5
1 Mikoiha arè! ia ty ao t’ie hanoiñe azo!
Ia amo masiñeo ty hitoliha’o?
2 Mañe-doza ami’ty minè ty hasosora’e,
zevoñe’ i famarahia’ey ty derendereñe.
3 Fa nitreako te nivahatse ty dagola,
fe nozoñeko amy zao ty akiba’e.
4 Lavi-pipalirañe o tiri’eo,
demoheñe an-dalambey ey,
vaho tsy eo ty mpandrombake.
5 Kamae’ o salikoeñeo ty nitatahe’e,
tsindrohe’ iereo boak’am-patik’ao;
midañadaña amo vara’eo ty kòboñe
6 Tsy miboak’ an-debok’ ao ty hasotriañe,
naho tsy mitiry an-tane ao ty hankàñe;
7 Fe ampoheke t’indaty te samake
manahake ty fionjona’ ty fipitsin’afo.
8 Izaho ho nipay an’Andrianañahare
vaho i Andrianamboatse
ty nitaroñako o entakoo—
9 amy Mpanao raha mampañeveñe
tsy taka-tsikaraheñey,
raha tsitantane tsivatse.
10 I mampahavy orañe an-tane atoy,
vaho mañirake rano an-teteke ey;
11 Hampitongoà’e ambone o mirèkeo,
le honjonem-b’am-pipalirañe o mandalao.
12 Avorembore’e ty kilili’ o kalitakeo, soa tsy hahapi-draha o taña’eo.
13 Tsepahe’e ami’ty fikitrofa’e
o kanteo,
vaho misaok’ añe ty fikinià’o mengokeo.
14 Ie manjo ieñe te antoandro,
mijimenjimè hoe an-kaleñe
te tsipinde-mena.
15 Fe rombahe’e am-pibara am-bava’iareo, ty rarake am-pità’ o maozatseo.
16 Aa le aman-ko tamae’e o rarakeo,
fe mampikite-bava ty haratiañe.
17 Haha t’indaty endahan’ Añahare;
le ko tsambolitio’o ty fandilova’ i El-Sadai.
18 Ie mandafa, le bandie’e;
mitrabake, le melañe’ o fità’eo.
19 Ho haha’e irehe
am-peh’ohatse eneñe;
Eka, im-pito tsy hipaok’ azo ty hankàñe.
20 Ho jebañe’e ami’ty havilasy irehe
an-tsan-kerè,
naho ami’ty haozara’ i fibaray
an-tsàn’aly.
21 Harovan-drehe ami’ty fifiaham-pameleke, f’ie tsy ho hembañe
te itsatohan-kekoheko.
22 Hiankahafa’o ty hankàñe naho ty kerè,
le tsy hatahora’o ze bibi’ ty tane toy.
23 Ie hirai-lia amo vato an-tetekeo
vaho hiharo-rehak’ ama’o
o biby an-kivokeo.
24 Ho rendre’o te mierañerañe ty akiba’o,
ho tilihe’o ty golobo’o
le tsy ho motso ze ama’e ao.
25 Ho fohi’o te maro o ana’oo,
ho mira ami’ty hatsifotofoto’ o ahetse
an-tane atoio o tarira’oo.
26 Homb’an-kibori’o ao irehe
ami’ty haañon-kaantera’o,
manahake ty fitroara’ o toboron’
ampembao an-tsa’e.
27 Heheke! fa nitsikarahe’ay, le ie Izay.
Inao! irendreho, ho ami’ty hasoa’o.