12
Ty Rakemba naho i Fañaneñey
1 Tendrek’ andindìñe eñe amy zao ty viloñe jabajaba: ty rakemba misaroñe i àndroy, naho ambanem-pandia’eo i volañey vaho añambone’e eo ty sabaka amam-basiañe folo ro’amby.
2 Nivesatse re le nikoiakoiak’ ami’ty fanaintaiñam-pitsongoa’e vaho nañèñe te hisamake.
3 Le nisodehañe andindìñe eñe ty viloñe tovo’e: Inge ty fañaneñe mena ra’elahy, aman-doha fito naho tsifa folo vaho sabakam-pifeheañe fito amy loha’e rey.
4 Piniopio’ ty ohi’e ty fahatelo’ o vasian-dikerañeo vaho nahirirì’e mb’an-tane atoy. Le nijagarodoñe aolo’ i rakemba hisamakey i fañaneñey, hampibotseke i ana’ey vata’e toly.
5 Le nisamak’ anadahy re, ty lahilahy hifehe ze hene tane an-kobay viñe; fe hinaoke mb’aman’ Añahare naho mb’amy fiambesa’ey añe i Ana’ey.
6 Nibotatsake mb’am-babangoañe añe amy zao i rakembay mb’ami’ty toetse hinalankan’ Añahare ho aze; le hatraheñe ao ampara’ te ritse ty andro arivo-tsi-roanjato-tsi-enempolo.
7 Nipoak’ amy zao ty hotakotak’ andindìñe ey: nifandrapak’ amy fañaneñey t’i Mikaele naho o anjeli’eo; namale amañ’aly ka i fañaneñey naho o anjeli’eo,
8 f’ie tsy nahagioke, mbore tsy nanjoañe toetse andindìñe ao.
9 Nahifik’ ambane i fañaneñe jabajabay—i fañaneñe haehae atao: devoly naho mpañìnjey, ie mampandridrìke ty voatse toy iaby. Rinoake mb’an-tane atoy re, le nindre siniots’ ama’e o anjeli’eo.
10 Le tsinanoko ty fiarañanañañe mafe andindìñe ao nanao ty hoe:
Fa totsake henaneo ty fandrebahañe
naho ty haozarañe
naho ty fifehean’ Añaharen-tikañe,
vaho ty lili’ i Noriza’ey.
Amy te navokovoko ambane
ty mpanisý o roahalahin-tikañeo,
ie nanisia’e añatrefan’Añaharen-tika eo handro an-kaleñey,
11 Rineba’ iareo ami’ty lio’ i Vik’añondriy
naho ami’ty tsaram-pitaroña’ iareo;
tsy nikokoa’ iareo ty fiai’iareo
ndra te niatre-kavilasy.
12 Mirebeha arè ry likerañeo naho o mpimoneñe am’ iereoo!
Feh’ohatse an-tane atoy naho amy riakey,
fa nimb’ama’ areo ao i mpañìnjey!
lifo-pifombo, amy te apota’e
te tomotse o andro’eo.
13 Ie niisa’ i fañaneñey te tafa-toke an-tane, le nisamporerahe’e i rakemba nisamake i lahilahiy.
14 Fe tinolotse elatse roe boak’ amy bantio ra’elahiy i rakembay, hitiliña’e hisitak’ an-tarehe’ i fañaneñey mb’ an-dratraratra añe mb’amy toe’e mb’eo; añe re ro hatraheñe taoñe raike naho taoñe roe vaho vaki-taoñe.
15 Le nafotroa’ i fañaneñey ty rano boak’ amy montsili’ey hoe sorotombake hañoridañe i rakembay hasio’e amy fisorotombahañey.
16 Fe nañolotse i rakembay ty tane toy naho sinoka’ i taney ty vava’e niteleñe i saka nafotroa’ i fañaneñey hirik’am-bava’ey.
17 Akore ty fidabadoà’ i fañaneñey amy rakembay, kanao nionjoñe amy zao re hialy amo ana’e sisao—o mañambeñe o lilin’ Añahareo naho mitambozòtse ty taro’ Iesoà Norizañey.
18 Le nijagarodoñe amy faseñe añ’olon-driakey re.