యోహాను రాసిన ప్రకటన గ్రంథం
గ్రంథకర్త
ప్రభువు తన దూత ద్వారా వెల్లడించిన దాన్ని గ్రంథస్తం చేసిన వాడిగా అపోస్తలుడు యోహాను తనను పరిచయం చేసుకుంటున్నాడు. జస్టిన్ మార్టర్, ఐరేనియస్, హిప్పోలైటస్, తెర్తుల్లన్, అలెగ్జాండ్రియా వాడైన క్లెమెంటు, మురటోరియన్లు మొదలైన వారంతా ప్రకటన గ్రంథం రచయితగా అపోస్తలుడు యోహానునే పేర్కొన్నారు. ప్రకటన గ్రంథాన్ని యోహాను దర్శన సాహిత్య శైలిలో రాశాడు. ఇది యూదుల రచనా శైలికి సంబంధించిన నమూనా. ఇందులో హింసల్లో ఉన్నవారికి అలంకారికంగా, సాదృశ్యరూపంగా నిరీక్షణను (అంతిమ విజయం దేవునిదే) వెల్లడించే పధ్ధతి కనిపిస్తుంది.
రచనా కాలం, ప్రదేశం
సుమారు క్రీ. శ. 90 - 96
ఏజియన్ సముద్రంలో ఒక ద్వీపం పత్మాస్ లో తాను ఉన్నట్టు యోహాను చెబుతున్నాడు. అక్కడ అతనికి ఈ దర్శనాలు కలిగాయి.
స్వీకర్త
ఆసియాలోని 7 సంఘాల కోసం ఈ ప్రవచనాలు వచ్చాయని యోహాను చెప్పాడు.
ప్రయోజనం
ప్రకటన గ్రంథ రచన ఉద్దేశం క్రీస్తును (1:1), అయన వ్యక్తిత్వాన్ని, అయన బలప్రభావాలను, త్వరలో జరగబోయే వాటిని అయన సేవకులకు చూపించడం. ఈ లోకం త్వరలో అంతం అవుతుందనీ, తీర్పు తప్పక వస్తుందనీ చెప్పే అంతిమ హెచ్చరిక ఇందులో ఉంది. తమ బట్టలు తెల్లగా ఉంచుకున్న వారికోసం ఎదురు చూస్తున్న పరలోక వైభవం తాలూకు మచ్చుతునకలు ఈ గ్రంథంలో కనిపిస్తాయి. మహా బాధల కాలం, అందులోని యాతనలు, అవిశ్వాసులు శాస్వతంగా అనుభవించబోయే నరకాగ్నిఈ గ్రంథం మనకు చూపుతుంది. సాతాను పతనం, అతని, అతని దూతల వినాశనం ఇందులో మనకు కనిపిస్తుంది.
ముఖ్యాంశం
వెల్లడింపు
విభాగాలు
1. క్రీస్తు చేసిన వెల్లడింపు, యేసు ఇచ్చిన సాక్ష్యం — 1:1-8
2. “నీవు చూసినవి” — 1:9-20
3. ఏడు స్థానిక సంఘాలు — 2:1-3:22
4. త్వరలో సంభవించబోయేవి — 4:1-22:5
5. ప్రభువిచ్చే చివరి హెచ్చరిక, అపోస్తలుని చివరి ప్రార్థన — 22:6-21
1
ముందు మాటలు
1 ఇది త్వరలో జరగాల్సిన సంగతులను యేసుక్రీస్తు తన దాసులకు చూపించడం కోసం దేవుడు ఆయనకు ఇచ్చిన ప్రత్యక్షత. ఆయన తన దేవదూతను పంపి తన దాసుడైన యోహానుకు ఈ సంగతులను తెలియజేశాడు.
2 యోహాను దేవుని వాక్కును గురించీ యేసు క్రీస్తు సాక్షాన్ని గురించీ తాను చూసినదానంతటికీ సాక్షిగా ఉన్నాడు.
3 ఈ ప్రవచన వాక్యాలను బిగ్గరగా చదివేవాడూ, వాటిని వినే వారూ, వాటి ప్రకారం నడుచుకునే వారూ ధన్య జీవులు. ఎందుకంటే సమయం దగ్గర పడింది.
4 ఆసియలో ఉన్న ఏడు సంఘాలకు శుభాకాంక్షలతో యోహాను రాస్తున్న సంగతులు. పూర్వం ఉండి, ప్రస్తుతం ఉంటూ, రానున్న వాడి నుండీ, ఆయన సింహాసనం ముందు ఉన్న ఏడు ఆత్మల నుండీ,
5 నమ్మకమైన సాక్షీ, చనిపోయిన వారిలో నుండి ప్రథముడిగా లేచిన వాడూ, భూరాజులందరి పరిపాలకుడూ అయిన యేసు క్రీస్తు నుండీ కృపా, శాంతీ మీకు కలుగు గాక. ఆయన మనలను ప్రేమిస్తూ తన రక్తం ద్వారా మనలను మన పాపాల నుండి విడిపించాడు.
6 మనలను తన తండ్రి అయిన దేవునికి ఒక రాజ్యంగానూ, యాజకులుగానూ చేశాడు. ఆయనకు కీర్తి యశస్సులూ, అధికారమూ కలకాలం ఉంటాయి గాక!
7 చూడండి! ఆయన మేఘంపై ఎక్కి వస్తున్నాడు.
ఆయనను ప్రతి కన్నూ చూస్తుంది. ఆయనను పొడిచిన వారు కూడా చూస్తారు.
భూమిపై ఉన్న జనాలందరూ ఆయనను చూసి గుండెలు బాదుకుంటారు.
8 “ఆల్ఫా, ఒమేగా నేనే. ప్రస్తుతముంటూ, పూర్వం ఉండి, భవిష్యత్తులో వచ్చేవాణ్ణి. సర్వశక్తి గలవాణ్ణి” అని ప్రభువు అంటున్నాడు.
పత్మసులో యోహానుకు క్రీస్తు విశ్వరూపం
9 మీ సోదరుణ్నీ, యేసు కోసం కలిగే హింసలోనూ, రాజ్యంలోనూ, ఓర్పులోనూ మీలో ఒకడినీ అయిన యోహాను అనే నేను దేవుని వాక్కు కోసం, యేసు సాక్ష్యం కోసం పత్మసు ద్వీపంలో ఉన్నాను.
10 ప్రభువు దినాన నేను దేవుని ఆత్మ స్వాధీనంలో ఉన్నప్పుడు భేరీనాదం లాంటి ఒక పెద్ద స్వరం
11 నా వెనక వినిపించింది. “నువ్వు చూస్తున్నది ఒక పుస్తకంలో రాయి. దాన్ని ఎఫెసు, స్ముర్న, పెర్గము, తుయతైర, సార్దీస్‌, ఫిలదెల్ఫియ, లవొదికయలలో ఉన్న ఏడు సంఘాలకు పంపు” అని చెప్పడం విన్నాను.
12 అది వింటూనే “ఎవరిదీ స్వరం?” అని చూడడానికి వెనక్కి తిరిగాను. అక్కడ ఏడు బంగారు దీపస్తంభాలను చూశాను.
13 ఆ ఏడు బంగారు దీపస్తంభాల మధ్య మనుష్య కుమారుడిలాంటి వ్యక్తిని చూశాను. పాదాలను తాకుతున్న ఒక పొడవాటి అంగీని ఆయన ధరించాడు. రొమ్ముకు బంగారు నడికట్టు కట్టుకుని ఉన్నాడు.
14 ఆయన తల, తల వెంట్రుకలూ ఉన్నిలాగా, మంచు అంత తెల్లగా ఉన్నాయి. ఆయన కళ్ళు అగ్ని జ్వాలల్లా ఉన్నాయి.
15 ఆయన పాదాలు కొలిమిలో కాలుతూ తళతళ మెరుస్తున్న కంచులా ఉన్నాయి. ఆయన కంఠ స్వరం వేగంగా పడుతున్న మహా జలపాతం ధ్వనిలా ఉంది.
16 ఆయన కుడి చేతిలో ఏడు నక్షత్రాలున్నాయి. ఆయన నోటి నుండి పదునైన రెండు అంచుల కత్తి బయటకు వస్తూ ఉంది. ఆయన ముఖం తన పూర్ణ శక్తితో ప్రకాశిస్తున్న సూర్యుడిలా ఉంది.
17 నేను ఆయనను చూడగానే నిశ్చేష్టు డి నా ఆయన కాళ్ళ దగ్గర పడ్డాను. అప్పుడు ఆయన తన కుడి చేతిని నాపై ఉంచి నాతో ఇలా అన్నాడు, “భయపడకు, మొదటివాణ్ణీ చివరివాణ్ణీ నేనే.
18 జీవిస్తున్నవాణ్ణీ నేనే. చనిపోయాను కానీ శాశ్వతకాలం జీవిస్తున్నాను. మరణానికీ, పాతాళ లోకానికీ తాళం చెవులు నా దగ్గరే ఉన్నాయి.
19 ఇప్పుడు నువ్వు చూసిన సంగతులనూ ప్రస్తుతమున్న సంగతులనూ, వీటి తరువాత జరగబోయే సంగతులనూ రాయి.
20 నా కుడి చేతిలో నువ్వు చూసిన ఏడు నక్షత్రాలు, ఆ ఏడు బంగారు దీపస్తంభాల రహస్యం ఇది, ఆ ఏడు నక్షత్రాలు ఏడు సంఘాల దూతలు. ఏడు దీపస్తంభాలు ఏడు సంఘాలు.