23
1 Hankàñe amo mpiarake manjamañe naho mampibaibay o añondrim-piandrazakoo! hoe t’Iehovà.
2 Aa le hoe t’Iehovà Andrianañahare’ Israele amo mpiarake mamahañe ondatikoo: Fa nampivarakaihe’ areo i lia-raikoy, vaho rinoa’ areo añe; tsy sinari’ areo; aa le hisariako ty amo haloloam-pitoloña’ areo, hoe t’Iehovà.
3 Le zaho ty hanontoñe ty sehanga’ i lia-raikoy boak’ amo fifeheañe nandroahako iareoo, le hampoliko mb’ an-golobo’e mb’eo; vaho hiraorao vaho hanaranake.
4 Le hampitroareko mpiarake hisary iareo naho hamahañe iareo; ie tsy ho hembañe ka, tsy hiroreke, vaho tsy ama’e ty hirereke, hoe t’Iehovà.
5 Ingo ho tondroke ty andro, hoe t’Iehovà,
t’ie hampitirieko amy Davide
ty tora-mionjo-bantañe,
ie ty ho mpanjaka hifeleke naho hiraorao,
vaho hizaka amy taney an-katò
naho an-kavañonañe.
6 Ho rombaheñe amo andro’eo t’Iehodà,
vaho hiaiñañoleñañe t’Israele;
le zao ty tahina’e hikanjiañe aze:
Iehovà Havantaña’ay.
7 Aa le ingo ho tondroke ty andro hoe t’Iehovà, te tsy hanoe’ iereo ty hoe: Kanao veloñe t’Iehovà nañakatse o ana’ Israeleo boak’ an-tane’ Mitsraime añe;
8 fe: Kanao veloñe t’Iehovà nañavotse naho niaolo ty tirin’ anjomba’ Israele boak’an-tane avaratse añe, hirik’amo hene fifeheañe nandroahako iareo, le himoneña’ iareo ty tane’iareo.
9 Aa ty amo mpitokio:
Rofotse ty troko añ’ovako ao,
miripidripike iaby o taolakoo,
hoe te ondaty jike,
manahake t’indaty nimamoe’ ty divay,
ty am’ Iehovà naho o tsara’e masiñeo.
10 Amy te manitsike i taney
o mpañakarapiloo;
itañia’ i taney i fatsey,
mikantañe o fiandrazañe am-patrambeio; mengoke am-pañaveloañe iareo
naho vàlañe an-kaozarañe;
11 Tsy aman-Kàke
ndra mpitoky ndra mpisoroñe;
eka, ndra añ’akibako ao ty nahatreavako
ty haloloa’ iareo, hoe t’Iehovà.
12 Aa le halama o lala’ iareoo,
haronje ami’ty haleñe iereo
vaho hivarinjonjok’ ao;
fa hafetsako am’ iereo ty hankàñe,
eka, ty taom-pitilihañe iareo,
hoe t’Iehovà.
13 Mbore nahatrea hativañe amo mpisoro’
i Someroneo raho:
i Baale ty fitokia’ iareo,
mampanan-kakeo Israele ondatikoo.
14 Toe vata’e haloloañe ty nitreako amo mpitoky e Ierosalaimeo:
mpifandrañaotse,
mpañavelo an-dañitse,
ampahozare’ iareo ty fità’ o lo-tserekeo,
soa tsy eo ty hibalintoa
amy hatsivokara’ey;
songa hanahake Sedome amako iereo,
manahak’ i Amorà o mpimone’eo.
15 Aa le hoe t’Iehovà’ i Màroy
ty amo mpitokio:
Ingo hifahanako vahontsoy,
ampinomeko manahin-afero;
fa boak’ amo mpitoki’ Ierosalaimeo ty namelaran-katemboañe nahatsitsike ty tane.
16 Hoe t’Iehovà’ i Màroy:
Ko haoñe’ areo ty lañona’ o mpitoky
mitoky ama’ areoo,
o mitarik’ anahareo mb’an-koakeo;
ty aroñaron-tro’e avao ty saontsie’ iereo f’ie tsy boak’am-palie’ Iehovà.
17 Mitolom-panao ty hoe amo malaiñe
Ahio iereo: inao ty tsara’ Iehovà:
Hierañerañe nahareo;
naho amo manjotik’ am-panjeharan-tro’eo ty hoe:
Tsy ho tendrek’ ama’ areo
ty hekoheko.
18 Fa ia ty nijohañe am-pivori’
Iehovà ao hahaoniñe,
hijanjiñe o tsara’eo?
Ia ty nañaoñe i nafè’ey,
naho nahafitsendreñ’aze?
19 Ingo fa nionjoñe am-piforoforoa’e
ty tio-bei’ Iehovà,
eka, hiviombio an-doha’ o lo-tserekeo ty tangololahy.
20 Tsy himpoly ty haviñera’ Iehovà
ampara’ t’ie mahaheneke,
ampara’ te fonire’e i satrie’ey,
ho fohi’ areo do’e zay
amo andro honkahonka’eo.
21 Tsy nafantoko o mpitoky retoa,
f’ie mihitrihitry;
tsy nivolañeko, f’ie mitoky avao.
22 Aa naho nijohañ’ ampivoriko ao,
le ho nampijanjiñe’ iareo ondatikoo
o entakoo, himpolia’iareo
boak’amy lalan-kelokelo’iareoy
vaho hiambohoa’ iareo o sata’ rati’ iareoo,
23 Andrianañahare atoañe avao hao raho, hoe t’Iehovà,
fa tsy Andrianañahare añe ka?
24 Eo hao ty mahafietake
am-pipalira’e ao tsy ho treako?
hoe t’Iehovà.
Tsy manitsike i likerañey naho
ty tane toy hao raho? hoe t’Iehovà.
25 Fa tsinanoko ty saontsi’ o mpitoky
mpandañitse ami’ty añarakoo, ami’ty hoe:
Nañinofy raho, nañinofy raho.
26 Ampara’ te mb’ia te ho an-tro’
i mpitoky vilañey
ty hitokia’e vande,
ty hitoky ty famañahian-tro’e avao.
27 Fisafiria’ iareo ty hampañaliñoañe ondatikoo ty añarako amo nofi’ iareo ifampisaontsia’ iareoo,
manahake ty nandikofa’ o roae’eo
ty añarako ty amy Baale.
28 Ty mpitoky mañinofy,
apoho hitalily i nofi’ey;
le ty manañe i entakoy, soa re te
hitaroñe am-pigahiñañe.
Inoñ’ ami’ty ampemba hao ty ahetse? hoe t’Iehovà;
29 Tsy manahake ty afo hao o volakoo? hoe t’Iehovà;
naho hoe ana-bato mampikotekoteke
ty lamilamy?
30 Aa le inao! hejeko o mpitokio, hoe t’Iehovà,
ie mifampikametse o entakoo.
31 Inao hatreatreko o mpitokio,
hoe t’Iehovà
ie mañetseke ty famele’e hitoky ty hoe: Hoe ty tsara’e.
32 Inao! toe hejeko o mitoky
nofin-dremborakeo, hoe t’Iehovà,
ie mitalily vaho mampandilatse ondatikoo amo vande’eo
naho amo fikanifoha’eo;
ie tsy niraheko, tsy liniliko;
mbore tsy mahasoa ondaty retoa,
hoe t’Iehovà.
33 Aa naho manao ty hoe ama’o ondaty retoa, ndra ty mpitoky, ndra ty mpisoroñe: Ino ty nafè’ Iehovà? le isaontsio ty hoe, Fetse inoñe! Fa ho farieko nahareo, hoe t’Iehovà.
34 Le ty mpitoky ndra mpisoroñe ndra ze ondaty mete hanao ty hoe: Ty nafè’ Iehovà; toe ho liloveko rekets’ i anjomba’ey indatiy.
35 Fe songa hifanaontsy ty hoe aman-drañe’e naho aman-drahalahi’e: Ino ty navale’ Iehovà? ndra Ino ty nitsarae’ Iehovà?
36 fe tsy ho tiahi’ areo ty nafè’ Iehovà; fa sambe hisaontsy ty enta’e avao ondatio ho fetse, ie nimengohe’ areo ty tsaran’ Añahare veloñe, Iehovà’ i Màroy, Andrianañaharentikañe.
37 Ty hoe ka ty hatao’ areo ami’ty mpitoky: Ino ty natoi’ Iehovà azo? naho Ino ty nitsarae’ Iehovà?
38 Fe anoe’areo ty hoe: Ty nafè’ Iehovà; le hoe t’Iehovà: kanao taroñe’ areo ty hoe: Ty nafè’ Iehovà, ie nafantoko ama’ areo ty hoe: Tsy ho saontsie’ areo ty hoe: Ty nafè’ Iehovà;
39 Ingo toe handikofako nahareo, haitoako tsy ho añ’ atrefako eo rekets’ i rova natoloko aman-droae’ areoy;
40 vaho hapoko ama’ areo ty inje tsy ho modo naho ty hasalarañe kitro katroke tsy ho haliño.