33
1 Niheo am’Iirmeà fañindroe’e ty tsara’ Iehovà, ie mbe nirindriñe an-kiririsam-pigaritse ao, nanao ty hoe:
2 Hoe t’Iehovà Andrianamboatse,
Iehovà nañoreñe, hampijadoñe aze,
Iehovà ty tahina’e.
3 Kanjio raho, le ho toiñeko,
hitaroñe raha fanjaka
naho miheotse tsy fohi’o.
4 Aa hoe t’Iehovà
Andrianañahare’ Israele :
O anjomba’ ty rova toio, naho
o anjomba’ o mpanjaka’Iehodào,
o narotsake ho tambohom-pañarovañe
amo firampiañeo naho o fibarao,
5 ie mialy amo nte-Kasdio,
ro mone hiliporañe lolo’ondaty
zinamako ami’ ty habosehako,
naho ami’ty fifombokoo,
ty amo fonga haloloañe nañetahako tarehe ami’ty rova toio.
6 Inao ! handesako fijanganañe
le ho melañeko;
vaho haborako am’ iereo ty haliforan-kanintsiñe naho hatò.
7 Hafoteko ty fandrohiza’ Iehodà
naho ty fandrohiza’ Israele,
vaho haoreko manahake tam-baloha’e.
8 Ie ho lioveko amo halò-tserek’ iabio,
i nampanan-tahiñe iareo amakoy;
vaho hapoko iaby ty hakeo’ iareo,
i nandilara’ iareo amako rezay;
o nañotà’ iareo faly amakoo,
9 ho tahinam-pampirebehañ’ ahy
naho engeñe vaho volonahetse,
añatrefa ze fifehea’ ty tane toy,
le hañeveñe naho hinevenevetse
ze hahajanjiñe ty hasoa
hanoeko am’ iereo;
amy ze hene hasoa
naho fierañerañañe hanoako.
10 Hoe t’Iehovà: Mbe ho janjiñeñe an-toetse atoy, i atao’ areo ty hoe: Mangoakoake, tsy ama’ ondaty, tsy amam-biby naho amo rova’ Iehodào naho an-dàmo’ Ierosalaime ey; amy bangìñe tsy ama’ ondaty, tsy amam-pimoneñe, tsy aman-kàrey,
11 ty feom-pirebehañe, naho
ty feon-kafaleañe,
ty feom-pañenga naho
ty feon’engaeñe,
ty fiarañanaña’ o manao ty hoe:
Andriaño t’Iehovà’ i Màroy,
fa soa t’Iehovà, nainai’e ty fiferenaiña’e;
vaho o minday engam-pañandriañañe mb’añ’anjomba’ Iehovà mb’eoo.
Amy te hampoliko ty fandrohiza’ i taney manahake tam-baloha’ey,
hoe t’Iehovà.
12 Hoe t’Iehovà’ i Màroy,
Mbe ho eo indraik’ ami’ty toetse mangoakoake toy,
ie tsy ama’ondaty, tsy aman-kàre, naho amo hene rova’eo,
ty kivohom-piarake mampàndre o lia-rai’eo.
13 Amo rova am-bohitseo naho
amo rova am-bavataneo naho
amo rova atimoo naho
an-tane’ i Beniamine ao naho
am-paripari’ Ierosalaimeo vaho
amo rova Iehodao, ty hirangà’ o lia-raikeo ambane’ ty fitàñe mañiake iareo, hoe t’Iehovà.
14 Inao! ho tondroke ty andro, hoe t’Iehovà, te ho henefako i tsara soa nitsaraeko amy anjomba’ Israeley naho i anjomba’ Iehodàiy.
15 Ie amy andro rezay naho amy sa zay, ty hampitiriako toran-kavañonañe t’i Davide, le ie ty hitoloñe an-katò naho an-kavantañañe amy taney.
16 Ho rombaheñe amy andro rezay t’Iehodà, vaho hierañerañe t’Ierosalaime; le hoe ty hitokavañe aze,
Iehovà Havantañan-tika.
17 Fa hoe t’Iehovà: Le lia’e tsy haitoañe amy Davide t’indaty miambesatse amy fiambesa’ i anjomba’ Israeleiy;
18 vaho le lia’e tsy haitoañe amo mpisoroñe nte-Levio t’indaty hanolotse engan-koroañe, naho hañoro enga-mahakama, vaho hisoroñe nainai’e añatrefako eo.
19 Niheo am’ Iirmeà ty tsara’ Iehovà manao ty hoe:
20 Hoe t’Iehovà: Naho lefe’ areo
valiheñe ty fañinako amy àndroy,
naho ty fañinako amy haleñey,
soa te tsy ho aman-kandro,
tsy ho aman-kaleñe o famantaña’eo;
21 zay vaho mete mivalike amy fañinako amy Davide mpitorokoy,
naho tsy hanañ’anake
hamelek’ amy fiambesa’ey;
vaho amo mpisoroñe nte-Levy mpiatrak’Ahio.
22 Hambañe amy te tsy mete iaheñe
ty havasiañan-dikerañe,
vaho tsy lefe zehèñe o fasen-driakeo;
ty hampitomboako
ty tarira’ i Davide mpitorokoy,
naho o nte-Levy mpiatrak’ ahio.
23 Niheo am’ Iirmeà ty tsara’ Iehovà manao ty hoe:
24 Tsy nioni’o hao ty saontsi’ ondaty retoa manao ty hoe: O fifokoañe roe jinobo’ Iehovà rey, le fa naitoa’e? Aa le mavoe’ iereo ondatikoo, t’ie tsy ho fifeheañe añ’atrefa’ iareo ka.
25 Hoe t’Iehovà:
Naho tsy nifañina ami’ty andro
naho ty haleñe,
naho tsy tinendreko fañè i likerañey
naho ty tane toy:
26 le ho farieko ty tiri’ Iakobe
naho ty a i Davide mpitorokoy,
vaho tsy ho rambeseko amo tiri’eo
ty ho mpifeleke o tarira’ i Avrahame, Ietsake, naho Iakobeo;
fe toe hampoliko ty fandrohiza’ iareo, vaho hiferenaiñako.