11 Hekoheko amo mitroatse handro
hitolon-kamamoañeo;
o mihenekeneke halem-bey
ampara’ t’ie solebaren-divaio.
12 Amo takataka’ iareo
ty marovany naho ty mandolina,
ty fikantsakantsàñe vaho ty divay:
fe tsy oni’iareo ty sata’ Iehovà,
mbore tsy ereñere’ iareo
o fitoloñam-pità’eo.
13 Aa le misese mb’an-drohy ondatikoo,
amy te po-hilala,
salikoeñe o androanavi’ iareoo,
vaho miforejeje ami’ty hataliñiere’e
ty valobohò’ iareo.
14 Aa le nienatse ty fañiria’ i tsikeokeokey,
nigorobahe’e ty vava’e tsy taka-zeheñe;
hijoloboñe ao ty enge’ iareo,
ty fivoamboa’e, ty fikoraha’e,
rekets’ i mirebekey.
15 Haketrake ty fokonon-tsoa,
harèke ty fanalolahy,
vaho hampiambaneañe ty fihaino’
o mievotsevotseo:
16 Ty hatò ro añonjonañe
Iehovà’ i Màroy,
ty havañonañe ro añamasiñañe
i Andrianañahare Masiñe.
17 Hierañerañe am-piandrazañe ao
o anak’añondrio,
naho hihinañe amo tete-
lovodovo’ o vondrakeo ty mpirererere.
18 Feh’ohatse amo mpikozozo-kakeo
an-taly hòakeo,
naho o tahiñeo hoe an-talin-tsarete:
19 Ie manao ty hoe: Ee t’ie halisa,
hanaentaeñe i fitoloña’ey,
hahaoniña’ay aze,
le ee te hitotoke eo ty fanoroa’
i Masi’ Israeley
homb’etoy hahafohina’ay Aze!
20 Hekoheko ami’ty manao te raty ty soa, naho soa ty raty,
o misolo ty ieñe ho hazavàñe
naho ty hazavàñe ho ieñeo;
o manao ty mafaitse ho mamy
vaho ty mamy ho mafaitseo.
21 Hankàñe amo mahihitse
am-pahaoniña’eo,
naho o mahilala am-pahaisaha’eo!
22 Feh’ ohatse o fanalolahy am-pinon-divaio, naho ondaty maozatse
am-pampilaroañe toakeo;
23 ie mañatò ty lo-tsereke
hahazoam-bokàñe
vaho mañafake ty havañona’
o vantañeo!
24 Aa le manahake ty fipiloran-afo
ty ahetse,
naho ty fampibotseha’ ty lel’afo
ty kafokafo’e,
ty hañamomohañe ty vaha’ iareo,
vaho hiboele hoe deboke o voñe’ iareoo;
fa napo’ iareo ty Hà’ Iehovà’ i Màroy,
naho nimavoe’ iareo
ty nafè’ i Masi’ Israeley.
25 Toly ndra miforoforo am’ ondati’eo
ty haviñera’ Iehovà,
naho natora-kitsi’e am’ iereo ty fità’e,
naho trinabotrabo’e;
nihondrahondra iaby o tambohoo,
natao litsake an-dalambey eo
ty lolo’ iareo.
Amy hoe zay iaby
mbe tsy nivike ty haviñera’e,
vaho mbe mihity avao ty fità’e.
26 Hañonjo kobaiñe amo kilakila ondaty tsietoitaneo Re,
naho hifioke ama’e boak’
añ’olo-ty tane toy añe, le hehe,
hiherereake mb’etoy masika.
27 Tsy ho am’ iereo ty ho mokotse
ndra hitsikapy;
tsy eo ty hiroro ndra hirotse;
tsy habalake ty sadiam-bania’ iareo,
vaho tsy hianto ty fihilin-kana’ iareo;
28 Masioñe o ana-pale’eo,
fonga mivohotse o fale’eo,
hoe vato-pilake o tombon-tsoavala’eo,
vaho talio o larò’eo;
29 Hirohake hoe liona vave iereo,
hiroharoha hoe anan-diona,
Eka, mitrè iereo mitsepake i horoñeñey,
naho hendese’e añe,
ie tsy amam-pandrombake.
30 Hitròñe amy andro zay iereo, manahake ty fitròña’ i riakey,
ie mahaisake i taney,
heheke ty hamoromoroñañe,
naho faloviloviañe,
ndra i hazavañey
ro ampigodoñen-drahoñe.