3
Naꞌi Maromak Niakaan Oan makaꞌas liu Bei Musa
1 Lia nuneꞌe mamaluk sia! Naꞌi Maromak bolu nola emi tiꞌan. Nia moos nafoli emi naꞌak, ema neon moon, nebee emi bele moris ho Nia iha laleꞌan. Tan lia nia sia, emi musti haneo lotu-lotuk lia nosi Yesus. Ita fiar haꞌak, Naꞌi Maromak mak solok Nia mai. Nia moos dadi naꞌilulik boot bodik ita.
2 Baa oras Naꞌi Maromak solok Nia mai, Nia nalo tuir Naꞌi Maromak hakaran hotu-hotu. Hodi nunia, Nia dadi hanesan Bei Musa, tan Bei Musa moos nalo tuir Naꞌi Maromak hakaran, baa oras nia naliku itakaan bei uluk sia.
3 Mais Yesus makaꞌas liu Bei Musa, tan Yesus nuꞌu uma kain ulun. Ema hotu-hotu natene naꞌak, uma kain ulun makaꞌas liu ema mak serwisu iha uma nia laran.
4 Ema ida-idak nariik uma kain duꞌuk. Mais Naꞌi Maromak nariik hotu-hotu.
5 Bei Musa nalo tuir Naꞌi Maromak hakaran baa oras nia dadi ain-liman bodik Naꞌi Maromak eman uma laran. Baa oras nia, Bei Musa katak kedan lia saa mak Naꞌi Maromak atu nalo baa loron ikus.
6 Yesus moos nalo tuir Naꞌi Maromak hakaran, mais Nia lahoos ain-liman hanesan Bei Musa. Tan Yesus, mak Kristus. Nia, Naꞌi Maromak Oan, mak Naꞌi Maromak boi kedan tiꞌan hori uluk atu solok mai iha raiklaran neꞌe. Kristus natene tebe-tebes babilan Ama Niakaan uma isin. Kalo ita kaer metin itakaan fiar, hodi haloon baa Kristus nohuun, ita moos dadi Naꞌi Maromak eman uma laran.
Keta seꞌi kotuk baa Naꞌi Maromak hanesan bei uluk sia, tan sia la bele tama hanawa kole iha rai mak Nia nameno tiꞌan atu foo baa sia
7 Tan lia nia, emi musti hanono diꞌa-diꞌak lia mak Kmalar Lulik dale naꞌak,
“Ohin loron neꞌe, kalo emi rona Maromak Manfatin,
8 keta ulun fatuk,
nuꞌu ema nia sia
mak laꞌo baa-mai toꞌo tinan haat nulu iha rai fuik.
Sia la noꞌuk rona baa Musa,
toꞌo Naꞌi Maromak duꞌuk
kreꞌis la bele neti neon ona no sia tenik.
9 Hanoin kokon!
Tinan haat nulu Haꞌu kaseꞌi tadak blaar oi-oik
iha siakaan oin besik!
Mais sia koko Haꞌu nohuun atu nodi naree Haꞌu kbele terus siakaan aꞌaat ka, lale.
10 Tan lia nia, Haꞌu kahibu sia kaꞌak,
‘Emi neꞌe, liu basuk tiꞌan!
Emi seꞌi kotuk tiꞌan, laꞌo hela Haꞌukaan dalan,
hodi tuir emikaan dalan kaleꞌuk dei!’
11 Haꞌu la kterus karee emikaan aꞌaat nunia tenik.
Haꞌu kahibu emi kaꞌak,
‘Emi la bele tama ona atu hanawa kole hamutuk ho Haꞌu.’ ”
12 Lia nuneꞌe mamaluk sia! Sintidu diꞌa-diꞌak! Keta arumak noo ema nosi emi mak nalo aat, toꞌo nia la fiar tenik, hotu seꞌi kotuk laꞌo nela Naꞌi Maromak mak moris nohuun.
13 Diꞌak liu, sura loron emi hakbiit malu neon. Tan emi maus kona beꞌur atu halo sala, toꞌo dadi ulun fatuk hotu la rona tenik baa Naꞌi Maromak.
14 Ita bele dadi soman ai ida ho Yesus Kristus, surak ita haloon baa Nia nohuun, hanesan baa oras ita foin fiar baa Nia.
15 Kmalar Lulik moos dale naꞌak,
“Ohin loron neꞌe, kalo emi rona Maromak Manfatin,
keta ulun fatuk, hanesan ema nia sia,
mak laꞌo baa-mai toꞌo tinan haat nulu iha rai fuik,
tan sakar Bei Musa.”
16 Oras neꞌe, haꞌu atu kusu nuneꞌe: Ema mak rona baa Bei Musa, hotu laꞌo nela nia, see sia? See tenik, kalo lahoos itakaan bei uluk sia mak Bei Musa duꞌuk foin nodi sai nosi rai Mesir. Tebes.
17 Ema mak nalo Maromak laran manas toꞌo tinan haat nulu nia, see sia? See tenik, kalo lahoos itakaan bei uluk sia. Sia moris kaleꞌuk iha rai fuik, toꞌo sia mate, hotu hakoi iha nia. Tebes.
18 Ema mak kona hahibun nosi Naꞌi Maromak, toꞌo la bele tama baa rai nia atu nanawa kole namutuk no Nia, see sia? See tenik, kalo lahoos itakaan bei uluk sia. Tan sia la noꞌuk nanono baa Naꞌi Maromak.
19 Malorek tiꞌan! Itakaan bei uluk sia la bele tama baa rai nia atu nanawa kole namutuk no Naꞌi Maromak, tan sia la fiar baa Nia.