10
‑Tɛ ‑Yusu le la 'a ‑naagbopʋ a (72) ‑wlɩɩ ta ꞊tu 'o ‑pu ꞊tu 'o 'hɔn, ʋ 'mʋ Nyɩsʋa a ꞊hapʋtitie po
1 'Plɩɩ dɛ a ‑gbɛ, ɛ 'mʋ mu ‑hi, ‑ye Kʋkɔnyɔ ‑Yusu ‑ha 'le du 'mʋ nahuin a (72) ‑wlɩɩ ta ꞊tu 'o ‑pu ꞊tu 'o 'hɔn ‑ye, 'ɔ le 'waa 'hɔn ‑hɔn, 'ke bʋ 'nyɛ 'hru, bʋ mu 'le 'dɩɛ 'bii ꞊nʋ 'mʋ, kɔ ‑tɛgbi ꞊nʋ, ‑ɛ kɔ 'mʋ 'a ‑gbɛ, ɔ di ‑wɛ 'le mu.
2 Kɛ ɔ nyu ye po, ɔ nɔ: «꞊Gbla, ‑ɔ ꞊hlu, ɔ ‑huo nɩ, kɛɛ ꞊gbla'cɛnyʋ 'de ‑huo. 'A ‑tɩ, ba 'batɩ ‑cikɔnyɔ lɛ, bɔ le 'a ‑kʋannunyʋ ‑ye, ʋ 'mʋ 'a mʋ 'mʋ ‑hɛ, a 'mʋ ꞊gbla 'cɛ. (Ɛ 'we ꞊nɔ ye, ba 'batɩ Nyɩsʋa lɛ, ɔ 'mʋ 'a nahuin ‑ye le, ʋ 'mʋ 'a mʋ 'mʋ ‑hɛ, a 'mʋ nahuin ‑ye lɛ 'kukue, ʋ 'mʋ 'waa 'klɔ Nyɩsʋa ‑nyi.)
3 Ba mu 'klɛɛ. 'Nɩɩ 'a mʋ 'nɩ lee, ‑ɛ 'we ꞊nɔ 'blayuo ye, ʋʋ 'le ‑jio ‑hɛyri lee.
4 'Baa mu, a nɩ gba 'le 'wliyɛ, a nɩ gba 'le ‑wɛ blɔ, kɔ 'suei 'hɛɛn. Kɔ, a nɩ ‑wlɛn 'le 'hru wlɔn, nahuin a 'wiogblɛpo‑tɩ.
5 'Ba pa 'le kayu ꞊de gbo, ye‑hɛdɛ, kɛ ba po: Nyɩsʋa bɔ nɩ 'o 'a mʋ ‑wɔn.
6 Nahuon 'bɔ nɩ 'le kayu a ‑gbɛ gbo, 'bɔ nye ‑hʋa, 'ke Nyɩsʋa bɔ nɩ 'o ꞊nɔ ‑wɔn, bɔ nuo ꞊hapʋdɛ 'mʋ, ‑ye Nyɩsʋa dio 'o ‑wɔn 'nɩ nɩ. Kɛɛ, 'bɩa 'bɔ 'nɩnɩ ‑hʋɛ, ‑ye Nyɩsʋa 'deɛ bɔ nɩ 'o ꞊nɔ ‑wɔn, ‑ye ɔ 'deɛ bɔ nuo ꞊hapʋdɛ 'mʋ.
7 Kayu ꞊nʋ, ‑ʋ kɔ gbo ʋ di 'le 'a mʋ kwa 'blee, 'kee nɩ, ba nɩ 'le gbo. A nɩ na 'le kayuo gblɛ. Dididɛ ʋ di 'a mʋ ‑nyi, nɛ‑ ba di, kɔ, 'nie ʋ di 'a mʋ ‑nyi, nɛ‑ ba 'na, ‑ɛ nue, nahuon ‑gbo, ‑ɔɔ ‑kʋan nu, ɔ blɛ ye 'pɛɛlɛ.
8 'Ba 'ya 'dɩɔ ꞊de 'mʋ, 'bʋ 'ble 'a mʋ kwa, ba di dididɛ ꞊nʋ, ʋ di 'a mʋ ‑nyi,
9 kɔ, ba da Nyɩsʋa, 'ke bɔ ‑wɔ 'dɩɔ a ‑gbɛ a nahuin a 'kʋɛi, kɔ, ba le ꞊nʋ, ‑ɛ mɔ: Ti ꞊nʋ ‑kɔ 'yri Nyɩsʋa di 'a mʋ win ke kɔɔ, ɩ 'mʋɛɛ yrɛ.
10 Kɛɛ, 'ba pa 'le 'dɩɔ ꞊de 'mʋ, 'bʋ 'de 'a mʋ kwa 'ble, ba mu 'le 'dɩɔ a ‑gbɛ a 'dika. Kɛ ba po:
11 'A nɩ 'dɩɔ a 'pupu ꞊nʋ, ‑ʋ nɩ ‑a mʋ bʋɩ lɛ, ‑a di ‑a nɩ bʋɩ 'nɩ bʋbla, ‑ɛ die nu, ‑a 'mue 'a mʋ tɔɔ, ‑ɛ mɔ, Nyɩsʋa a yrʋ 'bʋ yɛ 'a mʋ, ‑ye 'a mʋ'ʋ nɩ, ‑ʋ nue 'a nɩ dɩɔnʋ ‑wɔn. Kɛɛ, ba kɔ 'a yiyie: Ti ꞊nʋ ‑kɔ 'yri Nyɩsʋa di nahuin win ke kɔɔ, ɩ 'mʋɛɛ yrɛ.
12 'Nɩɩ 'a mʋ 'nɩ le, ‑nyrɔwɔ ꞊nʋ ‑kɔ 'mʋ Nyɩsʋa di 'o nahuin ‑bati lɛ poo, 'dɩɔ a ‑gbɛ a nahuin, Nyɩsʋa diu ꞊tue ꞊sʋɛ, ɛ 'mʋ 'o nahuin ꞊nʋ 'mʋ ‑hi, ‑ʋ mɔ Sodɔmʋkʋɛ, ‑ʋ kɔ nunuklɔ nyre la 'yi lɛ.»
'Dɩɛ ‑ye a nahuin, ʋ 'de la ‑Yusu ꞊wlʋ ye kuo
(Matie 11.20-24)
13 (Kɛ ‑Yusuu lele 'a ‑naagbopʋ ye po, ɔ nɔ:) «‑Juukʋɛ ꞊nʋ, ‑ʋ nɩ 'le Kolasɛdɩɔ 'mʋ, kɔ Bɛtɩsaidadɩɔ 'mʋ, 'jrɔ 'ke 'o ꞊nʋ ‑wɔn, ‑ɛ nue, 'ŋmilɛka‑tɔplɩ ꞊nʋ, 'n nuu 'le ꞊nʋ ‑wɔn, 'bɩa 'nɩ nui wɛn 'le nahuin ꞊nʋ ‑wɔn, ‑ʋ 'de ‑Juukʋɛ, ‑ʋ nɩ 'le Tilɩdɩɔ kɔ Sidɔdɩɔ 'hɛɛn 'mʋ, si la, nahuin a ‑gbɛ, ʋ 'mʋ la wɔlɩ lɛ nu, ʋ 'mʋ la ‑tɔplɩ ‑hʋɩn 'hʋɩn 'mʋ lɛ pue, ʋ 'mʋ la 'waa dɩɔnʋ 'tɔpupu 'ŋmlɛ, ‑ɛ die nu, ʋ 'mue nahuin tɔɔ, ‑ɛ mɔ, ʋʋ ‑hʋa bʋ hie 'o dɛ 'kuku a nunue gbo, ʋ 'mʋ 'waa 'klɔ Nyɩsʋa ‑nyi.
14 'Ɛ mɔ ‑tɛɛ, ‑nyrɔwɔ ‑kɔ 'mʋ Nyɩsʋa di 'o nahuin ‑bati lɛ poo, nahuin ꞊nʋ, ‑ʋ nɩ 'le Kolasɛdɩɔ kɔ Bɛtɩsaidadɩɔ a ‑gbɛ 'mʋ, 'waa ‑bati di ke nɩ 'klɩ, ɩ 'mʋ 'o Tilɩdɩɔ kɔ Sidɔdɩɔ a nahuin a nɩnɩ 'mʋ ‑hi.
15 'Plɩɩ nahuin ꞊nʋ, ‑ʋ nɩ 'le Kapɛnaɔdɩɔ 'mʋ, ʋ nɩ ‑hie 'le 'lu ‑wɔn lɛ, ‑ɛ mɔ, Nyɩsʋa diu 'le 'nɩ 'yaa ‑yaayaa, ʋ 'mʋ yakɔ ye kʋɛ. Kɛɛ, ɔ diu 'le 'nɩ ꞊tɩɔ ‑tɩɔtɩɔ, ʋ 'mʋ 'le ‑tʋtʋ a bʋgbo nyre.»
16 Kɛ ɔɔ lele 'a ‑naagbopʋ ye po, ɔ nɔ: «Nahuon 'bɔ nɩ 'o, 'bɔɔ 'a mʋ nʋa ye gbo po, ‑ye ɛ 'we ꞊nɔ ye, 'mɔɔ nɩ, ɔɔ nʋa ye gbo po, kɔ, nahuon 'bɔ bla 'a mʋ ye, ‑ye ɛ 'we ꞊nɔ ye, 'mɔɔ nɩ, ɔ bla ye. 'Plɩɩ ‑ye nahuon, 'bɔ bla 'mʋ ye, ‑ye ɛ 'we ꞊nɔ ye, Nyɩsʋa, ‑ɔɔ lee nɔ 'mʋ 'klɔ ke, nɔ‑ɔ nɩ, ɔ bla ye.»
‑Tɛ ‑Yusu a ‑naagbopʋ, ʋ ‑hɔn la 'dagba 'mʋ
17 ‑Tɛ ti gbi ‑hi, ‑ye ‑naagbopʋ a (72) ‑wlɩɩ ta ꞊tu 'o ‑pu ꞊tu 'o 'hɔn ꞊nʋ, ‑Yusu le o, 'ke bʋ mu Nyɩsʋa a ꞊hapʋtitie po, ʋ ꞊hɩan ‑wɔn, 'manʋ nyu nu 'dɔ, ʋ nɔ: «Kʋkɔnyɔ, 'ye kɛ, 'kuo ‑hʋɩn, 'bɩa ꞊baa ‑na 'dʋ da, ꞊ba nyo 'le ‑wɔn 'prɛɛ, ɔɔ ‑wɛ 'o ‑a mʋ 'nɩ ꞊tuu, 'ɔɔ 'o nahuin ke 'mʋ ‑hɔn.»
18 ‑Ye ‑Yusu nɔ: «‑Tɛ 'nɩɩ 'le yakɔ 'mʋ lɛ ta, ‑ye 'n 'ye Satan nɩ, ‑ɔ mɔ 'kuo ‑hʋɩn a nyɩgblaka, 'ɔ ble 'le yakɔ 'mʋ, ‑ɛ 'we ꞊nɔ ‑tɛ ye, ‑tɛ bɛ 'nɩnɩ ꞊tɩ wɛn.
19 Ba 'ye kɛ, 'n ‑nyi 'a mʋ 'klɩ, 'ke ba na hrei kɔ ‑gayɩ 'hɛɛn ke, kɔ, 'ke ba ‑wɔ Nyɩsʋa a yraanyɔ Satan a 'klɩ gbo. Dɛ ꞊de 'deɛ bɛ nu 'a mʋ dɛ 'klan 'mʋ.
20 Kɛɛ, a nɩ nu 'le 'manʋ, ‑tɛ 'kuo ‑hʋɩn, ɔɔ 'o 'a mʋ ꞊tuu. Kɛɛ, dɛ ‑kɔ 'manʋ ba nu, nɛ‑ mɔ ‑tɛ Nyɩsʋa nu, 'ɔ 'crɩɩ 'a nɩ 'dʋɩ, 'ke 'le yakɔ 'mʋ.»
‑Yusuu la 'a ‑naagbopʋ 'nɩ tɔɔ, nyɔ‑ mɔ Nyɩsʋa
(Matie 11.25-27; 13.16-17)
21 Tii ‑do a ‑gbɛ a ti 'yri, ‑ye Nyɩsʋa a ‑Hihiu nue nɩ, 'manʋ 'ʋ ‑hi ‑Yusu wlɔn. Kɛ ɔɔ Nyɩsʋa ye po, ɔ nɔ: «'Na Bu o, ‑mɔ mɔ yakɔ kɔ ‑tʋtʋ 'hɛɛn a Kʋkɔnyɔ. 'Nɩɩ ‑mʋ 'nɩ baa, ‑tɛ ‑n nu, ꞊nɩ ‑hli ‑na nunu‑tɔplɩ nahuin ꞊nʋ 'yi ke, ‑ʋ plɛ, ‑ʋ mɔ ꞊tɔkɔnyʋ, kɔ 'crɩɩnɩɛiyinyʋ, 'plɩɩ, nahuin ꞊nʋ, ‑ʋ plɛ, ‑ʋ 'de dɛ ꞊de yi, nʋ‑ ‑n tɔɔ ‑tɔplɩ a ‑gbɛ. 'Nɩɩ ‑mʋ 'nɩ baa, ‑ɛ nue, kɛ'ɛ nɩ, ‑n nu 'a ‑hʋhʋa.
22 'Na Bu, ɔ ‑nyi 'mʋ 'klɩ, 'ke 'o ‑tɔplɩ 'bii ke. Nahuin 'die yi, nahuon a gblo tio‑ ꞊bo 'ya 'mʋ, 'bɛ 'de 'n Buu ‑do. Ʋ 'die ‑wɛ yi, nahuon a gblo tio‑ 'n Bu 'ya 'mʋ, 'bɛ 'de 'mɔ, ‑ɔ mɔ 'a 'Yu. 'Plɩɩ, 'ɛ nɩ nahuon, 'nɩɩ ‑hʋa ꞊bo ꞊tui ye, ɔ yie ‑wɛ nɩ, nahuon a gblo tio‑ 'n Bu 'ya 'mʋ.»
23 ‑Tɛ ‑Yusu kɔ 'a ‑naagbopʋʋ ‑do 'hɛɛn, ʋ nɩ 'o, kɛ ɔ nyu ye po, ɔ nɔ: «'A mʋ ꞊nʋ, ‑ʋʋ ‑tɔplɩ 'bii ‑gbo 'ye, ba kɔ plɔ a bleelɛ!
24 'Nɩɩ 'a mʋ 'nɩ le, ti ‑hi la a ti 'yri a Nyɩsʋa a winwlɔn‑hɛnyʋ kɔ bodɩɔpʋ 'plɔplɔ 'hɛɛn, ʋ nye la lɛ 'nɩ ꞊mɔ, 'ke bʋ 'ye la ‑tɔplɩ gblakɩ ‑gbo, aa kɛ 'ye, kɛɛ, ʋ 'nɩ 'yi ꞊le la, kɔ, ʋ nye la ‑wɛ lɛ 'nɩ ꞊mɔ, 'ke bʋ 'wɔn la ‑wɛ ‑tɔplɩ gblakɩ ‑gbo, aa kɛ 'wɔn, kɛɛ, ʋ 'nɩ 'wɩn ꞊le la.»
‑Yusu po la Samalikʋɛyu a ‑talʋdʋ, ‑ɔ waa 'a 'be ‑tʋnahuon, ʋ dʋa 'lɩla
(Matie 22.34-40; Makɩ 12.28-31)
25 ‑Yusu bɔ po 'klɛɛ lɛ, ‑ye Nyɩsʋa a teteitɔɔnyɔ ‑ye, ‑ɔ nɩ 'o, nɔ‑ 'ba ye 'mʋ, ɔ 'mʋ ‑Yusu 'mʋ lɛ ꞊tɔ, ‑ɛ die nu, ʋ 'mue 'ye, 'bɩa 'bɔ di ‑tɩ ꞊de ꞊tu, ‑ɩ 'de 'o ye 'sii, 'ɔ ꞊gbɔ wlɔn, ɔ nɔ: «Tɔɔnyɔ, dɛ tio‑ 'n kɔ ꞊bo nu 'le, ‑ɛ die nu, 'mʋ Nyɩsʋa a 'klɔ yrayrʋ ꞊nʋ kɔ, ‑ɔ 'nɩnɩ ‑wɛ 'le?»
26 ‑Ye ‑Yusu nɔ: «Dɛ tio‑ ʋ 'crɩɩ 'le Nyɩsʋa a teteicrɩɩnɩɛ 'kwli 'mʋ? Dɛ ‑gbo, ʋ 'crɩɩ, ꞊nɩ nye ‑hre, ‑be' ‑nɩɩ 'a 'wʋnwɔn nu 'le?»
27 ‑Ye ɔ nɔ: «‑N blɛ ye ‑bo nʋɛ ‑na Kʋkɔnyɔ Nyɩsʋa 'mʋ, 'ke 'le ‑na ꞊wlʋ 'bii ke, kɔ, 'ke 'le ‑na 'klɩ 'bii 'mʋ, kɔ, 'ke 'le ‑na 'lu a lɛ‑hielɛ 'bii 'kwli 'mʋ, kɔ, ‑n blɛ ye ‑bo nʋɛ ‑n 'be ‑tʋnahuon 'mʋ, ‑ɛ 'we ꞊nɔ ye, ‑tɛ ‑n nu ‑n dɩɔnʋ a 'mʋnʋɛlɛ.»
28 ‑Ye ‑Yusu nɔ: «'A ‑tɛɛ, nɛ‑ɛ nɩ. Nu dɛ a ‑gbɛ, 'plɩɩ ꞊mʋ 'klɔ yrayrʋ a ‑gbɛ kɔ.»
29 Kɛɛ ‑ye teteitɔɔnyɔ a ‑gbɛ, ɔɔ ‑hʋa bɔ ‑nyi 'a dɩɔnʋ ꞊wɔn. Nɛ‑ mɔ bɔ ꞊gba ‑Yusu wlɔn, ɔ nɔ: «Nyɔ‑ mɔ 'klɛɛ 'n 'be ‑tʋnahuon 'le?»
30 ‑Ye ‑Yusu nɔ: «Ɛ kɔ la nyɩbɛyu ꞊de. Nɔ‑ ‑hɔn 'le Jrusrɛdɩɔ 'mʋ, 'ɔɔ 'le Selikodɩɔ 'mʋ mu. ‑Tɛ ɔɔ 'klɛɛ mu, ‑ye ɔ bi 'le ‑balʋnyʋ ‑hɛyri, 'ʋ ‑hɩɔ wlawlɩ, ‑ɛ die nu, ʋ 'mʋ 'a ‑tɔplɩ 'yri, 'ʋ bio ‑bibi, 'ʋ dʋɔ 'lɩla, 'plɩɩ, 'ʋ hio 'o gbo, 'ʋ mu.
31 Bɔ pɛ 'klɛɛ 'o gbo, ‑ye Nyɩsʋa a ‑cɔhlʋnpinyɔ ꞊de, nɔ‑ɔ 'le di. ‑Tɛ ɔ 'yo, ‑ye 'ke ɔ na 'le 'hru a 'pɩa ‑ye ke, 'ɔ ‑hi.
32 ‑Tɛ ɔ mu 'klɛɛ, ‑ye Lefipʋyu ꞊de, ‑ɔ mɔ Nyɩsʋa a ‑cɔhlʋnpinyɔ a 'mʋ‑hɛnyɔ, nɔ‑ nyre 'o ‑tɛgbi a ‑gbɛ. ‑Tɛ ɔ nyre 'klɛɛ 'o, ɔ 'yo, ‑ye 'ke ɔ na 'le 'hru a 'pɩa ‑ye ke, 'ɔ ‑hi.
33 ‑Tɛ ɔ mu 'klɛɛ, ‑ye Samalikʋɛyu ꞊de, ‑ɔ mɔ pʋpʋdakʋ a nahuon, nɔ‑ɔ 'le di. ('Ke ɔ nɩ 'o 'kasra ke gbo. 'Plɩɩ, ti a ‑gbɛ 'yri, Samalikʋɛ kɔ ‑Juukʋɛ 'hɛɛn, ʋ nyinyre la lɛ.) Samalikʋɛyu ‑mɛ ‑ye, ‑tɛ ɔ nyre 'o nahuon a ‑gbɛ 'hʋɩn 'mʋ, ɔ 'yo, ‑ye 'a wɔlɩ nyo nu 'dɔ,
34 'ɔ 'yɩyɔ 'o 'hʋɩn 'mʋ gbo ‑tɛɛ, 'ɔ nu 'nyra kɔ ‑wiin, 'ɔ nu 'a ꞊ji a ‑kʋan, kɔ, 'ɔ mʋɩ lɛ. ‑Tɛ ɔ ‑wɔ 'a ꞊ji a ‑kʋan a nunue ‑wɔn, 'ɔ 'yɔɔ 'o 'a 'kasra ke, 'ʋ mu 'le Selikodɩɔ 'mʋ, 'ke 'le 'dagbɩ a kayu ‑ye gbo, 'ɔ po 'a ꞊tɔ.
35 ‑Tɛ ‑nyrɛ ‑nyɛ, ‑ye ɔ ‑ha 'le 'wliyɛ, 'ɔ ‑nye kayukɔnyɔ, ɔ nɔ: Nu 'wliyɛ ‑gbo, ‑bo kikle 'na nahuon ‑gbo lɛ. 'Bɩa 'wliyɛ a ‑gbɛ, 'bɛ 'de ‑huo, ꞊nɩ nu ‑n dɩɔnʋ a 'wliyɛ, ti ꞊nʋ ‑kɔ 'yri 'n di 'o ‑wɔn ꞊hɩaan, 'nɩ di 'le, 'n die ‑mʋ 'nɩ ‑nyi.»
36 'Plɩɩ ‑Yusu 'mʋ mu ‑yrɛ, ‑ye kɛ ɔɔ lele teteitɔɔnyɔ ‑nɩ wɛn ye po, ɔ nɔ: «'Ke 'le ‑mʋ 'yi 'mʋ, nahuiin ta ꞊nʋ ‑hɛyri, nahuon tio‑ nu dɛ, ‑ɛ nyi ‑a mʋ tɔɔ, ‑ɛ mɔ, nyɩbɛyu ꞊nʋ, ‑balʋnyʋ bi, 'a 'be ‑tʋnahuoon nɩ 'le?»
37 ‑Ye teteitɔɔnyɔ nɔ: «Nahuon ꞊nʋ, ‑ɔ nuo ꞊hapʋdɛ 'yi ꞊hlɔn lɛ, nɔ‑ɔ nɩ.» ‑Ye ‑Yusu nɔ: «‑Na ‑gbɛ, ꞊nɩ mu, dɛ a ‑gbɛ, nɛ‑ ‑bo nu.»
‑Tɛ ‑Yusu pa la Matɩ kɔ Mari 'hɛɛn ye
38 ‑Tɛ dɛ a ‑gbɛ, ɛ ‑hi, ‑ye ‑Yusu kɔ 'a ‑naagbopʋ 'hɛɛn, ʋ bi lele wlɔn 'hru, 'ʋ pa 'le 'dɩɔ ‑ye 'mʋ. 'Ke 'le 'dɩɔ a ‑gbɛ 'mʋ, 'ke nyrʋgba ꞊de nɩ 'le. 'A 'dʋ mɔ la Matɩ. Nɔ‑ 'ble ‑Yusu kwa, 'ke 'le 'a kayu gbo.
39 ‑Tɛ ‑Yusu nɩ gbo, ‑ye ɔ ‑tʋa Nyɩsʋa a ‑tɩ a tɔɔlɛ gbo. 'Ke Matɩ a ‑gbɛ a ‑dɩayu nyrɔyu nɩ ‑wɛ 'o. 'A 'dʋ mɔ Mari. Nɔ‑ nɩ 'o ‑Yusu 'hʋɩn 'mʋ gbo, ‑ɛ die nu, ɔ 'mʋ 'a tɔɔwin nʋa ye gbo po.
40 Matɩ ‑mɛ ‑ye, kayu a ‑kʋan a gblegblei ꞊nʋ, nɩ‑ kɔ ‑tɩɩ ꞊nɔ 'kla ‑wliye 'yaa. Nɛ‑ mɔ bɔ 'yɩya 'o ‑Yusu 'hʋɩn 'mʋ gbo, ɔ nɔ: «Kʋkɔnyɔ, ꞊be ɛ 'nɩ 'yaa ꞊le ‑mʋ 'kla ‑wliye, 'ke 'n ‑dɩayu bɔ ‑ha 'mʋ mɛ lɛ, 'n ‑do ꞊bo nu ‑kʋan 'bii? 'A ‑tɩ, lo, bɔ ‑hɛ 'mʋ 'mʋ.»
41 ‑Ye Kʋkɔnyɔ ꞊tuo ‑wɔn, ɔ nɔ: «Matɩ o, ‑nɩɩ ‑n dɩɔnʋ ‑wliye 'yaa 'kla, kɔ, ꞊nɩɩ ꞊wlɩ lɛ naa, 'ke 'o ‑tɔplɩ 'plɔplɔ ke.
42 Kɛɛ, dɛɛ ‑do nɩ 'o, 'ɛ mɔ 'yilɛnɔdɛ. Dɛ a ‑gbɛ, nɛ‑ Mari ‑ha 'le. 'Plɩɩ nahuon ꞊de 'deɛ bɔ ‑hɩɛ ꞊nɔ kwa.»