9
Nopga kjrara Sbörë sorë
1 Tja töno beno Cristo tjok. E kjĩshko ga tja tjl̈ẽ beke. Sbö Sëya om go l̈i tjl̈ẽ bor kong bor pjl̈úshko ga tja shäng jyõrkë l̇l̇ëme l̈e.
2-3 Tja woydë ara bor pjl̈úshko ĩyado, bor pjeyoga judíoga l̈i kjĩshko. Epga mär ber l̈öng Cristo go wl̈o ga woyde ga tja ie Sbörë ber Cristo tjok ame, tja ie ber shdungko wl̈eni ga bor kong ga pjl̈úe.
4 Epga Israel tjëyoga. Epga kjrara Sbörë beno ba wapga. Ba dbo kãl̈ã pina ba kong, tjl̈õkwo twara ba kong, beno ĩyado wl̈o, kjok l̇l̇gwekkl̈o l̈i twara ba kong, pina ba poshrëk ba ushko, l̇l̇ëbo l̈ara ba kong jl̈õkoyo ara bakoe.
5 Ba tjl̈apgaga tek dënashko so tjwl̈õ ara anmoyõ. Cristo tjl̈apgaga tek dënashko so l̈i epga. Cristo, e Sbö. Uunkong pjl̈uyo, poshrëkko ĩyado l̈i e. Ber eni.
6 Gueniyo l̇l̇ëye l̈ara Sbörë Israel tjëyoga kong jl̈õkoyo l̈i shärye eni l̇l̇ëme l̈otë l̇l̇ëme. Sbö kong ga Israel tjëyoga uunkong, e ba nopga dö l̇l̇ëme.
7 Abraham tjëyoga uunkong beno ba tjëyo jl̈õkoyo dö l̇l̇ëm bakoe. Sbö tjl̈ẽno ba kong ga «Isaac tjëyo tek ber bop irgo l̈i ber bop tjëyo jl̈õkoyo eröe» l̈ara eni.
8 E kjĩshko ga Abraham tjëyoga uunkong beno Sbö wapga dö l̇l̇ëm, ba wapga weno tjl̈õkwo l̈ara Sbörë jl̈õkoyo l̈i kjĩshko eröe.
9 Sbö tjl̈õkwo l̈ono Abraham kong jl̈õkoyoshko ga tjl̈ẽ ba kong ga «Dbar l̇l̇ono l̈oror l̈i go ga pja ĩn tjwe obi. Eshko ga bop boy Sara wl̈oshko wa tjeng kjl̈ara domer tjän» l̈e.
10 Ba wa l̈ara l̈i, e bi tjl̈apga Isaac. L̈u to jek ara ga orkwosmono Rebeca tjok, ga wapga do pjök, kjl̈ö.
11-13 Weno bäm go l̈i Esaú, irgo Jacob. Gueniyo wentë l̈ok l̇l̇ëm obishko ga Jacob kjrara Sbörë, l̇l̇ëbo shärye ba tjok wl̈o. Kjrara eni, l̇l̇ëbo pjl̈ú shäryara kjĩshko l̇l̇ëme. Eshko ga l̇l̇ëbo pjl̈ú, l̇l̇ëbo owa, e shäryayde l̈ok l̇l̇ëm obi. Gueniyo Sbö tjl̈ẽ Rebeca kong ga «Bäm ĩyo l̈i ichaga ber ba l̈ëngdë» l̈e. L̇l̇ëbo l̈ara Sbörë obi l̈i tak pjang ba tjl̈õkwo go eni: «Jacob woydoror ara. Gueniyo Esaúra ĩywor shjiktëng.»
14 ¿Eni ga l̇l̇ë l̈oydë? ¿Sbö, e l̇l̇ëbo shäryë bek l̇l̇ëme l̈oydëre? Eni l̇l̇ëme.
15 Tjl̈ẽno Moisés kong ga
«Ëye songe l̈ër woydë ga e songe l̈otë eröe.
Ëye kjimtër woydë ga e kjimtotë eröe.»
16 Eni ga shji kjimte Sbörë, shji songe l̈e woydë kjĩshko, e woydëy ara kjĩshko l̇l̇ëm, l̇l̇ëbo pjl̈ú shäryoroy kjĩshko l̇l̇ëm bakoe.
17 L̇l̇ëbo l̈ara Sbörë Egipto so pjl̈uyo kong l̈i tak pjang ba tjl̈õkwo go eni: «Pja ioror beno no pjl̈uyo, bor dbo kësbang pin bop go wl̈o, tja ë miyde nopga l̈öng kjok kjwang jĩkong l̈irë wl̈o bakoe.»
18 Miydëy e go ga ëye songe l̈e woydë ga songe l̈e, ëye ie woydë ber sök ëye kuya woydë l̇l̇ëm ga ie ber l̈öng eni bakoe.
19 Pjãy kjone kjone kjwe l̈öng wotjl̈ĩk ga «¿Eni ga l̇l̇ëye shäryëy l̈i l̈aga erë kuzong ga shji shdũya ega?» l̈ëmi eni kjwe.
20 Gueniyo pjeyoga, shji no eröe. ¿L̇l̇ëbo shäryara Sbörë l̈i owa l̈ëy ba kong sorëro? No parkë l̇l̇ëbo shäryë kl̈ung shosho go ga «¿Tja shäryorop jũni ega?» l̈e kl̈ung shosho l̈irë ba kong ga äe.
21 Kl̈ung shosho kjrinaso ëmdë ga sbi shärye kjwo pjök e go ga pjl̈úe. Kjwara shärye wol̈ësowa, tjwl̈õ ara, ie ber tjeng dboy wl̈o, kjwara obi shärye uriso, ber l̇l̇ë pogo wl̈o. L̇l̇ëbo shärye e go, woyde sorë l̈i eni ga pjl̈úe.
22 Woyde Sbörë ga miydëba ga e iirkë ara nopga l̇l̇ëbo owa shäryono l̈i kong, ga shdũya kjang, ba dbo ara go ga pjl̈úe. Eni ëmdë ga nopga shdungko l̈i shduna mal̈ing l̇l̇ëm, kura sök kjing erä.
23 Shäryara eni, ba dbo kãl̈ã pĩya nopga songe l̈ara l̈i kong wl̈o. Epga kjrara dënashko, l̇l̇ëbo pjl̈ú shärye ba kong wl̈o.
24 Shji rokara eni. Judíoga rokara dö l̇l̇ëm, nopga judío l̇l̇ëm wl̈eniyo rokara bakoe.
25 Kjibokwo tara Sbö tjl̈õkwo l̈aga tek dënashko so Oseasdë. L̇l̇ëbo l̈ara Tjl̈apgarë l̈i tak pjang e go eni:
«L̇l̇ono ga nopga botoya l̇l̇ëm l̈öng l̈i iër ber l̈öng bor nopga shara,
ga nopga woydoror l̇l̇ëm l̈öng l̈i woydër ara shara.»
26 Sbö tjl̈õkwo tak pjang eni bakoe:
«Dënashko ga Sbö tjl̈ẽno nopga kong ga “Pjãy bor nopga l̇l̇ëme” l̈ara eni.
Gueniyo l̇l̇ono ga kjok eshko sopga kowe Sbö sök së l̈i wapga shara.»
27 Dënashko ga Isaías tjl̈ẽno Israel tjëyoga kjĩshko eni:
«Israel tjëyoga träk l̇l̇ëm, l̈a sho tjeng dl̈ung kjako wl̈eni ëmdë ga
där ber kjl̈öbö doë.
28 No l̇l̇gweya Tjl̈apgarëshko ga
nopga l̈öng kjok ëre kjing go l̈i shdũya pjir, jekdo,
l̈ara sorë l̈i eni.»
29 Bäm go ga Isaías tjl̈ẽno eni:
«Tjl̈apga, l̇l̇ëye shärye woydë l̈i shärye ga pjl̈úe.
Shji tjëyoga tek ber bi irgo l̈i iara beno l̈öng së kjl̈öbö l̇l̇ëm kjwe ga
shji l̈öng Sodoma sopga dik,
shji l̈öng Gomorra sopga dik bakoe.»
Israel tjëyoga mär woydë Cristo go l̇l̇ëme
30 ¿Eni ga l̇l̇ë l̈oydë? Nopga judío l̇l̇ëm wl̈eniyo wotjl̈ĩno l̇l̇ëbo pjl̈o bek l̈i shäryë l̇l̇ëme. Eni ëmdë ga mär Cristo go kjĩshko ga iara Sbörë beno pjl̈o bek ba bokso.
31 Gueniyo Israel tjëyogara dröno ara, l̇l̇ëbo pjl̈o bek l̈i shäryë wl̈o. Eni ëmdë ga öötong beno pjl̈o bek Sbö bokso l̇l̇ëme.
32 ¿Eni ega? Äär ber pjl̈o bek Sbö bokso wl̈o ga l̇l̇ëbo pjl̈ú tak pjang kjok l̇l̇gwekkl̈o tara Moisésdë go l̈i shärye woydë, gueniyo mär woydë Cristo go l̇l̇ëme. Eni ga sabyono akkwo iara beno nopga sabyokl̈o l̈i go wl̈eni,
33 tak pjang Sbö tjl̈õkwo go sorë l̈i eni. Tjl̈ẽ ga
«¡Ĩzĩa! Akkwo iër ber buk kjwara Sión kjokyo,
nopga sabyë e go wl̈o.
Gueniyo ëye mär ba go ga
l̇l̇ëye koshe l̈i wl̈ẽya jl̈õkoyo.»