Lioke
1
Ty Fitaroña’ i Lioke
1 Kanao maro ty nandrambe am-pitàñe handahatse talily amo raha atokisantikañeo
2 manahake ty nitaroña’ iareo ama’ay, ie nivalolombeloñe boak’am-baloha’e nimpitoroñe i tsaray ama’ay,
3 le satriko ka, ie hinotsohotsoko boak’ am-baloha’e i hene rezay, ty hanokitse talily soa filahatse ho azo, ry roandria Teofilo,
4 hahafohina’o ty hatò’ i tsara nañohañe azoy.
Mañemboke t’i Zakaria
5 Teo tañ’andro’ i Heroda mpanjaka’ Iehodà, ty mpisoroñe atao Zakaria, am-pirimboña’ i Abia; boak’ amo anak’ ampela’ i Aroneo ty tañanjomba’e, i Elizabeta ty tahina’e.
6 Songa vantañe añatrefan’ Añahare iereo roroe; tsy amam-pitsikoañe ty fañaveloa’iareo amo lily naho fepè’ Iehovào.
7 Tsy nanañ’ anake fa betsiterake t’i Elizabeta vaho sambe nigain-kantetse ie roroe.
8 Aa ie nitoroñe ami’ty naham-pisoroñe aze añatrefan’Añahare ami’ty fifandimbezam-pirimboña’e t’i Zakaria;
9 le amy lilim-pisoroñañey, nitsatok’ ama’e ty hañemboke, le nimoak’ an-kibohon’ Añahare ao,
10 vaho hene nilolok’ alafe’e ao i màroy amy fotoam-pañembohañey.
Ty Lañona’ ty Anjely
11 Nisodeha ama’e amy zao ty anjeli’ i Talè, nijohañe an-kavana’ i kitrelim-pañembohañey.
12 Nianifañe t’i Zakaria te nahaoniñe, nihohokòhoke, vaho nidoiña’ ty firevendreveñañe.
13 Le hoe ty asa’ i anjeliy tama’e; Ko hemban-drehe Zakaria fa jinanjiñe i halali’oy le hisama-dahy ama’o t’i Elizabeta tañanjomba’o vaho toñono ty hoe Jaona ty añara’e.
14 Ho fale naho ehake irehe vaho maro ty hirebek’ amy hisamaha’ey,
15 amy t’ie ho ra’elahy añatrefa’ Iehovà, naho tsy hinon-divay ndra toake, vaho ie mbe an-kovin-drene’e ao ro ho lifore’ i Arofo Masiñey.
16 Maro amo ana’ Israeleo ty hampitolihe’e amy Iehovà Andrianañahare’ey.
17 Ie hañavelo añatrefa’eo ami’ty arofo naho haozara’ i Elia, hampitolihe’e amo anakeo ty tron-droae naho mb’ami’ty fahihira’ o vantañeo o manjehatseo, hampihentseñe ondaty veka’e ho a Iehovà.
Moañe t’i Zaaria
18 Aa hoe t’i Zakaria tamy anjeliy; Aia ty haharendrehako t’ie to? Bey iraho naho migain-kantetse ka ty valiko.
19 Tinoi’ i anjeliy ty hoe, Izaho n’o Gabriele mpijohañe añatrefan’ Añahareo; niraheñe hivolañ’ ama’o, hitaroñe o talili-soa zao.
20 Fe inao! ho moan-drehe, tsy hahasaontsy ampara’ t’ie tafetetse, ami’te tsy natokisa’o o volakoo, ie ho heneke amy nifantañañey.
21 Nandiñe i Zakaria ondatio, nilatsa t’ie tambatse amy toetse miavakey ao.
22 Ie niavotse, le tsy nahasaontsy am’ iereo naho nioni’ iereo te niboahan-draha añ’ anjomba miavak’ ao, ie nanondrotondro am’iareo, fa le lia’e nimoañe.
23 Ie amy zao, naho niheneke o andro fitoroña’eo, le nimpoly mb’añ’ anjomba’e añe.
24 Añe i andro rezay le niareñe t’i Elizabeta, vali’e, vaho nipalitse lime volañe, fa hoe ty asa’e:
25 Zao ty nanoe’ Iehovà amako amy andro nivazoho’ey, hañafaha’e amako ty sirika’ondatio.
Fampitama’ i Gabriela
26 Ie amy fah’enembola’ey le niraheñe boak’ aman’Añahare ao t’i Gabriela anjely homb’an-drova atao Nazareta e Galilia añe,
27 mb’ami’ty somondrara nifofoe’ t’indaty atao Iosefe, anjomba’ i Davide, Marie ty añara’ i somondraray.
28 Niheo ama’e i anjeliy nanao ty hoe;
Akore ry isoheñe! mitahy azo t’Iehovà.
29 Nitsonevotse amy zao re amy tsara’ey, le nitsakore i fañontanea’ey.
30 Ko hemban-drehe, Marie, hoe i anjeliy fa nanjò fañisohañe aman’ Añahare.
31 Oniño t’ie hiareñ’ an-koviñ’ ao
le hisama-dahy,
vaho hatao’o Iesoà ty añara’e
32 Ho fanalolahy re,
le ho toñoneñe ty hoe:
Ana’ i Andindimoneñey
naho hatolo’ Iehovà Andrianañahare aze ty fiambesa’ i Davide rae’e;
33 le ho fehe’e nainae’e ty anjomba’ Iakobe
vaho tsy ho modo i fifehea’ey.
Ty Nivesara’ i Marie
34 Le hoe t’i Marie tamy anjeliy; Akore ty hahamete’ izay, izaho tsy mahavany lahy?
35 Aa le hoe ty natoi’ i anjeliy aze;
Hitotsak’ ama’o i Arofo Masiñey,
hañalok’ azo ty haozara’ i Andindimoneñey;
le ho toñoneñe ty hoe, Anan’ Añahare,
i Masiñe hasama’oy.
36 Inao te niaren-dahy ka
t’i Elizabeta longo’o ndra te bey;
fa enem-bolañe henaneo
i natao betsiterakey,
37 Toe tsy eo ty tsy lefen’ Añahare.
38 Hoe t’i Marie; Intoy ty anak’ ampata’ Iehovà; lonike te ho amako i sinaontsi’oy. Le nienga aze i anjeliy.
Nitilike i Elizabeta t’i Marie
39 Niongake amy andro rezay t’i Marie, nikapikapike mb’an-tanàñe ambohibohi’ Iehodà mb’eo;
40 le nimoak’ añ’ anjomba’ i Zakaria ao vaho nañontane i Elizabeta.
41 Ie jinanji’ i Elizabeta i fañontanea’ i Mariey, le nivoañe ty ajaja an-tro’e ao; mbore nilifore’ i Arofo Masiñey t’i Elizabeta.
42 Le ty hoe ty napaza’e; Haha amy ze atao ampela irehe vaho soatata ty anake hasama’o.
43 Ia ka iraho, te nitilihe’ ty rene’ i Talèkoy?
44 Hete! ie nimoak’ an-tsofiko ao i feom-pañontanea’oy le nisondrakak’an-kaehake ty ajaja an-troko ato.
45 En-droa, haha i niantoke te ho henefeñe ama’e o raha nitsarae’ Iehovày.
46 Aa le nanao ty ti-hoe t’i Marie:
Mañonjoñe Iehovà ty fiaiko,
47 vaho mirebek’ aman’Añahare
mpandrombak’ ahy ty troko;
48 Nivazohoe’e ty hasotria’ i anak’
am-pata’ey, Oniño te hanao ahy
haha ze hene tariratse henane zao.
49 Nanao raha fiain-tane amako i Maozatsey—masiñe ty tahina’e.
50 Ferenaiña’e pak’an-tariratse an-tariratse o mañeveñe ama’eo.
51 Nampiboaha’e haozarañe ty fità’e;
naparatsia’e o mpiebotsebotse am-pitsakorean-tro’eo.
52 Nafotsa’e amo fiambesam-bolo- nahe’eo o fanalolahio, vaho naonjo’e o mpirèkeo.
53 Nanjàñe’e raha soa o nisalikoo,
fe nampolie’e hara’e o mpañalealeo.
54 Nimbae’e t’Israele mpitoro’e, hahatiahia’e i fiferenaiñañe
55 nitsarae’e amy Abraàme naho amo
tarira’e nainai’eoy,
i nampitamà’e an-droaen-tikañey.
56 Telo volañe varàñe ty nitoboha’ i Marie ama’e ao vaho nimpoly mb’añ’anjomba’e añe.
Ty Nisamahañe i Jaona
57 Henek’ amy zao o andro nahatoly i Elizabetao, le nisama-dahy.
58 Jinanji’ ondaty mpitrao-tanàñe ama’eo naho o longo’eo t’ie niferenaiña’ Iehovà, le nitrao-kafaleañe ama’e.
59 Ie ami’ty andro faha-valo, le nasese ho savareñe i ajajay, vaho ho natao’ iereo Zakaria ty añara’e amy te izay ty tahinan-drae’e,
60 fa hoe ka ty natoin-drene’e; Aiy! hatao ty hoe Jaona re.
61 Aa hoe ty asa’ iareo tama’e; Leo raik’ aman-drolongo’o tsy nitoñoneñe amy tahinañe zay.
62 Le nañatsikatsik’ an-drae’e iereo, ami’ty hoe: Ia ty satri’o hitokavañ’ aze.
63 Nipay fanokiran-dre vaho nanokitse ty hoe: I Jaona ty añara’e. Aa le hene nidaba.
64 Nisokak’ ami’ty manao zao ty falie’e naho nibalake i famele’ey vaho nisaontsy am-pandrengeañe an’ Andrianañahare.
65 Hene nangebahebake o mpimoneñe nañohoke iareoo, vaho nirehafeñe mb’eo mb’eo ambohibohi’ Iehodà ao irezay.
66 Songa nitsakore ty hoe añ’ arofo ao ze nahaoniñe: Ty ajaja ho akore v’itoio? Le nitahy aze ty fità’ Iehovà.
Ty Fitokia’ i Zakaria
67 Lifotse i Arofo Masiñey amy zao t’i Zakaria rae’e vaho nitoky ty ti-hoe:
68 Andriañeñe t’Iehovà Andrianañahare’
Israele, fa nitilihe’e
vaho jineba’e ondati’eo.
69 Nampitroara’e
tsifam-pandrombahañe tika
añ’anjomba’ i Davide mpitoro’e ao,
70 Nitsara am-palie’ o mpitoky miavakeo
i teo nainai’e am-pifotora’ ty voatse toiy,
71 t’ie ho rombaheñe amo rafelahin-
tikañeo,
naho am-pità’ o malaiñe an-tikañeo,
72 Hiferenaiña’e o roazan-tikañeo, naho ho tiahi’e i fañina’e miavakey,
73 i fanta nifantà’e amy Abraàme
raentikañey,
74 t’ie hatolo’e amantikañe, ie fa vinotso’e amo rafelahintikañeo,
hitoroñ’ aze tsy an-kahembañañe,
75 am-piavahañe naho
an-kavantañañe añatrefa’e
amo hene andro iveloman-tikañeo.
76 Le ihe, anako, ty hatao Mpitoki’
i Andindimoneñey,
amy te Ihe ty hiaolo i Talè hañajary
ty lala homba’e,
77 hampahaoniñe ondati’eo ty fandrombahañe
ie hinahan-kakeo,
78 ami’ty fiferenaiñan’ Añaharen-tika—
ie nampitilihe’e an-tika
i fanjiriha’e boak’ añ’aboy,
79 Hanolora’e hazavàñe
o mpitoboke añ’ieñe ao
naho an-talinjon-kavilasio, hiaoloa’e
mb’an-dalan-kanintsiñe mb’eo
o fandian-tikañeo.
80 Nitombo i ajajay le nihaozatse an-troke vaho nitoets’am-babangoañe añe ampara’ ty andro niboaha’e am’Israele.