3
Gırgınçiqa çina gah vob
1 Gırgınçiqa çina gah vob,
xəək avudne gırgıne karaqa çina gah vob.
2 Yedike ıxhayqab çina gah,
qik'uyqab çina gah.
Ezuyqab çina gah,
ezuyn hı'ttitxı'yqab çina gah.
3 Gyapt'ıyqab çina gah,
yug qav'uyqab çina gah.
Qottulıyqab çina gah,
ali'iyqab çina gah.
4 Gyaaşuyqab çina gah,
əqəna hı'iyqab çina gah.
Ak' avquyqab çina gah,
mık'ar hı'iyqab çina gah.
5 G'aye avhuyqab çina gah,
g'aye sav'uyqab çina gah.
Xüvə apk'iyqab çina gah,
xüvə idyapk'iyqab çina gah.
6 T'abal hav'uyqab çina gah,
aagval hav'uyqab çina gah.
Havaacıyqab çina gah,
dağetçuyqab çina gah.
7 Qıtt'axı'iyqab çina gah,
man iyxhuyqab çina gah.
Ghal sı'iyqab çina gah,
yuşan hı'iyqab çina gah.
8 Vukkiykıniyqab çina gah,
g'umooce qepxhayqab çina gah.
Dəv'əyqab çina gah,
sülyhuqab çina gah vob.
9 Qorxu kar ha'ang'us mançike hucoona hiyxhar?
10 Zak'le Allahee man yı'q'ı'n işbı insanaaşine gardanaqa gixhxhı g'acu.
11 Allahee gırgın kar micagda çine gahıl hı'ı. Mang'vee insanne yik'eeqa ç'əv dyooxhene gahıne hək'ee atçu. İnsanılqad Allahee hı'iyn kar q'omançe-k'anyaqqamee hiyxhar deş.
12 Zalqa hitxhıriyn, insannemee şadra ıxha ı'mı'rvolle ı'mı'rıke kef qığavhuyle yugun kar deşin.
13 Şavaayiy otxhanançike, ulyoğançike, qorxuyke kef qığayhee, mana Allahna pay vobna.
14 Zalqa hitxhıriyn, Allahee hav'una iş gırgıne gahbışisda vobna. Mançik vuççudud hexxa'as eyxhe deş, mançike vuççudud g'ats'ak'vanas eyxhe deş. Allahee məxüd ha'a, insanarıb Cule qəvəyq'ənanbı.
15 Həşde hucooyiy vod,
şenked ıxhayn,
hucooyiy ixhesıd,
avaalad ıxhayn.
Allahee şenke ıxhaynçin
hı'sab qeqqas.
Gırgınbı nyuq'vnelqa savk'alas
16 Xəək avud zak'le inıd g'acuyn:
Qotkune məhkamayne cigee horbı,
qopkuvaline cigeeyib pisvalla.
17 Zı zak'lecad uvhuyn:
«Allahee qorkung'unud,
pisıng'unud məhkama alğahas.
Mang'vee gırgıne karas,
gırgıne işis çina gah gyuvxhu».
18 Zı zak'lecad uvhuyn: «Allahee insanar siliys üvxiyxə, co həyvanaaşik akaraba vuxhay g'avcecenva».
19 Həyvanne vuk'lelqa qaylen insanned vuk'lelqa qaylen. Həyvanıb, insanır qek'ana. Həyvanınıd, insaneeyid sa nafas ileşşe. İnsan həyvanıle ooqana deş vor. Man gırgın q'əran vuççud deşin kar vodun.
20 İnbıb, şenbıd
çine cigeeqa siyk'al:
inbıb, şenbıd
nyuq'vnekenbı vod,
nyuq'vnelqad sak'alasınbı.
21 Şavuk'lene ats'a, insanaaşin rı'h xəəqə ılqeç'emme deşme, həyvanaaşinıd rı'h avqa, nyuq'vneeqa əlyhəə ıxhay?
22 Zak'le g'acuyn, insanısqa vucee haa'ana iş yugba qööxhee, mang'unemee mançile yugun kar deşin. I'mreke mang'us axuyn man vod. Şavusse mang'uk'le cule qiyğa eyxhenbı hagvas əxəye?