16
1 Nimb’amako ty tsara’ Iehovà
nanao ty hoe:
2 Ko mañenga valy,
ko misamak’ ana-dahy ndra
anak’ampela an-toetse atoy.
3 Fa hoe t’Iehovà ty amo
ana-dahy naho anak’ampela terake
ami’ty toetse toio,
naho i rene’e nisamake iareo,
naho i rae’e nampiareñe iareo
an-tane atoiy:
4 T’ie hivetrak’ am-pikoromahañe
mahaferenay,
tsy eo ty handala, tsy haleveñe,
fa hapoke hoe forompotse
ambone-tane eo,
ho zamane’ ty fibara naho ty saliko;
ho hane’ o voron-dikerañeo
naho o biby an-tane atoio ty lolo’ iareo.
5 Le hoe t’Iehovà:
Ko iziliha’o ty anjombam-pandalàñe,
ko mb’eo hirovetse ndra hañohò;
fa nafahako am’ ondaty retoa ty
fanintsiñako, hoe t’Iehovà,
ty fiferenaiñako naho ty fitretrezako.
6 Songa hivetrak’ an-tane atoy
ty kede naho ty bey;
tsy haleveñe,
tsy hirovetañe,
tsy handilian-tsandriñe,
tsy hañitsifañe;
7 Tsy hamolahañe mofo ty mpandala,
hampanintsiñe aze ty amy raza’ey;
tsy hanjotsoañe fitovim-pañohòañe hinoma’e ty aman-drae’e ndra rene’e.
8 Ko imoaha’o ka ze anjomba
manao sabadidake, iambesara’o,
hikama ndra hinoñe.
9 Fa hoe t’Iehovà’ i Màroy,
i Andrianañahare’ Israeley:
Toe hajiko an-toetse atoy,
añatrefam-pihaino’o eo
naho amo andro’oo,
ty feon-kafaleañe, naho
ty feom-pirebehañe, naho
ty fiarañanaña’ i mpañengay vaho
ty fiarañanaña’ i engañey.
10 Aa ie saontsie’o am’ondaty retoa
o tsara iaby zao,
vaho manao ty hoe ama’o iereo,
Akore te zahay ro nitsarà’ Iehovà
o hankàñe jabajaba zao?
Ino o hakeo’aio?
Ino ty tahiñe nanoe’ay amy
Iehovà Andrianañahare’ay?
11 Le ty hoe ty havale’o ami’iereo:
Amy te nifarien-droae’areo raho
hoe t’Iehovà, naho nanjontike
mb’aman ‘ndrahare ila’e,
nitoroñe iareo naho nitalahoañe,
fe nieng’ahy, vaho tsy
mañambeñe i Hà-koy.
12 Lombolombo ty nanoen-droae’ areo
ty haratiañe nanoe’ areo,
songa mañorike ty fanjeharan-tro’e raty,
fa tsy mañaoñe ahy.
13 Aa le hahifike boak’an-tane atoy
mb’an-tane tsy nifohi’ areo
ndra o rae’ areoo;
añe nahareo ro hitoron-drahare
ila’e handro an-kaleñe;
fe tsy ho soaeko.
14 Rendreho arè, te ho tondroke ty andro, hoe t’Iehovà, te tsy ho volañeñe ka ty hoe: Kanao veloñe t’Iehovà nañakatse o ana’ Israeleo an-tane Mitsraime añe,
15 Te mone: Kanao veloñe t’Iehovà
nampipoly o ana’ Israeleo
boak’ an-tane avaratse añe,
naho amo hene tane nandroahako iareoo;
Ie hampoliko an-tane’ natoloko an-droae’eo.
16 Ie amy zay, hampisangitrifeko
mpamintañe maro,
hoe t’Iehovà,
le ho vintañe’iereo;
heneke zay le hampañitrifeko
mpañoro maro,
le ho horoñe’ iereo amy ze hene vohitse
naho amy ze fonga tamboho,
vaho boak’amo tseran-damilamio.
17 Fa amo sata’ iareo iabio o masokoo,
tsy mietak’ an-tareheko iereo;
mbore tsy mikafitse amo masokoo
ty fandilara’ iareo.
18 Hondroheko indroe hey ty hakeo
naho tahi’ iareo;
amy t’ie nañota-faly an-taneko;
nilipore’ iareo amy lovakoy o faten-
draha’e mampangorìñeo
vaho o raha tivao.
19 Ry Iehovà, haozarako naho
kijoliko fatratse,
toe fipalirako an-tsan-kasotriañe,
ama’o ty hañaveloa’ o fifeheañe
boak’ añ’olo-ty tane toio
hanao ty hoe:
Nandova vande avao o rae’aio,
raha kafoake, tsy amam-bente’e.
20 Hamboara’ ondaty ‘ndrahare hao
ty vata’e, ie tsy andrianañahare?
21 Mahaoniña arè te hampahafohineko
ami’ty indraike toy te haboako am’ iereo
ty tañako, naho ty haozarako;
vaho ho fohi’ iareo te Iehovà ty añarako.