4
Fantag bé Amaéne
1 Ménkéntay i kébéréh i Rémogor i Tuluse bé wén moso i do étéw témérén munur bé toowe, brab waléy ro munur bé de tugién do rémogor brab de kétoro i de saitan.
2 I de ni do kétoro tidéw dob de témugi étéw do ubo-ubo ro saén munur bé Kristowe. Enda tete i de fédéw ro ké rémigo ro tete non éndaén gétiga roy fatute.
3 I de ni do étéw toroé roy énda kun fakay i mawage brab énda kun fakay i mamae bé de dumo anaén. Endob sedek lénimbag i Tulusey de amaén? I funay Tuluse léménimbag bé de amaén inok i betom do gétigan brab munur bé toowe kétoro mama tom de. Mélaw fakay tom mama bé de ni amaén amuk gilid tom démasal fésalamat dob Tuluse.
4 Fiyoy kéluhanay de éntingayén lénimbag i Tuluse. I kéluhanay de séségiyo-giyo do amaén fatut amaén tom amuk gilid tom démasal fésalamat dob Tuluse. Enda fatut ikaa tom i lénimbag i Tuluse.
5 Gétiga tom féfiyonéy Tulusey de amaé tom non bé kéfésalamat tome de, atin non been i niy kétoro i kébéréh i Tuluse de.
6 Toow go fiyo sugu-sugué Jesu Kristowe amuk toroé moy de ni dob de dumo mo munur bé Kristowe. Atin taus go minut waléy fiyo sugu-suguén bé kéféganad me bé Fiyowe Uret brab toowe kétoro nunuro mo.
7 Endob kago fégélingoén i de tutul énda médaitén uretén. Mika i Tuluse bé de ni non békén toow. Yamula fébagérém i kéunur me bé toowe kétoro inok rigoné moy kétayay Tuluse.
8-9 Wén i toowe kébéréh, fatut unuroy de étéw mano, “Fiyo ké fébagéré moy lowoh me. Endob toow na fiyo ké fébagéré moy kéunur me, non wén i lagaén dob de gai béleewe ni brab dob de gégumah do gai dob lawayo moso.”
10 Been i niy funa tome mégéror gémalbék, non sémarig tom bé méuyage Tulus, sani mémukase bé kéluhanay de étéw, brab tintuwe mémukas bé de étéw munur dob Beene.
11 Mélaw toroém i de ni brab suguém dob de étéw.
12 Atin kago fédayaén i de étéw énda fégadata ro beem non ménguwéd go séna. Yamula féfiyo moy kébéréh me brab adat me brab kégédaw me brab kéunur me brab kérigo muwe bé lowoh me, inok i de munur bé Kristowe iringé ro beem.
13 Atin tantu go basa bé Ménsulate Kébéréh i Tuluse dob adafay de étéw taman gégumahu diyaan. Atin toroém bero brab ureto mo bero.
14 Atin kago lifotén i kéfurunge niray i Tuluse beem amun ménbéréh i de sénarigoy Tuluse muret atin ténégéy de odoroy de munur i bumbuna muwe.
15 Tantu mo rigoy de ni inok i kéluhanay de étéw gito ro minut métintuy adat me rémigo bé kétayay Tuluse.
16 Ingata moy de rigoné mo brab de toroé mo. Non amuk taus go rémigo bé de ni, méfukas go bé de salaém brab méfukas soy de gégélingo beem.