TESALONIAN
vdwa Paul gv Siti Jichonam
Mintamchonam
Tesalonika ngv kvvlo Roman mookugv Mesedonia gv pamtv kepitel bv ritoku. Paul hoka gvrja ako mvlin toku ninyigv Pilippi nga vngyuro kochingbv. Vbvridanam gula hoka Jius vdw gvlokv haachihaak namgo rilin toku, ogulvgavbolo Jiusmanv nyi vdwv Judaism lo dinchi-kochi bv rila rinvdaknv vdwa Paul Kristan gv doin ha japjila mvngdin mokunam lvkwngbv. Paul Tesalonika lo chara koola ikula okv Beri mookubv vngtoku. Koching ngaku, nw gv Korint lo vnglwk yikua nw ninyigv richam vdw gvlokv okv ninyigv kudungkua ribam kunam Timoti gvlokv Tesalonika gvrja gv yunyingsa nga tvvpala ritoku.
Paul gv Tesalonian vdwa siti Jichonam si hoka Kristan bv rinv nyi vdwa mintvmirula okv lvkodv bunua mvngjwnglo naadi lwkdukubv lvktoku. Nw bunu vdwgv mvngjwng okv pakmisinam gv yunying lvkwng nga hartv toku; nw bunua lvkobv ribam dakbam rilo oguaingbv ribv dakbv idw um bunua minpa jitoku, okv Kristo gv aakur kunamgv lvkwng nga gvrja lo tvukapak nama mirwk sila ritoku: Kristo gv aakur madvbv mvngjwngnv nyi hv siro koobolo, hum ninyigv aakur rikunyi nw ninyia turbwngnv singnam a paamu kunam gobv rirekudw? Okv vdwlo Kristo aakur rekudw? Kristo gv aakur svnga kayala doodula kudungkua rise nga risula dootoka vla Paul bunua mintoku.
Arwng lokv darlinnam
Mintamchonam (1:1)
Mvngpula hartvla minam (1:2-3:13)
Kristan gv ridung singdung nga tamsarnam (4:1-12)
Kristo gv aakur kuse gv lvkwng nga minam (4:13-5:11)
Minyabv tamsar kunam (5:12-22)
Minyakunam (5:23-28)
1
1 Paul, Sailas okv Timoti gvlokv Tesalonika lo Pwknvyarnv Abu okv Ahtu Jisu Kristo gvbv doonv gvrja nyi vdwa lvkdunv:
Aya ngvla sarsopoyo ngv nonu gvbv rilaka.
Tesalonian vdwgv mvngjwng kunam okv turnam
2 Ngonu nonu mvnwng gv lvkwnglo Pwknvyarnvnyi umbonyikv vdunv okv ngonu kumri gv dwkia nonua kumpa bwdunv.
3 Nonu gv mvngjwngla risarrima sunama, pakla raaitungtung bv kudungkua rinam ha, okv ngonugv Ahtu Jisu Kristonyi nonugv kwngkwng bv mvngtin nama ngonu Pwknvyarnv Abu gv kaagialo nonua mvngpa dunv.
4 Ngonugv achiboru vdwa, ngonu chindu Pwknvyarnv nonua pakdu okv ninyi gvbv nonua darpvku.
5 Ogulvgavbolo ngonu Alvnv Yunying nga nonu gvlo aagv toku, hv gaam nyumbv aama, vbvritola jwkrw okv Darwknv Dow lokv, okv so gv jvjv lo dwkdwk rungbv mvnglwk sunam lokv. Vdwlo ngonu nonugv rikulo ririlo ngonugv rinam daknam ha nonu chinsudo; ho ngonu rinam hv nonugv alvnam lvgabv ngonu ritoku.
6 Nonu ngonuala okv Ahtunyi kaagv sila rinv bv ripvku; Okv nonu maatarbv hiru kaaya hinlachin Darwknv Dow lokv mvngpula doin ha alvbv torwk sitoku.
7 Vkvlvgabv nonuno Mesedonia okv Akaia lo doonv mvngjwngnv mvnwng gv kaagv sinam gubv ripvku.
8 Ogulvgavbolo nonugv lokv Ahtu gv doin linv ngv Mesedonia okv Akaia lo dusit karmwngma, vbvritola nonugv Pwknvyarnvnyi mvngjwng ngv mooku mvnwnglo dupwng karpvku. Vbvrikunamv ngo ogu minseya kaama.
9 Ngonu nonua kaalwkla aari ho nonugv ngonua naarwk sunam gv lvkwng nga nyi mvnwngngv minyadu. Okv nonugv morti nga kayu tokula turnv Pwknvyarnvnyi kumdu kubv aaku nama bunu minyadu
10 okv ninyigv Kuunyilo nyidomooku tolo kongv aaji kunvnga kaaria dubv—ninyigv Kuunyilo Jisu, siku nvnga ninyigv turkur mokunam angv okv hv Pwknvyarnv gv haachi-haak aaji kunv loka ngonua ringyadu.