6
Ema Nasaret sia la simu Yesus
(Mateus 13:53-58; Lukas 4:16-30)
1 Hotu, Yesus no Niakaan maktuir sia fila nikar baa Yesus Niakaan leo Nasaret.
2 Loron hamulak toꞌo, ema waꞌin baa namulak. Yesus moos tama baa uma hamulak atu nanorin. Baa oras nanorin, ema nia sia blaar nodi tonun naꞌak, “Ema neꞌe matenek liu! Nia moos no beran! Oin nunabee Nia bele nunia?
3 Tuir loos, Nia neꞌe badaen ai dei. Ita hatene Niakaan inan mak Maria no Niakaan alin sia mak Yakobus, Yoses, Yudas no Simon. Nia moos no alin feto. Ita hatene malu, tan ita leo ida!” Masik nunia moos, sia sei hirus Yesus toꞌo la noꞌuk rona tenik baa Nia.
4 Natene nola nunia, Yesus katak naꞌak, “Tebes! Maromak makoꞌan ida baa iha nabee dei, ema nakneter nia. Mais niakaan ema sia iha leo duꞌuk la nakneter nia.”
5-6a Yesus blaar tan ema Nasaret sia la noꞌuk fiar baa Nia. Tan lia nia, Nia la natudu beran waꞌin iha leo nia. Nadiꞌak nola loos ema moras ida-rua dei.
Yesus solok Niakaan maktuir naꞌin sanulu resin rua
(Mateus 10:5-15; Lukas 9:1-6)
6b Hotu, Yesus tuur sura leo mak kreꞌis nia sia nodi nanorin ema.
7 Nia moos bolu nola Niakaan maktuir naꞌin sanulu resin rua nodi solok sia naꞌin rua-rua baa keke lema Naꞌi Maromak Manfatin. Nia moos foo beran baa sia atu nodi teꞌur sai diabu.
8-9 Nia naruka sia naꞌak, “Emi musti laꞌo tanan dei. Lalika hodi bakae, osan no kakaluk. Hodi mesan kaso ain no faru tahan ida, no kaer hodi knoꞌa ida dei.
10 Kalo ema simu emi iha siakaan uma, hein iha nia toꞌo laꞌo.
11 Mais, kalo emi toꞌo fatin ida, hotu ema la noꞌuk simu emi, laꞌo hela fatin nia hodi katak baa sia haꞌak, ‘Tan emi la hoꞌuk rona Naꞌi Maromak Manfatin, ami hisik hela ahukresan leo neꞌe hosi amikaan ain atu dadi tadak naꞌak, emi naꞌin duꞌuk mak hatiu dinu.’ ”
12 Hotu sia baa keke lema Naꞌi Maromak Manfatin nodi katak baa ema, nebee sia nanawa nalo sala nodi moris tuir Naꞌi Maromak hakaran.
13 Sia teꞌur sai diabu. Sia kose mina baa ema moras ulun nodi namulak atu nadiꞌak nola sia. Hotu, ema moras sia moos diꞌak.
Ema noꞌo Yohanis Mak Sarani Ema
(Mateus 14:1-12; Lukas 9:7-9)
14 Baa oras nia, ema nosi fatin hotu-hotu natene Yesus tiꞌan. Lia nosi Yesus beran nia moos toꞌo Naꞌi Herodes tilun tiꞌan. Noo ema mak naꞌak, “Yesus neꞌe, Yohanis Mak Sarani Ema. Yohanis mate tiꞌan, mais moris nikar iha Yesus isin lolon. Tan baa nia, Yesus bele nalo tadak blaar oi-oik.”
15 Mais noo ema balu mak naꞌak, “Lale! Yesus neꞌe, Maromak makoꞌan Elia hori uluk. Nia mak moris nikar iha Yesus isin lolon.” Balu tenik naꞌak, “Lahoos nunia! Yesus neꞌe, Maromak makoꞌan foun ida, hanesan makoꞌan uluk sia.”
16 Mais oras Naꞌi Herodes rona lia nia sia, nia nalore naꞌak, “Yesus neꞌe, nanis Yohanis. Uluk haꞌu karuka ema taa kotu ulun, mais oras neꞌe, nia moris nikar!”
17-18 Uluk Naꞌi Herodes naruka nunia, tan nia nalo lia boot no Yohanis. Lia nia, nuneꞌe: Uluk naꞌi Herodes nola nikar alin Filipus feen, naran Herodias. Mais tuir loos, Filipus no Herodias la soe malu dauk. Tan lia nia, Yohanis nakahik Naꞌi Herodes bei-beik naꞌak, “Ama Naꞌi! Ita Boot la bele hola hikar itakaan alin feen. Lia nia nakur naksoit itakaan adat Yahudi!” Mais, Naꞌi Herodes nola luku dei. Hotu, nia moos naruka ema kohi nola Yohanis natama baa bui.
19 Tan Yohanis nakahik sia bei-beik, Ina Naꞌi Herodias moos hirus toꞌo atu noꞌo Yohanis. Mais la noo leet, tan Naꞌi Herodes natama Yohanis iha bui tiꞌan,
20 no naruka sondadu sia nebee daka metin nia.
Naꞌi Herodes duꞌuk nakerat Yohanis. Nia natene naꞌak, Naꞌi Maromak mak naruka Yohanis mai. Liu tenik, Yohanis neꞌe, ema diꞌak no loos. Naꞌi Herodes duꞌuk nakara rona Yohanis. Mais isin ida-idak, nia moos noran la diꞌak rona Yohanis dalen.
21 Nosi ikus, Ina Naꞌi Herodias netan leet noꞌo Yohanis. Loron nia, sia nadahur Naꞌi Herodes loron moris nodi namata ema boot sia mai hotu. Ema nia sia, mak makaer ukun, sondadu ulun, no fukun rai Galilea tomak.
22 Oras sia nadahur, Ina Naꞌi Herodias oan feto tama bidu. Nia bidu furak lo-loos toꞌo Naꞌi Herodes no bainaka sia neon diꞌak tebes. Tan baa nia, Naꞌi Herodes bolu nola oa nia hotu katak naꞌak, “Oa! O makara saa, katak mai! Haꞌu atu kfoo baa o!
23 Masik o musu haꞌukaan fohorai neꞌe faꞌe rua moos, haꞌu nanis foo. Karai aan kodi laleꞌan no raiklaran, kalo mamenon neꞌe.”
24 Hotu, oa feto nia baa nusu inan naꞌak, “Ina! Ina nakara haꞌu kusu saa baa Ama Herodes?”
Hotu, inan nataa naꞌak, “Aaa! O baa musu Yohanis ulun dei!”
25 Hotu, oa nia baa nikar Naꞌi Herodes, hotu katak naꞌak, “Ama! Haꞌu kusu Yohanis ulun. Tau baa bikan ida, hodi mai baa haꞌu oras neꞌe ona!”
26 Rona nola nunia, Naꞌi Herodes neon lakon kedan. Mais nia la bele dada nikar niakaan lia fuan nia, tan nia nameno tiꞌan, no ema waꞌin moos rona tiꞌan.
27 Tan baa nia, Naꞌi Herodes naruka sondadu ulun ida baa taa kotu Yohanis ulun iha bui laran.
28 Taa nola Yohanis ulun tiꞌan, sia tau baa bikan ida, nodi mai foo baa oa feto nia. Oa nia simu nola, hotu foo baa inan.
29 Oras Yohanis niakaan maktuir sia rona nola naꞌak ema taa kotu Yohanis ulun tiꞌan, sia moos mai nasai nola Yohanis maten nodi baa nakoi.
Lia Yohanis mate, nunia dei.
Yesus nahaan ema rihun lima resin
(Mateus 14:13-21; Lukas 9:10-17; Yohanis 6:1-14)
30 Baa loron ida, Yesus Niakaan maktuir sia mak Nia solok tiꞌan nia, fila nikar mai namutuk no Nia. Sia katak lia hotu-hotu mak sia nalo no nanorin tiꞌan.
31 Baa oras nia moos, ema waꞌin laꞌo baa-mai buka Yesus, toꞌo Nia no Niakaan maktuir sia la noo leet atu naa. Naree nunia, Yesus katak baa Niakaan maktuir sia naꞌak, “Mai ita baa fatin mamuk ida, nebee ita hanawa sala-sala lai.”
32 Hotu, sia saꞌe bero baa buka fatin mamuk ida mak dook nosi leo nia.
33 Mais ema waꞌin nia naree siakaan bero tuir debu boot tehen. Sia moos sai nosi leo laran, laꞌo tesi tuir rai maran, toꞌo uluk Yesus sia.
34 Oras Yesus sia tuun, ema waꞌin nia nein tiꞌan. Naree nunia, Yesus neon monu, tan ema nia sia la natene atu nalo saa. Sia hanesan bibi malae mak la noo makdaka. Nia moos nanorin sia
35-36 nosi loro natetu toꞌo loro malirin. Oras loro malirin tiꞌan, Yesus Niakaan maktuir sia katak baa Nia naꞌak, “Ama! Diꞌak liu, maruka ema waꞌin neꞌe baa sosa haan iha leo kreꞌis neꞌe sia, tan haan la noo iha neꞌe.”
37 Mais Yesus nataa naꞌak, “Lalika! Emi mak hahaan sia dei!”
Mais sia nataa nikar naꞌak, “Aikee! Kalo ami mak hahaan ema lear neꞌe, ami musti hasai osan lear boot, hanesan ema kansera tinan ida! Oin nunabee, ami bele hetan osan lear nunia?”
38 Mais Yesus nataa naꞌak, “Emi baa buka lai, keta noo ema mak nodi bakae.”
Sia moos baa buka, hotu mai nikar katak baa Yesus naꞌak, “Ami hetan loos tubi baluk lima no naꞌan tasi lolon rua.”
39 Hotu, Yesus naruka ema lear nia tuur naklibur baa hae fohon.
40 Sia moos tuur naklibur nunia. Klibur balu, ema naꞌin atus ida, balu tenik, naꞌin lima nulu.
41 Hotu, Yesus nola tubi baluk lima nia no naꞌan tasi lolon rua nia. Nia tanaat baa laleꞌan nodi nusu matak-malirin baa Naꞌi Maromak. Hotu, Nia tohi faꞌe tubi nia, lolo baa maktuir sia, nebee sia faꞌe nadaar baa ema hotu-hotu. Nunia moos, naꞌan tasi lolon rua nia.
42 Ema lear nia moos naa toꞌo bosu.
43 Sia naa notu tiꞌan, Yesus Niakaan maktuir sia libur nola haan resin sia, nakonu koꞌe sanulu resin rua.
44 Ema lear nia bele tama naꞌin rihun lima. Nia, foin sura mane dei. Sei la sura feto no lawarik sia.
Yesus laꞌo iha wee leten
(Mateus 14:22-33; Yohanis 6:16-21)
45 Hotu, Yesus naruka Niakaan maktuir sia saꞌe bero, uluk Nia baa leo Betsaida iha debu boot balu baa. Mais Nia duꞌuk sei nein atu naruka ema lear nia fila.
46 Ema nia sia fila hotu tiꞌan, Nia saꞌe baa foho leten atu namulak.
47-50 Kreꞌis kalan ona, Nia tuun nikar. Nia naree Niakaan maktuir siakaan bero toꞌo debu boot klaran tiꞌan. Mais sia fofer mate sala, tan sakar anin. Kreꞌis rai naroma, Yesus moos baa tuir sia. Mais, Nia laꞌo iha wee leten dei. Baa oras Nia atu taliꞌur bero nia, maktuir sia naree Nia. Sia sarebak tekis, nodi nusu baa malu naꞌak, “Hoi! Saa mak nia? Ema kmalar ka?!”
Mais Yesus katak baa sia naꞌak, “Keta hataꞌuk! Haꞌu neꞌe Yesus!”
51 Hotu, Yesus saꞌe baa bero laran. Anin moos nanawa kedan. Niakaan maktuir sia blaar hotu.
52 Sia foin naree Yesus nasai beran nodi nahaan ema rihun lima resin, mais sia sei la natene tebe-tebes Niakaan beran, tan siakaan neon no laran sei monas.
Ema moras iha leo Genesaret mai bele-bele baa Yesus
(Mateus 14:34-36)
53 Toꞌo debu boot balu baa, Yesus sia tuun, hotu kesi bero iha leo ida naran Genesaret.
54 Oras nia, ema waꞌin naree, hotu sia nahii naꞌak, “Hoi! Yesus mai tiꞌan!”
55-56 Sia moos nalai baa katak ema hotu-hotu iha leo laran. Rona nola nunia, ema natiu nodi mai siakaan ema moras sia.
Rona loos dei naꞌak Yesus iha fatin ida, ema mai natoba lerek ema moras sia iha fatin nia. Tan sia naneo naꞌak, “Surak koko loos Yesus farun ninin dei moos, ema moras diꞌak kedas.”