6
Ʋ ‑ha nahuiin 'nɩpata, ʋ 'mʋ ‑Yusu a ‑wɔnnaanyʋ 'mʋ ‑hɛ
1 Ti a ‑gbɛ 'yri, ‑Yusu a nahuin, ʋʋ klɛ 'nɩ bii 'dɔ. ‑Yusu a nahuin a ‑gbɛ, ʋ mɔ la ‑Juukʋɛ. ꞊Ʋ ‑ye, ʋʋ po Glɛkɩkʋɛwin. 'Ke ʋ kuu 'le 'blʋgbɩ ‑ye 'mʋ, 'plɩɩ 'ʋ ‑hɔn 'le 'mʋ, 'ʋ mu 'bri; ꞊ʋ ‑ye ꞊nʋ, ‑ʋʋ ‑Juukʋɛwin po, 'ke ʋ nɩ ꞊ke 'le 'bri. Nahuin ꞊nʋ, ‑ʋʋ Glɛkɩkʋɛwin po, ʋʋ 'mʋ lɛ 'nɩ 'pʋprɛ, 'ke 'o 'waa 'bienʋ ꞊nʋ ke, ‑ʋʋ ‑Juukʋɛwin po, ‑ɛ nue, ʋ nɔ 'nɩ, 'ɛ nɩ ‑nyrɔwɔ, ti ꞊nʋ ‑kɔ 'yri ʋʋ 'o didi‑tɔplɩ 'o woo, 'waa kotianyrʋ, nahuin 'nɩ kɔ ꞊le 'le 'waa dɛ ‑wɔn.
2 Nɛ‑ kɔ ‑tɩ ‑Yusu a ‑wɔnnaanyʋʋ ‑pu ꞊tu 'o 'hɔn ꞊nʋ, 'ʋ da ‑Yusu a nahuin 'bii, 'ʋ 'kukue lɛ, ʋ nɔ: «Ɛ 'de 'o lɛ nɔɔ, 'ke ‑a mʋ ‑Yusu a ‑wɔnnaanyʋ ‑ba hie 'o Nyɩsʋa a ‑tɩ a ꞊tutue gbo, ‑ba wo didi‑tɔplɩ.
3 Nɛ‑ nue, ‑dɩayuo ‑a, ba ta 'le 'a nɩ dɩɔnʋ ‑hɛyri lɛ, ba ‑ha 'le nahuiin 'nɩpata, ‑ʋ kɔ ‑pli nahuiin po, ‑ɛ mɔ, 'waa 'klɔ nɔ lɛ 'yi, kɔ, Nyɩsʋa a ‑Hihiu kɔɔ win ke 'bii, 'plɩɩ, ‑ʋ kɔ ꞊tɔ. Nahuin a ‑gbɛ, nʋ‑ʋ nɩ, ‑a di didi‑tɔplɩ a wuwe a ‑kʋan a ‑gbɛ ‑nyi,
4 ‑a ‑mɛ ‑ye, ‑a 'mʋ ti kɔ, 'ke ‑ba da Nyɩsʋa, kɔ, ‑ba ꞊tu Nyɩsʋa a ‑tɩ nahuin ye.»
5 ‑Tɩ ꞊nʋ, ‑Yusu a ‑wɔnnaanyʋ ꞊tu, ɩ klɩɩ nahuin 'bii ke. Nɛ‑ nue, 'ʋ ta 'le 'waa dɩɔnʋ ‑hɛyri lɛ, 'ʋ ‑ha 'le nahuiin 'nɩpata a ‑gbɛ. Ye‑hɛnahuon, ʋ ‑ha 'le, nɔ‑ mɔ Etiɛnɩ. Ɔ kuo ‑Yusu ye ꞊wlʋ 'dɔ, Nyɩsʋa a ‑Hihiu 'ʋ kʋɔ win ke 'bii, kɔ, 'ʋ ‑ha ‑wɛ 'le Filipʋ, kɔ Plʋkɔɔlʋ, kɔ Nikanɔlɩ, kɔ Timɔ, kɔ Pamɩnasɩ, kɔ Nikola, ‑ɔ kɔ 'le Atiɔsɩdɩɔ 'mʋ. Nikola a ‑gbɛ, ɔ 'de la ‑Juukʋɛyu, kɛɛ, ɔ ‑hɛ ‑Juukʋɛyu.
6 ‑Tɛ ʋ wʋ 'klɛɛ 'dʋ, ‑ye ʋ gbʋ nɩ, 'ʋ titiu ‑Yusu a ‑wɔnnaanyʋ ye, ‑Yusu a ‑wɔnnaanyʋ a ‑gbɛ 'ʋ da Nyɩsʋa, 'ke 'o 'waa ‑ta 'mʋ, 'ʋ pu dabʋɩ 'lu gblɛ, ‑ɛ die nu, Nyɩsʋa 'mu ꞊hapʋdɛ 'mʋ nu.
7 Ti a ‑gbɛ 'yri, Nyɩsʋa a wintɛ 'sɛɛ gbo, 'ke 'le 'blʋgba 'bii ꞊nʋ 'mʋ. Dɛ a ‑gbɛ, nɛ‑ nue, ‑Yusu a nahuin 'ʋ bii ke 'dɔ, 'ke 'le Jrusrɛdɩɔ 'mʋ, kɔ, Nyɩsʋa a ‑cɔhlʋnpinyʋ 'plɔplɔ 'ʋ kuo ‑wɛ ‑Yusu ꞊wlʋ ye.
‑Tɛ ʋ klɩ la Etiɛnɩ
8 Nyɩsʋa, ɔɔ Etiɛnɩ 'mʋ nu ꞊hapʋdɛ gblaka, kɔ, 'ɔ ‑nyi ꞊nɔ 'klɩ, Etiɛnɩ a ‑gbɛ 'ɔɔ 'ŋmilɛka‑tɔplɩ gblakɩ nu, 'ke 'le nahuin ‑hɛyri.
9 ‑Nyrɔwɔ ꞊de 'mʋ, nahuin ꞊de, nʋ‑ di 'le, 'ʋʋ Etiɛnɩ ꞊yʋɛ 'mʋ lɛ ꞊mʋɛ. Nahuin a ‑gbɛ, 'waa dɛ ‑ye, ɛɛ lɛ 'nɩ 'kukue, 'ke 'le Nyɩsʋa a kayu ꞊de gbo. Nahuindʋ a ‑gbɛ, ʋ nyu daa gbotɛ꞊go. 'Waa dɛ ‑ye, ‑ʋ ya 'le ꞊yʋɛ, 'ke ʋ ‑hɔn 'le Silɛnɩdɩɔ 'mʋ, kɔ Alɛsadrɩdɩɔ, 'ke ꞊ʋ ‑ye ‑hɔn 'le Silisiblʋgba kɔ Asiblʋgba 'mʋ. Nʋ‑ kɔ Etiɛnɩ 'hɛɛn‑ gblɛ po.
10 Kɛɛ, ‑tɛ bʋ di 'a ‑wɔn꞊tutue nu, ʋ 'die yi, ‑ɛ nue, ꞊tɔ ꞊nʋ, Nyɩsʋa a ‑Hihiuu ꞊nɔ ‑nyi, nɔ‑ kɔ 'kwli 'mʋ ɔɔ 'le naa, 'ɔɔ 'prɛ.
11 ‑Ye nahuin ꞊nʋ, ‑ʋ ya 'le ꞊yʋɛ, ʋ 'pɛɛ nahuin, 'ʋ lu, ʋ nɔ: «Kɛ ba po nahuin ye, ‑ɛ mɔ, Etiɛnɩ ‑gbo, a 'wɩn nɩ, ‑ɛ mɔ, Nyɩsʋa kɔ 'a winwlɔn‑hɛnyɔ Moise 'hɛɛn, nʋ‑ ɔɔ ‑tɩ 'hʋɩn 'mʋ lɛ ꞊tu.»
12 Nɛ‑ ɛ kʋɛ ye, 'ʋ ꞊tutuo nahuin kɔ 'blʋgba a ye'mʋnaanyʋ, kɔ Nyɩsʋa a teteitɔɔnyʋ 'hɛɛn, 'ʋ 'yɩya 'o Etiɛnɩ 'hʋɩn 'mʋ gbo, 'ʋ klo, 'ʋ gbɔ 'le ‑Juukʋɛ a ‑gboligbo a nahuin ye, ‑ɛ die nu, ʋ 'muo ‑bati lɛ poo,
13 'ʋ lee nahuin ‑ye, 'ke bʋ po Etiɛnɩ hɩ ke, ʋ nɔ: «Nahuon ‑gbo, Nyɩsʋa a 'kagblaka kɔ tetei ꞊nʋ, Nyɩsʋa ‑nyi la Moise, nɩ‑ ɔɔ ‑tɩ ‑hʋɩn 'hʋɩn 'mʋ lɛ ꞊tu. Nɛ‑ ɔ 'cipi 'o nunue.
14 ‑A 'wɩn nɩ, ‑tɛ ɔ nyi ꞊tu, ‑ɛ mɔ, Nasalɛtɩ 'mʋ a ‑Yusu ‑gbo, ɔ di Nyɩsʋa a 'kagblaka 'nɩ 'wla, kɔ, ‑a nɩ nunuklɔ, Moise tɔɔ la ‑a nɩ bunʋ, ‑ba 'cɩcɩɔ.»
15 Nahuin 'bii ꞊nʋ, ‑ʋ nɩ 'le ‑gboligbokayu gbo, ʋʋ Etiɛnɩ 'mʋ ‑hrʋʋ 'yie, ‑ye ʋ 'ye nɩ, ‑ɛ mɔ, 'a yigbaklaa 'nɩ wlɩn, ‑ɛ 'we ꞊nɔ Nyɩsʋa a lɛleenyɔ a yigbakla ye.