8
1 Oras Stefanus mate nia, Saulus moos iha nia. Nia neon diꞌak tan Stefanus mate tiꞌan.
Saulus nasusar Yesus eman sia
2 Baa oras Stefanus mate, noo ema mak fiar Yesus naꞌin hira iha nia. Stefanus mate tiꞌan, sia nola maten nia, hotu nodi baa nakoi. Sia moos tanis Stefanus maten.
Nahuu baa loron nia, ema nasusar tebe-tebes Yesus eman sia iha kota Yerusalem, toꞌo sia nalai keen karin malu baa rai Yudea no rai Samaria. Hela mesan Kristus klosan sia iha Yerusalem.
3 Saulus moos buka dalan bei-beik atu nadodok Yesus eman sia iha fatin hotu-hotu. Nia tama-sai uma, dada sarat feto no mane, natama baa bui.
Filipus katak Lia Diꞌak iha rai Samaria
4 Masik ema nasusar Yesus eman sia toꞌo nalai keen karin malu moos, sia la nanawa katak nalore Lia Diꞌak nosi Yesus baa ema iha fatin hotu-hotu.
5 Hatete baa Filipus. Baa oras nia, nia baa kota ida iha rai Samaria atu katak lia nosi Yesus, nebee ema natene Yesus nia Kristus mak Naꞌi Maromak natudu kedan hori uluk.
6 Toꞌo baa, Filipus nalo tadak blaar oi-oik. Ema lear naree saa mak nia nalo, sia moos libur malu atu rona niakaan dale.
7 Baa oras nia, ema mak diabu tekar sia moos iha nia. Diabu sia sai nela ema nia sia, nodi nakrake makaꞌas. Ema kmaꞌas no ema ai asak moos dadi diꞌak.
8 Naree nunia, ema iha kota nia neon diꞌak tebe-tebes.
9 Iha kota nia moos noo ema ida naran Simon. Nia matenek aitahan kukun. Kleur tiꞌan, nia nalo ema Samaria sia fiar niakaan matenek. Nia loko aan naꞌak, “Haꞌu neꞌe, ema makaꞌas!”
10-11 Tan nunia, ema kiꞌik-boot, feto-mane, hotu-hotu fiar baa nia. Sia dale niakaan naran iha kota nia naꞌak, “Ema neꞌe, makaꞌas tebes! Saa mak nia nalo, nanis mai nosi Maromak beran!”
12 Mais oras Filipus toꞌo iha siakaan kota nia, nia nanorin Lia Diꞌak nosi Yesus baa sia. Nia moos natudu dalan, nebee sia bele tama dadi baa Naꞌi Maromak eman. Rona nola nunia, ema lear feto-mane fiar baa Yesus, hotu sia nusu simu sarani.
13 Simon moos fiar baa Yesus, hotu nusu simu sarani. Sarani hotu tiꞌan, Simon tuir Filipus baa fatin hotu-hotu. Oras nia naree Filipus nalo tadak blaar no lia kasalak basuk sia, nia kaku ulun nodi naꞌak, “Makaꞌas tebes!”
14 Baa oras nia, Kristus klosan sia iha Yerusalem rona nola ema iha rai Samaria sia, simu tiꞌan Naꞌi Maromak Manfatin. Hotu sia solok tenik Petrus no Yohanis baa nebaa.
15-17 Toꞌo nebaa, foin sia rona ema Samaria sei la simu dauk Maromak Kmalar Lulik. Sia simu loos sarani nodi Yesus naran dei. Hotu Petrus no Yohanis rai liman baa ema nia sia ulun nodi namulak nusu nebee, ema nia sia moos bele simu Maromak Kmalar Lulik. Namulak notu tiꞌan, sia moos simu.
18 Oras Simon naree nunia, nia lolo osan baa Petrus no Yohanis nodi nusu naꞌak,
19 “Ama sia! Foo beran nia baa haꞌu, nebee haꞌu krai liman baa ema, sia moos bele simu Maromak Kmalar Lulik.”
20-23 Mais Petrus nakanas naꞌak, “O atu kona kastikar mo okaan osan nia! O manoin o bele sosa Naꞌi Maromak beran modi osan ka? La bele! O la fatan serwisu mo ami, tan okaan neon la loos! Haꞌu katene o neꞌe, ema mahirus ema. Lia aat waꞌin moos kesi o! Diꞌak liu, soe lakon okaan aꞌaat, hotu mamulak baa Naꞌi Maromak, nebee Nia kasu okaan neon dois nia.”
24 Rona nola nunia, Simon nakroꞌan naꞌak, “Adeei, ama sia! Tulun hamulak lai, nebee kastikar nia keta kona haꞌu!”
25 Hotu, Petrus no Yohanis katak nalore Naꞌi Yesus Manfatin iha kota nia. Hotu, sia fila nikar baa Yerusalem. Iha dalan, sia tuli leo-leo iha rai Samaria atu keke Lia Diꞌak nosi Yesus.
Filipus nasoru ema boot Afrika ida
26 Baa loron ida, Maromak Niakaan makbukar laleꞌan ida katak baa Filipus naꞌak, “Filipus! Baa lorokbelan, mais laꞌo tuir dalan tuan mak nosi kota Yerusalem borut sai rai Gasa.”
27-28 Rona nola nunia, Filipus moos laꞌo kedan. Iha dalan, nia naree ema boot ida. Ema nia mai nosi rai Etiopia. Baa oras nia, rai Etiopia noo naꞌi feto ida naran Kandake. Ema boot neꞌe mak babilan Naꞌi Feto Kandake sasoin hotu-hotu iha naꞌin tofatik. Nia foin tuir namulak iha kota Yerusalem. Oras neꞌe, nia fila nikar baa niakaan rai. Oras Filipus naree nia, nia noꞌi saꞌe kareta nodi leno hakerek.
29 Maromak Kmalar Lulik katak baa Filipus nebee nareꞌis aan baa kareta nia, hotu nasoru ema boot nia.
30 Kreꞌis tiꞌan, nia rona ema boot nia leno Yesaya niakaan hakerek. Hotu nia nusu naꞌak, “Ama! Ita hatene hakerek mak ita leno nia ka lale?”
31 Ema boot nia nataa naꞌak, “Lale! Musti noo ema nalore baa haꞌu lai, foin bele katene. Saꞌe mai, tuur mo haꞌu iha neꞌe.”
32 Hakerek mak ema boot leno nia, lian nuneꞌe:
“Nia hanesan bibi malae
mak ema dada nodi atu sona noꞌo.
Nia hanesan bibi malae oan mak ema teri rahun,
mais Nia la nakmee kois.
Nia la loke ibun.
Nia la nataa lia fuan rohan ida.
33 Ema deꞌan nahaat Nia.
Ema nakotu Niakaan lia la nodi moon.
Masik Nia la noo sala moos,
ema noꞌo luku.
See mak bele dale nosi Niakaan husar-binan? La noo, tan ema noꞌo Nia iha raiklaran tiꞌan.”
34 Leno hotu tiꞌan, ema boot nia nusu Filipus naꞌak, “Nuꞌunabee? Bei Yesaya dale nosi niakaan isin lolon duꞌuk ka, nosi ema seluk?”
35 Rona nunia, Filipus moos nanorin lia Yesus baa ema boot nia nosi Yesaya niakaan hakerek ohin nia, nebee nia bele natene dalan moris atu tuir Yesus.
36 Sia sei noꞌi laꞌo, ema boot nia naree wee iha mota ida. Nia dale teri Filipus naꞌak, “Ama! Maree! Noo wee iha nebaa. Kalo la noo saseni, ita tuun ona nebee ama sarani haꞌu.”
37 [Filipus nataa naꞌak, “Diꞌak! Kalo ama fiar tebe-tebes baa Naꞌi Yesus, la noo saa ida mak saseni! Mai tuun ona, nebee haꞌu ksarani ama.”
Hotu, ema boot nia katak naꞌak, “Haꞌu kfiar tebe-tebes kaꞌak Yesus nia, Naꞌi Maromak Oan mak Nia natudu kedan hori uluk.”]
38 Hotu, ema boot nia naruka kareta nanawa. Sia tuun baa wee, Filipus moos sarani kedas nia.
39 Oras sia rua sai nosi wee laran, Kmalar Lulik foti nola Filipus baa fatin seluk. Ema boot nia la naree Filipus ona, mais nia laꞌo liu nodi neon diꞌak lo-loos.
40 Hotu Filipus mosu iha leo ida naran Asotus. Hotu nia laꞌo liu baa katak Lia Diꞌak nosi Yesus iha leo hotu-hotu, toꞌo kota Kaisarea.