3
Klalaꞌok boi ema sarani ulun
1 Noo ema mak dale naꞌak, “Kalo ema ida nakara dadi ema sarani ulun, ema nia boi serwisu mak diꞌak basuk.” Tebes.
2 Mais ema sarani ulun lalaꞌok musti nuneꞌe: Nia naran morin. Nia moris moon no feen ida dei. Nia natene netu aan. Nia mamatek. Ema nakneter nia. Nia simu bainaka nodi laran maluak. Nia natene nanorin ema seluk.
3 Nia lahoos tua lanuk teen. Nia lahoos maktaꞌe ema. Makonak liu basuk, kalo nia ema mak laran diꞌak, mak nakara dame, no la rotus osan.
4 Nia musti bali uma kain duꞌuk. Niakaan oan musti nakneter no nanono baa nia.
5 Tan kalo ema la bele bali uma kain duꞌuk, oin nunabee bele bali Naꞌi Maromak eman sarani sia?
6 Kalo boi ulun, boi ema mak tuir Kristus kleur tiꞌan. Keta boi ema mak foin fiar. Tan ema oin nunia maus loko aan. Keta toꞌo Naꞌi Maromak deku nia, hanesan Naꞌi Maromak deku diabu ulun.
7 Ema seluk moos musti nakneter sarani ulun. Hodi nunia, nia la moe aan. Diabu ulun moos la bele foꞌat naloti nia.
Ema sarani ulun sasiꞌan
8 Nunia moos ema sarani ulun sasiꞌan musti nuneꞌe: Nia naran morin. Nia nanaan la karuak. Nia lahoos tua lanuk teen. Nia la naa sotir liu resik.
9 Nia neon moon. Nia kaer metin hanorin mak Naꞌi Maromak nalore tiꞌan baa ita ema makfiar sia.
10 Kalo emi atu boi ema sarani ulun sasiꞌan, leno diꞌa-diꞌak uluk niakaan moris no niakaan serwisu. Kalo la noo sala, foin foti nia baa sarani ulun sasiꞌan.
11 Ema sasiꞌan feen moos musti moris fatan no diꞌak. Musti moris la nahaat ema naran. Musti netu aan. Musti ema fiar nia.
12 Sasiꞌan mane musti moris moon no feen ida dei. Musti natene bali uma kain duꞌuk. Musti naliku oan sia.
13 Kalo sarani ulun sasiꞌan naliku ema sarani diꞌa-diꞌak, nanis ema hetak nakneter nia. Nia moos hetak naberan aan katak nosi niakaan fiar baa Yesus Kristus.
Lia tatuur nosi itakaan fiar
14-15 Timo! Haꞌu kaloon, la kleur ona, haꞌu kbele maꞌi karee o. Mais kalo noo sasenin, haꞌukaan hakerek neꞌe bele toꞌo uluk baa o. Kakerek neꞌe atu foo katene baa o nosi lia Naꞌi Maromak ema uma laran siakaan moris lalaꞌok. Keta maluꞌa maꞌak, Naꞌi Maromak mak sia fiar nia, Maromak mak moris. Sia hanesan uma mak noo tatuur no kakuluk biit, mak tane Naꞌi Maromak hanorin loos.
16 Naꞌi Maromak loke tiꞌan lia funin boot nosi itakaan fiar. Itakaan fiar tatuur nia, nuneꞌe:
Kristus namaan aan mai iha raiklaran neꞌe,
nola ema raiklaran ilas hanesan ita.
Maromak Kmalar dadi saksiin naꞌak,
Yesus neꞌe, Ema Moon.
Maromak Niakaan makbukar laleꞌan sia naree Nia tiꞌan.
Niakaan Lia keke lema tiꞌan, toꞌo baa ema iha fatin hotu-hotu.
Iha rai hotu-hotu ema fiar Nia tiꞌan.
Naꞌi Maromak foti saꞌe Nia baa laleꞌan, hotu Nia nabesi aan iha fatin kneter.
Itakaan fiar tatuur mak nia.