12
1 Mek'vranang'a ğu İrxhınna yik'el qale'e.
Qiyğa pisın yiğbı qadımee, ğu eyhesın:
«Həşde yizın kef nişikecad ooqa qexhe deş».
2 Manke verığın, vazın,
xənebışin işix yiğnemee k'ətqəsın,
gyoğiyle qiyğa, meed buludbı sak'alas.
3 Man yiğ qadımee,
xaaka ilyaakanbışik zeze avkkas,
gucnanbı k'yooç'anasınbı,
giviyxəranbışisse co k'ılybava
suk giviyxəras vəəxəs deş,
g'uleppışile ilyaakanbışik'le
miç'axda g'aces.
4 G'aqa aaqan akkabı it'umeedxhesınbı,
yöxxəbışin sesbı k'ıl qeetxhes.
Ğu şit'yaaşine sesbışikar çikana muğur qıxhes,
mə'niybı qədəqqəne içeeşin k'ılda g'ayxhes.
5 Ğu manke axtıne cigabışile qəq'ənasda,
yəq əlyhəəsır qəq'ənasda.
Badamne yiven t'et' g'ayhe,
ts'irtyar yı'q' qeetxhes,
naps k'ıl qixhes.
Məxür insan cune gırgıne gahbışilyne xaaqa əlyhəə,
ak' avquynbı şahrabışeeqa k'yoohar.
6 Nuk'rayn baağar qudyodu,
k'ınəəğəyna kasa hidyapq'ır,
xhyan ı'lqəəne cigaysneedın
parç xüvə-xüvəna qıdexha,
kahrızılin çarx hidyatq'ur
ğu İrxhınna yik'el qale'e.
7 Manke nyuq'vneke hıiyn tan
nyuq'vnelqa sak'alas,
ı'mren nafasıd
yic huvuyne Allahısqa sak'alas.
8 Mə'əllimee eyhen:
– Q'əran vuççud deşin kar!
Gırgın ıxha-ayk'anne booğak akar vod!
Nekke qiyğiyn cuvab
9 Mə'əllim k'orana ək'elynana insan ıxha, mang'vee milletıs ats'aalid hele ıxha. Mang'vee geeb fıkır opxhun, geed ək'elikan kar qiyghın, geed misaalabı sı'ı, otk'un.
10 Mə'əllimıs micagın uvhiybı t'abal ha'as ıkkiykın. Mang'vee otk'uninbı qotkuda hək'eda vod.
11 K'orane ək'elynanbışe eyhenbı çobanna çümq xhinne, manbışe sı'iyn cuvabbıd it'umda ı'xiyn g'adaxbı xhinne vod. Man eyhen cuvabbı sa çobanee uvhuynbı vod.
12 Mançile ğayrı, dix, ğu inçilqa fıkır hevle: nimeen ıxhay kitabbı ok'anas eyxhe, geed qətqiynır insan ozarxhe ha'ana.
13 Həşde ğu nekke qiyğiyne cuvabıl k'ırı alixhxhe:
Allahıle qəq'ne, Mang'vee eyhen he'e.
İnsanee ts'etta ha'asın man vod.
14 Allahee gırgın işbı,
dyugulenın gırgın kar
– yugun ixheeyid, pisın ixheeyid –
məhkameençe alğahas.