EPESIAN
vdwa Paul gv Siti Jinam
Mintamchonam
Epesian vdwa Paul gv siti lvknam si mintuminke bv minchonam ngv “Siching gvla nyidomooku gv arwng sokv ogumvnwng pwknamyarnam nga lvkingobv laakum lakula Kristonyi dumpoyachok bv atutomu dukubv vla rinamv Pwknvyarnv gv mvngnamv vla lvkto” (1:10). Pwknvyarnv gv nyi vdw sum vbvka mindu kairungnv gv soogv mvngnam am Soogv Jisu Kristo gv lokv akingobv nyia husi mvnwng ngv gwnglinrilin toka vto.
Atuake gv aba baangv sum Epesian vdwa lvknv ngv Pwknvyarnv Abu ninyigv nyi vdwa darlin namsi simbvhabv ngv akin gvvdubv vla goklin kunamv vtoku, oguaingbv Kuunyilo Jisu Kristo gv lokv bunugv rimur am anyutaku jvbv mvngnga jigv rikula okv naalin pvkudw, okv oguaingbv Pwknvyarnv gv kairungbv milvpvvnam Darwknv Dow lokv saksor alv chimu jipv kudw vbvrikunam dvdv nga lvktoku. Lvkdin gonv gv lvnyinvbv hv puri rinv vdwka Kristo gvlo akingobv rigvnvnv bunugv singnamrinam lo alvjvbv ridudodubv doolwk yilaka vla minto.
Pwknvyarnv gv nyi vdwv Kristo gvlo akingobv risvdaksv nga nyi nyichar mvnwng gv gaam mindung lokv kaatam la rinya toku; Gvrja ngv nyi adwnamar aingbv ridu, oogv aolo Kristo dumpo aingbvka ridunv; vbvmajeka, naam namda aingbv, Kristo adamako takbv gwnglo aingbvka ridunv; vbvmajeka nywng aingbv, kristo nyilu aingbvka ridunv vla lvkto. Soogv siti si Pwknvyarnv gv anyuaya nga kristo gvlo doonam lokv lvknv vdwv kairungbv mvngtung mvmbu kaama bv mvngnam am godung gvla ritoku. Ogumvnwng ngv Kristo gv paknam, erinpeelwk jinam, mvngnga jinam, anyuaya jinam, okv darwk monam lokv loung am kaapa lindunv.
Arwng lokv darlinnam
Mintamchonam (1:1-2)
Kristo okv Gvrja ngv (1:3-3:2)
Kristo gvlo anw nvbv turnam (4:1-6:20)
Minyungminya (6:21-24)
1
1 Paul lokv, Pwknvyarnv gv mvnglwknam Jisu kristo gv apostol akobv rinv—
Epesias lo doonv Pwknvyarnv gv nyi vdwa, oogv bunugv atubogv turnam am Jisu Kristonyi mvngjwng la akingobv rila doonv vdwa.
2 Ngonugv Pwknvyarnv Abu okv Ahtu Jisu kristo nonua anyuaya okv sarsopoyo nga jilwk gvi laka.
Kristo gvlo Dowjwklo boktalwknam
3 Ngonu Ahtu Jisu Kristo gv Abu Pwknvyarnvnyi umbonyikv vlaju! Holvgabv kristo gvlo ngonu akingobv rinam lvgabv Pwknvyarnv nyidomooku karv gv dowjwklo boktalwkji nama ngonua jilwkto.
4 Nyiamooku sum pwklinyarlin madvbv, Pwknvyarnv ninyigv lokv Kristo lo lvkingobv ridudakdu bv ngonua darlin chotoku, vkvlvgabv ngonu darwk dukubv okv ninyigv kaagia lo amurachv kuma dukubv ritoka.
Ogulvgavbolo ninyigv paknam lokv
5 Pwknvyarnv Jisu kristo gv lokv ngonua hv ninyigv umvuu bv mvdukubv mvngpwk lintoku—soogv si ninyigv mvngpu vrung okv ninyigv rungnam vrung.
6 Kaju ngonu Pwknvyarnv gv ninyigv yunglit alvbv anyuaya nam lvgabv hartv lajuka, ogulvgavbolo hv ninyigv paknam Kuunyilo akin am ngonua anyu amin bv jilwk toku!
7 Holvgabv Kristo gv oyi lokv ngonu ajarabi bv rimin dukunv, sibv vbvrinam lokv, ngonugv rimur am mvngnga jila ritoku. Pwknvyarnv gv anyuaya ngv vdwgo kai rungdu,
8 Hv ngonua vkvnv kairungnv kiinamhagnam go jilwkto!
Ninyigv mvngki laknv okv hingki laknv nvnv mvnwng nga dootak silwk mooto,
9 okv Pwknvyarnv ogugo riso mvngbvdw um hv ritoku, okv Kristo gv lokv ridubv mvngnam am umka hv ngonua chimu laka ritoku.
10 Svbv mvngnam si, vdwlo oogv pwknamyarnam dvdv nga Pwknvyarnv pwknyayarnya rikudw, dwv aaku bolo mvnwng nga laakumlaapa lakula, nyidomooku gv okv sichingmooku sokv ogumvnwng nga, Kristonyi dumpo bv ridubv vla mvtoku.
11 Ogumvnwng nga mvkuriku namsi Pwknvyarnv risv dvdv nga ridubv vla mvngnamv okv mvngpwk la rinamv; okv ogulvgavbolo Pwknvyarnv ninyigv atubogv nyi bv rimu tvla Kristo gv lvkobv akingobv ninyigv mvngnama ridubv vla ngonua gaktoku. Vbvrinam si hv kvlokvcho lokv ogugo riso mvngbvdw um ridukunv.
12 Vv kubolo, Kristo gvlo yvvbunu mvngtin sicho dudw, Pwknvyarnv gv yunglit nama kaju ngonu hartv laju.
13 Okv vdwlo nonuka soogv jvjvnv doin sum tvvpa kubvdw Pwknvyarnv gv nyi bv ritoku, alvnv yunying nga tvvku lokv nonu turnama paatoku. Nonu kristonyi mvngjwng toku, okv hv milvpvvnam darwknv dow am nonu gvlo jilwk kunam lokv atubogv gvbv nonua toprw toku.
14 Darwknv Dowv Pwknvyarnv gv ogugo ninyigv milvpvvnam am ngonu paare vla charpv pvjila rinv ngv, okv yvvdw Pwknvyarnv gvbv ridu kunvdw um ajarabi bv rimin dukubv tunyachika jireku vla Pwknvyarnv gv ngonua mvngging simu dubv minchar jinamv. Vkvlvgabv ninyigv yunglit kunam am kaju ngonu hartv lajuka!
Paul gv kumnam
15 Soogv lvgabv, nonugv Ahtu Jisu Kristonyi mvngjwng nama okv nonugv Pwknvyarnv gv nyi vdwa paknama kvvlo lokv ngo tvvpa choto,
16 Ngo nonu lvgabv Pwknvyarnvnyi hartvbamtv jinam am apak madunv. Ngoogv kumkulo nonua mvngpadunv
17 okv Pwknvyarnvnyi ngonugv Ahtu Jisu Kristo gv, kairungnv Abu, nonua Dow lo jitokv vla kumdunv, oogv nonua chinvgubv mvre okv Pwknvyarnvnyi kaatamre, vkvlvgavbolo nonu vdwv ninyia chindubv.
18 Ngo nonugv mongrumara ngv nyiktar tukula ninyigv loung nga kaapa ladu kubv vla kumdunv, vkvlvgavbolo oogv nonua goklin kunam gv mvngtin sinama oguvdw um chinsu reku, ninyigv nyi vdwa vkvgv milvpvvnam boktalwkjinam vv vdwgo kaasartabo bv nyitv moduku vla chinsu reku.
19 Okv yvvdw ninyia mvngjwng dudw ngonu mvngjwng nvgv aralo ninyigv jwkrwv vdwgo kairungbv kudungkua ritoku. Soogv ngonu gvlo kudungkua ridung dunv jwkrw si vbv kairungnv gwlwk am lvyin akindo,
20 oogv vdwlo hv kristo gvlo vbv kudungkua rito kudw ho sinam lokv ninyi turkur mooto kula okv nyidomooku lo ninyigv lakbik peelvlo doomu toku.
21 Aogv nyidomooku lo rigvnv dvdv nga, tujupkunam dvdv nga, jwkrw dvdv nga, okv atu dvdv nga Kristo rigvnvbv ritoku; hv nyiamooku sokv tujupkunam kaiyachokbv amin gvnv umka kaiyabv ka rigvnvnv ngv doodu okv nyiamooku so silu gvngv tikmabv aainvgv alu loka lvgabvka.
22 Pwknvyarnv ogumvnwng nga Kristo gv lvpa kampwk lo vvpv jidu okv gvrja gv ogumvnwng aka ninyia kaiyachoknv Ahtu bv rigv modubv jitoku.
23 Gvrja ngv Kristo gv awbv ridunv, ninyigv ripwngrinya namv, ogolojvka ninyi ogumvnwng nga ripwngrinya jidu kunv.