Apostol vdwgv
NYINGNAM
Mintamchonam
Apostol vdwgv Nyingnam vnam kitap si Luk gv alvnv Gamlv lvktong ngv. Si kainv risvvngsv nga mimpado oguaingbv kvvlo gv Jisunyi riming gvnv vdwa, Darwknv Dow gv, rigvnam lokv alvnv Gamlv nga japgo karmunamv “Jerusalem hoka, Judia okv Samaria mvnwng ho, okv sichingmooku gv ataranya lo” (1.8). Soogv higu si Kristan rirap kunam lvkwnglo oogv Jius nyi vdwgv pingkolo richo kunamv okv mvngjwng ngv sichingmooku so aanya kunamv. Lvknv vka mvngjwng toku lvkpvku ninyigv lvknam am kaanv vdwv mvngjwng duku Kristan rinam si Roman mooku lokv gwngmi sunama, okv oogv Kristan mvngjwng namsi Jius mooku lo lingkunam.
Nyingnam kitap si lvkdung jvngv lvkrw lvkpa pvkunam, baak aom gobv rilakunam, vv Jisu gv alvnv Gamlv nga mingkar kunam okv gvrja aka mvkunam lvkwnglo lvktoku: (1) atuake ho Jerusalem mooku lo kristan vdwv rirab kunam ho Jisu gv ao mooku bv Chaakunamv; (2) Palestin mooku lo aku akusibv minkar kunamv; okv (3) ho hoka kaiyasin bv Mediterranian gwngda gv adarai Rom mooku ho.
Nyingnam kitap lo dinchinam angv Darwknv Dow gv rikunam vdwv, hv Pintikost alulo mvngjwngnv vdwlo jwkrw jilwkla rigvdogvnv vdwa gwlwk am jila gvrja nga alvbv rigvdogv mokunam vdwa mimpadu. Kvvlo gv richodochonv kristan vdwgv doin vdwa lvkrwlvkpa jila vvpv jidu, okv Nyingnam kitap so lvkpvnam dvdvlo kaapado ho jwkrw gv doina mvngjwngnv vdwgv rinamdoonam lo okv gvrja vdwgv akin minsukunam lokv.
Arwng lokv darlinnam
Tvvyakaria nvgv ripv kunam (1:1-26)
a. Jisu gv minyungminya bv gamki kunam okv milvnam (1:1-14)
b. Judas gv ritungnga ripwngrinya jikunv(1:15-26)
Jerusalem lo tvvriakarianv (2:1-8:3)
Judia okv Samaria lo tvvriakarianv vdwv (8:4-12:25)
Paul gv kudungkua rinam (13:1-28:31)
a. Atuake lo Missionari vngkarnam (13:1-14:28)
b. Jerusalem lo vngkumnam (15:1-35)
c. Lvnyinvbv missionari vngtin kunam (15:36-18:22)
d. Lvum nvbv missionari vngkunam (18:23-21:16)
e. Jerusalem, Kaisaria okv Rom lo Paul patwk dookunam (21:17-28:31)
1
1 Pakmisinam Tiopilas:
Ngoogv lvktulwkke lwknam kitap lo ngo Jisu gv ogumvnwng rinam okv minam ninyigv atukalu ho rinama lvkpvnv
2 ninyi nyidomooku chaatv madvbv alulo. Ninyigv chaama dvbv, Hv kaatamritamla Darwknv Dow jwkrw lokv ninyigv Apostol gobv darlin kunam nyi vdwa.
3 Vkvgv siro kunam kochingso alu champi go ogolo lamtv lo hv nyi vdwa kaarwksuku nama ho hv turpvkunv vv nyi vdwa kaatam kunam. Bunu ninyia kaatoku, okv hv bunua lvkobv Pwknvyarnv gv Karv gv lvgabv japbam toku.
4 Okv vdwlo bunu lvkobv aato kudw, hv bunua so orto sum jitoku: “Jerusalem am vngyu mabv kv, vbvritola jwkrw lvgabv doyato ngoogv nonuam minpv nama, ngo Abu gv jwkrw milv nama.
5 Jon isi lokv baptisma jito, vbvritola so lonyiloum so nonua Darwknv Dow lokv baptisma jire.”
Jisu Nyidomooku chaakunam
6 Vdwlo Apostol vdwv Jisunyi kaarwk sikubvdw, bunu vdwv ninyia tvvkato, “Ahtu, no so vjakdadw suka Israel am Karv nga jikur dooku bvre?”
7 Jisu bunua minto, “Ridwvngdw ngv ngoogv Abu gv atubogv tujupkunamv, okv so si nonu lvgabv chinsvma vdwlo vv bunu ririkudw.
8 Vbvritola vdwlo Darwknv Dowv nonu gvlo aaku bolo, no jwkrw doriku, okv no ngo gvbvku minjiyanv gobv ririku Jerusalem lo Judia mvnwnglo okv Samaria okv sichingmooku gv dotvr mvnwnglo mingo jinv gobv ririku.”
9 Miro koching so ninyi nyidomooku naacha kunama ho vdwv kaaria toku, okv ho vdwgv kaanyung aku ninyia hapumv kaklum toku.
10 Bunu vdwv vjaklodvbv nyido tlo bv ninyigv chaanama roodungla kaaria kunamv, ogolokv nyi anyigo vji jipung kootola dvminmabv bunu vdwgvlo aala dakbamto
11 okv minto, “Galili nyi vdwv, ogulvgabv nonuno daktola nyidotolo kaadung dunv? Si Jisu si, nonugv lokv nyidomooku bv naacha kunama, nonu ninyia nyidomooku bv chaadubv kaaming gvnam aingbv nw vbvching lvkodv aakur reku.”
Judas gv ritungnga ripwngrinya jikunv
12 Okv Apostol vdwv Olib gv Moodw lokv Jerusalem lo vngkur toku, hv pamtv lokv lvtw gobv aduto.
13 Bunu banggu lo aachi toku okv ho vdwgv karchung dookulo chaachi toku: Pitar, Jon, Jems okv Andriu, Pilip okv Tomas, Bartolomiu okv Metiu, Alpius gv kuunyilo Jems, Saimon ringria kunv okv Jems gv kuunyilo Judas.
14 Bunu dookum nyato kumbwng nyala, anvnyimv vdwv okv Jisu gv anv Meri okv ninyigv boru vdwv lvkobv.
15 Alu lonyiloum koching ho mvngjwngnv vdwv doopamgo pamto, hokaku lwnggola chamnyi gubv, okv Pitarnyi japdubv daktoku.
16 “Ngoogv ajin vdwv,” hv minto, “Darwknv Dow lokv minamv darwknv kitapv jvjvbv aaduku, Dabid gv lokv, oogv Jisunyi booku nama chigudabianv Judas gv lvkwng lo mincho moodubv mvtoku.
17 Judas ka ngonugv apam lo ribamv, hv ngonugv kudungkua aba lo ribam kunam akobv darlin kunamv.”
(
18 Judas gv alvmanv rijo morko paanama rongo rvvnv toku, ho rongo hoka ninyi atubongv hoksar sitoku; ninyi godit goitla okv ninyigv tangiv pokdik lintoku.
19 Jerusalem lo nyi doonv vdwv so sum tvvpa kunam, okv ho vdwgv atubogv gaam bv ho rongo nga Akeldama vla vdwv minkunam, Akeldama, minam si “Gwngrw Talwng Rongo.”)
20 “Holvgabv soogv Miri kitap si vbv lvkpv pvku,
‘Oogv naam lo nyi akoka dookuma;
Holvgabv vkvgv naamv arochoko duku.’
So si ka lvkpv duku,
‘Vbvmabvdv akonvka vkvgv risvdosv nga naariku.’
21-22 “Holvgabv, Ahtu Jisu gv turkur kunama, ho kaariatarianv akobv ngonu gvlo ribam rungdu kubv, hv nyi angv kvvlo lokv Ahtu Jisu ngonugv lvkobv vnggo karla Jon ninyigv baptisma gv doina japgo kari lokv Jisunyi nyidomooku lo ngonugv pingko lokv laachama dvdv lobv riming gvnv gobv rirungpv lage.”
23 Vbvrikunamv, bunu vdwv nyi anyi gonyi mimpv toku: Josep, um Barsabbas vtoku (Justus bvka mintoku) okv Matias.
24 Vbvrikunamv bunu kumtoku, “Ahtu, no mvnwng gv mvngnama chindu, noogv gaklin pvvnam nyidum anyi sum ngonua kaatam bvka
25 Apostol aingbv ridubv Judas gv vngro kunam lokv, nyi ogolokvdw ho vngkunam.”
26 Vbvrikunamv bunu nyi anyia amin chingkw sito okv ako chincha namv Matiasnyi Apostol akobv chilin toku vringgola akinlo aapwng toku.