27
1 Tinovo’ Iobe amy lañona’ey ty hoe:
2 Kanao veloñe t’i Andrianañahare,
nitavañe ty zoko;
naho i El-Sadai
nampafaitse ty troko,
3 ie mbe amako ty fiaiko,
naho an-doak’ oroko ao
ty kofòn’ Añahare,
4 le lia’e tsy hañoratse o soñikoo,
vaho tsy hiñeoñeo famañahiañe ty lelako.
5 Sondia’e te hiantofako ho to ty anahareo; ampara’ te hivetrake,
tsy hapitsoko amako ty fahitiko.
6 Ho faharako ty havañonako
vaho tsy havotsoko;
leo raik’ amo androkoo tsy inje’ ty troko.
7 Ee te hanahake o tsereheñeo
o malaiñe ahikoo,
naho ho hambañe ami’ty tsivokatse
ty mitroatse amako.
8 Ino ty fitamà’ ty tsy aman-Kake,
t’ie naito,
ie tsoahen’ Añahare ty fiai’e?
9 Ho janjiñen’Añahare hao ty fikoia’e
ie mivovo ama’e ty hankàñe?
10 Hifalea’e hao t’i El-Sadai?
Ho kanjie’e nainai’e
hao t’i Andrianañahare?
11 Hampandrendreheko anahareo
ty fitàn’ Añahare;
tsy eo ty hapoko ty amy El-Sadai.
12 Toe fonga nahaisake nahareo,
akore arè t’ie mitsingevongevo?
13 Intoy ty toly tsaharen’ Añahare
amo tsereheñeo,
ty lova azotso’ i El-Sadai
amo mampangebahebakeo;
14 Ndra firefire o ana’eo
le ho amy fibaray avao;
le lia’e tsy ho enen-kaneñe o tarira’eo.
15 Halente’ ty kiria o sehanga’eo,
le tsy hahafandala o ramavoi’iareoo.
16 Ndra te ampitoabore’e
hoe deboke ty volafoty,
naho avotri’e hoe lietse o saroñeo—
17 ndra te ihentseña’e,
ho sikina’ o vantañeo,
vaho hifanjarà’ o malio-tahiñeo
i volafotiy.
18 Tsene’e hoe fararotse ty akiba’e,
hoe kibohotse faorem-pigaritse.
19 Reketse vara t’ie màndre,
fe tsy hamokatse ka;
ie mañente, tsy eo.
20 Imbotraha’ ty firevendreveñañe
hoe sorotombake;
itavaña’ ty tangololahy haleñe.
21 Ahela’ i tiok’ atiñanañey; le añe re;
naviovio’ i tiobeiy amy toe’ey.
22 Eka mihiririñe mb’ama’e le tsy apo’e;
himanea’e ty hipoliotse am’pità’e.
23 Ho tehafam-pitàñe,
ho kosasaheñe hiakatse i toe’ey.