9
1 Aa hoe ty natoi’ Iobe :
2 Toe apotako ty hatò izay: fe aia te ho to añatrefan’ Añahare ondatio?
3 Naho teo ty nipay hifandietse ama’e,
tsy ho toiñe’e indraik’ ami’ty arivo.
4 Mahihitse añ’Arofo,
fatratse an-kaozarañe,
ia ty nanjehatse ama’e tsy aman-joy?
5 Aveve’e o vohitseo, tsy apota’ iareo
te avali-hoho’e an-kaviñerañe.
6 Akofikofi’e tsy an-toe’e ty tane toy, le mitroetroe o faha’eo;
7 Lilie’e tsy hanjirike i àndroy,
agobo’e o vasiañeo;
8 Ie avao ty namelatse o likerañeo,
naho mandialia o onjan-driakeo;
9 Ie ty nañoreñe i Arktorose
naho i Telo-milahatsey,
i Bode naho i Koto-kede atimoy.
10 Ie i manao halatsàñe tsy onim-biribiriy,
raha tsitantane tsy taka-voliliy.
11 Ie miary amako, tsy ho treako:
Naho ihelaña’e tsy ho rendreko.
12 Ie mandrirotse, ia ty hisebañe.
Hanoa’ ia ty hoe, Ino o anoe’oo?
13 Tsy hampolin’ Añahare ty haviñera’e;
mitsolofìñe ama’e ka
o mpañimba’ i Rahabeo.
14 Akore arè ty hahatoiñako aze,
ty hijoboñe o volañe hitaroñakoo;
15 Ndra te to i ahikoy, tsy ho nahatoiñe; ho nihalalieko tretre
i Mpizakakoy.
16 Naho nikanjy raho vaho nanoiñe ahiko re, tsy ho niantofako te nihaoñe’e ty feoko.
17 Vinonotrobo’e an-tio-bey raho,
indrae’e tsy amam-poto’e o ferekoo.
18 Tsy hapo’e hikofòke raho,
te mone atsafe’e afero;
19 Ty amo haozarañeo,
Inao! Ie ty Maozatse!
Le ty hatò :
Ia ty hifamotoañe ama’e?
20 Naho naniom-batan-draho,
ho nanisý ahy ty vavako;
ndra t’ie tsy an-kila,
ho tsarae’e te mengoke.
21 Malio tahin-draho, tsy haoñe’ ty troko,
ho farieko ty fiaiko;
22 Toe raike iaby avao: aa hoe raho:
Songa rotsahe’e ty mahity
naho ty lo-tsereke.
23 Naho manjamañe aniany ty angorosy,
le kizahe’e ty famoeañ’ay o vañoñeo.
24 Ie atolots’an-taña’ o lo-tserekeo
ty tane,
le takone’e ty lahara’ o mpizakao;
aa naho tsy ie, le ia ka?
25 Masìka te amo mpanao tsikiaviavio o androkoo,
mihelañe tsy ahaisahan-kasoa.
26 Mitsiritsioke hoe lakam-bezo,
hoe tsimalaho mañao-tsindroke.
27 Aa naho nanao ty hoe raho,
handikofako i halalikoy,
hapoko ty tareheko lonjetse toy,
vaho hisomilake;
28 Ihembañako o fanaintaiñakoo,
apotako t’ie tsy ho haha’o;
29 Aa kanao atao lo-tsereke raho;
ino ty ifanehafako tsy vente’e?
30 Naho miandro an-dranom-panala,
naho kotriñeko an-tsokay o tañakoo;
31 Mbe hagodo’o an-davak’ ao,
vaho halaim-bintañe ahy o sikikoo.
32 Toe tsy ondaty manahak’ ahy re
hahatoiñako,
t’ie hifañatrek’ an-jaka.
33 Tsy amam-pañalañalañe ty añivo’ay ao,
ze mete ho nanazok’ anay roroe.
34 Ehe te hasita’e amako i kobai’ey,
vaho tsy hampangebahebak’ ahy
i fañeveñañe ama’ey;
35 Le ho nivolan-draho,
vaho tsy ho nianifañe ama’e;
fa toe tsy zay ty an-troko ao.