21
I'sa telebabışisqa golyune k'aneqa arayle
1 Sabara gahıle I'sa Tiberiyayne (Galileyne) golyune k'aneqa meer telebabışisqa arayle. Man inəxüd ıxha:
2 Şimon-Pyotur, Q'ömkale donana Tomas, Galileyayne Kana xiveençena Natanael, Zavdayn dixbıyiy I'sayna q'öyre merna teleba sacigeeqa savayle.
3 Şimon-Pyoturee manbışik'le eyhen:
– Zı baluğ aqqas ı'qqə.
Mansanbışed mang'uk'le eyhen:
– Şinab vaka vüqqə.
Manbıb apk'ın, sanab lotk'eeqa giviy'ar. Mane xəmde manbışisse vuççud aqqas əxə deş.
4 Çakra miç'eer I'sa golyune mıglek ulyorzul eyxhe, telebabışik'leme Mana I'sa ıxhay ats'axhxhe deş.
5 I'see manbışik'le eyhen:
– Uşaxar, oxhanasın hucoomecad aqqıyne?
Mang'us alidghıniy qele:
– De'eş.
6 I'see meed eyhen:
– Tor lotk'ayne sağne surale k'eçvee, aqqasın.
Manbışed tor k'yadaççen. Toreeqa manimeen baluğ qadayle, manbışisse yı'q'valike tor qığaççes dəxə aaxva.
7 Manke I'says geer ıkkanne telebee Pyoturuk'le eyhen:
– İna yişda Xərna vor.
Şimon-Pyoturuk'le mana yişda Xərna ıxhay g'ayxhımee, mang'vee nootsacad tanale g'ayşuyn tanalinbı culqa alitk'ır, xhineeqa ayhe.
8 Mansa telebabımee, mang'uqab qihna lotk'eecab baluğnan torud hadağva qabayle. Manbı geeb əq'əna apk'ın vuxha deş, q'öd vəş (200) xılekkumnacab xhineeqa ikkeepç'ı vuxha.
9 Manbı lotk'eençe qığeepç'ımee, maa'ad gyotxhanan ts'a, çilqa gixhxhiyn baluğiy çine k'anedın gıney g'ece.
10 I'see manbışik'le eyhen:
– Həşde şu aqqıyne baluğaaşike qale.
11 Şimon-Pyotur lotk'eeqa ılqeç'u, vəşşe xhots'ale xhebılle (153) xədın baluğnan tor ts'ıts'ı'ı, golyune mıgleqqa qadayle. Baluğar geed ıxheeyid, tor qıt'axxa deş.
12 I'see manbışik'le eyhen:
– Qudoora, miç'eediyn otxhuniy oxhne.
Telebabışde neng'veecad «Ğu vuşuneva?» qiyghanas yik' ha'a deşdiy. Manbışik'le Mana yişda Xərna ıxhay ats'anniy.
13 I'sa k'anyaqa qarı, manbışis gıneyiy baluğ hele.
14 I'sa üç'ür qıxhayle qiyğa, xhebır'es telebabışisqa arayle.
I'sayna Pyoturukana gaf
15 Miç'eediyne otxhuniyle qiyğa, I'see Şimon-Pyoturuk'le eyhen:
– Yuhanna dix Şimon, vas Zı, manbışis Zı ıkkanançile, geerne ıkkan?
Pyoturee Mang'uk'le eyhen:
– Ho'o, yizda Xərna, Vak'lecad zas Ğu ıkkiykıniy ats'an.
I'see mang'uk'le eyhen:
– Hark'ın, Yizın urgbı uxhiyxhne.
16 Q'öd'es meed Pyoturuk'le eyhen:
– Yuhanna dix Şimon, vas Zı ıkkannane?
Mang'veeyid I'sayk'le eyhen:
– Ho'o, yizda Xərna, Vak'le zas Ğu ıkkiykıniy ats'an.
I'see mang'uk'le eyhen:
– Yizde vəq'əbışda hee'e.
17 Xhebıd'es Pyoturuk'le eyhen:
– Yuhanna dix Şimon, vas Zı ıkkannane?
Pyoturee xhebıd'es I'see cuke «Zı ıkkannaneva?» qiyghıniys aq'va qı'ı, Mang'uk'le eyhen:
– Yizda Xərna, Vak'le gırgın ats'an, zas Ğu ıkkiykıniyid ats'an.
I'see mang'uk'le eyhen:
– Hark'ın, Yizın vəq'əbı uxhiyxhne.
18 Zı vak'le hək'en eyhe, ğu mek'vranang'a ğucad valqa tanalinbı ali'ı, vas ıkkanne cigeeqa hayk'annaniy. Q'əs qıxhameeme, ğu xıleppı hotk'es, merıng'veeyid valqa tanalinbı alya'as, vas dekkanecar cigeeqa ıkkees.
19 Məxüd Mang'vee Pyotur nəxüriy qik'asva, cune qik'uykar mang'vee nəxüriy Allah axtı qa'asva eyhe ıxha. Manıd uvhuyle qiyğa, Mang'vee Pyoturuk'le eyhen:
– Zaqar qihna qora.
20 Pyotur yı'q'əlqa ilyakkımee, I'says geer ıkkanna teleba coqar qihna qöö g'ece. Exhaliyn kar otxhanang'a I'says inekke k'ane g'alirxhu «Yizda Xərna, Ğu merıng'une xılyaqa qelesda insan vuşuneva?» qiyghınna teleba mana ıxha.
21 Pyoturuk'le mana teleba g'acu, I'sayk'le eyhen:
– Yizda Xərna, mang'uk hucoona ixhes?
22 I'see mang'uk'le eyhen:
– Zı qalesmee mang'un üç'ürra axuy Zas ıkkiykıninxhiy, mançike vas hucoona? Ğu Zaqar qihna qora.
23 Mana gaf vuxhayle qiyğa, telebabışde yı'q'nee mana teleba qik'as deşva gaf gyooxha. I'see mana qik'as deşva uvhu deşdiy. Mang'vee saccu «Zı qalesmee mang'un üç'ürra axuy Zas ıkkiykıninxhiy, mançike vas hucoonevaniy?» uvhu.
24 Manbı otk'unna mana teleba vor. İn karbı ıxhavad şahaadat mang'vee hav'u. Şak'led ats'an mang'una şahaadat hək'ena vob.
25 I'see hı'iyn geed medın karbıd vodunbı. Yizde uvhuyn, Mang'vee hı'iynmeen gırgın karbı sassadna otk'uniynxhiy, otk'uniynmeen kitabbı ine dyunyeeqa oharas deşdiy.