38
1 Nanoiñe Iobe boak’ an-talio amy zao t’Iehovà
ami’ty hoe:
2 Ia ze o mampaieñe vere
añ’enta’e tsy aman-kilalao?
3 Midiaña vania hoe ondaty;
le hañontaneako,
vaho ho toiñe’o.
4 Taia v’iheo te najadoko
o faha’ ty tane toio?
Taroño kanao mahilala.
5 Ia ty nisafiry o zehe’eo naho fohi’o?
he ia ty namavatse taly ama’e?
6 Najadoñe ami’ty inoñ’ o faha’eo?
ia ka ty nampitsatoke ty vato-lahi’e?
7 Ie hene nitrao-pisaboañe o vasia-maraiñeo vaho fonga nipoñak’ an-drebeke o anan’ Añahareo.
8 Ke ia ty nampigabeñe i riakey
an-dalam-bey,
ie vaho niboloañe boak’an-koviñe ao.
9 Ie nitseneako saroñe an-drahoñe,
naho sokotry an-kamoromoroñañe.
10 Ie nafepèko o efe’eo vaho nampijadoñe ty sikada’e naho o lala’eo,
11 Ami’ty hoe: Efets’ etoa ty homba’o,
le tsy ilikoarañe;
etoañe ty hanjirañe
o onja’o mitoabotseo.
12 Fa linili’o hao i maraiñey,
sikal’am-pifotoran’ andro’o añe,
he nampahafohine’o
i fanjirik’androy hao i toe’ey,
13 hamihina’e o indran-taneo,
hañifihañe ama’e o lo-tserekeo?
14 Ie miova hoe lietse ambanem-boli-pitomboke,
miboake hoe volon-tsaroñe ty vinta’e.
15 Fe tanañe amo tsereheñeo ty hazavà’iareo,
vaho ampipozaheñe ty sira mizonjoñe.
16 Fa niziliha’o hao ty figoangoaña’
i riakey?
hera nijelanjelañe an-goledo’ i lalekey?
17 Fa nibentareñ’ ama’o hao
o lalam-bein-kavilasio?
fa niisa’o hao
o lalan-talinjom-pihomahañeo?
18 Apota’o hao ty fienene’ ty tane toy?
abejaño naho hene fohi’o?
19 Aia ty lalam-bam-pimoneña’ i hazavàñey?
Naho i ieñey, aia ty akiba’e?
20 Hanesea’o mb’am-pifaritsoha’e añe: hitinoña’o o lalam-ban-kiboho’e mb’eo?
21 Fohi’o kanao zay ty nisamahañ’ azo,
vaho tsivatse o andro’oo!
22 Fa nimoaha’o hao
ty fañajañe i fanalay?
Nioni’o hao ty famandroñañe
o havandrao?
23 I nahajako ho an-tsan-kasotriañey,
ho amy andron-kotakotake
naho fialiañey?
24 Lalañe aia ty ifampirià’ i hazavàñey,
ty ifampitsiriaria’ i tiok’atiñanañey
an-tane atoy?
25 Ia ty nihaly talaha ho a
i fisorotombahañey,
ndra ty lalan-kombà’
i àmpin-kotrokey?
26 Hahavia’ ty orañe an-tane tsy ama’ondaty, ndra an-diolio
pok’ olombeloñe,
27 hahaeneñe i fatram-bey mangoakoakey hitovoaña’ i ahetsey hitiry?
28 Manan-drae hao i orañey?
Ke ia ty nampiareñe o tsopan-jonoo?
29 Boak’ an-kovi’ ia o fanalao?
Le i pilitem-panalan-dikerañey,
ia ty nisamak’ aze?
30 Ie mihagàñe hoe vato ty rano,
vaho mijihetse ty tarehe’ i lalekey?
31 Lefe’ o feheñe hao
o silisili’ i Kimào,
ndra ampibalaheñe ty vahots’ i Kesileo?
32 Hampiakare’o an-tsà’e hao
t’i Mazarote?
Ho tehafe’o hao t’i Aiìse
rekets’ o ana’eo?
33 Fohi’o hao o fañèn-dikerañeo?
Ho lefe’o ajadoñe hao
ty fifehea’ iareo ty tane toy?
34 Mahafipoña-peo mb’an-drahoñe
mb’eo v’iheo,
hahaliporañ’ azo an-drano bey?
35 Mahafañirake hotroke v’iheo,
hihiririña’e mb’eo,
hanoa’iareo ty hoe: Intoan-jahay?
36 Ia ty nampipoke hihitse an-troke ao?
Ia ka ty nanolotse hilala añ’ arofo?
37 Ia ty mahafañiake o rahoñeo
ami’ty hihi’e?
ke mahafañiliñe o zonjon-dikerañeo,
38 ie ampibokobokoeñe ty deboke,
vaho mifampipiteke o vonga’eo?
39 Ho tsatsae’o haneñe hao ty liona?
Ho eneñe’o hao ty hatea-hane’
o liona tora’eo,
40 Ie mikoloto an-dakato ao,
ie misimotse ami’ty mangongòñe ao?
41 Ia ty mamahan-tsindroke o koàkeo,
ie mikoaik’ aman’Añahare o ana’eo,
naho mikariokariok’ avao
tsy aman-kaneñe?