Malakiya peyğambarın kitab
Malakiyayn do «Zı g'axuvuna, Yizda malaaik» eyhen vodun. Mang'vee man kitab yişde eerayle ögil xhod'esde asiree otk'unva vod eyhe. Man peyğambaraaşine kitabbışin nekke qiyğa otk'unin vodun.
İzrailyne milletıken sabarabı mane gahılqasse Baabilğançe g'attipxhın sapk'ıl qabı vooxhe. Manbışe İyerusalimeedın Allahın xav meed q'omançe alya'an. Manbışe Allahın xav meed ale'eeyid, Allahne yəqqı'n əlyhəə vuxha deş. Manbışe Allahıs ı'bəədat yik'eençe deş ha'a ıxha. Manbı Allahne Q'aanunuka gyuv'ur-oza qeebaxhe vuxha deş. Manbışe cos nenniy ıkkan manıd ha'a ıxha.
Malakiya peyğambarıs Allahne xənne mühübne hək'ee insanaaşis yik'el qalya'as ıkkiykın. Mang'us ıkkan ıxha, insanaaşe Allahıka hav'uyne mugaavileys sik'ı ı'mı'r he'ecen. Malakiya peyğambaree eyhe ıxha, Allahee g'axuvuna qalesda. Mang'vee Rəbbis yəq qaa'as. İncilyne kitabee, məxüd I'sa Masixhıle ögil qarıyne xhineeqa k'yooq'ane Yəhyeyne hək'ee otk'un.
1
1 Rəbbee Cun cuvab İzraililqa, Malakiya peyğambarıle ğana hixhar ha'a.
Rəbbee Yaaq'ub g'əyxı', Esavmee Cuke əq'əna qı'ı
2 Rəbbee «Zas şu vukkiykıninbıva» eyhe.
Şossemee «Şi nəxübne vukkiykınva?» qiyghanas əxə.
Rəbbeeyid inva eyhe:
– Nya'a, Esav Yaaq'ubna çoc dişdiy vor?
Zımee, Yaaq'ub ıkkanaalin şu, cuke g'abıynbı, g'əvxü,
3 Esaviy mang'uke g'abıynbımee, Zı əq'əna qav'u.
Zı manbı vooxhen suvabı q'əra qa'as hassır,
manbışde doyulin cigabı çaq'alaaşis huvu.
4 Edom vooxhene, Esavıke g'abıynbışisse eyhes əxə:
– Şakın ıxheeyid,
şi meed man hatq'ur-hiyxürin cigabı qa'asınbıcad.
Saccu Xəəne G'oşunbışde Rəbbee inva vod eyhe:
– Hasre, manbışe ale'ecencad,
Zımee meed hı'ğəkkar ha'asın.
Gırgıne gahbışil
manbışde ölkayk'le g'ulyopt'ulna ölkava eyhes,
coyub Rəbbina qəl avquyn millet xhinne qıvaats'as.
5 Şok'le man vuşdecad uleppışika g'acumee,
şucad eyhes: «İzrailiked şaqana, Rəbbin do axtıda vod!»
Rəbbis dekkanan q'urbanbı
6 Xəəne G'oşunbışde Rəbbee eyhen:
– Ay Yizın do qizar hidya'an kaahinar!
Duxee dekkıs,
g'uleeyib cune iyesiys hı'rmat giviyxhe.
Zı Dekxheene, nyavxha şu Zas giviyxhena hı'rmat?
Zı İyesiyxhee meeb nyavxha şu Zas giviyxhena hı'rmat?
Şosse «Nəxüdne şi Yiğın do qizar hidi'ıva?» qiyghanas əxə.
7 – Şu Yizde q'urbanbı allya'ane cigalqa
kara idyalesın Zasın otxhuniy adı giyxhe.
Mançikad, «Şi Vas dekkanan nəxüdne ha'ava?» qiyghan.
Şu Rəbbin q'urbanbı allya'an ciga qizar hidi'ı,
məxüd Mang'us dekkanan ha'a.
8 Şu bı'rq'ı'n həyvanar q'urbanna alli'iy
yugunne vod?
K'aana, vuk'arna həyvan q'urbanna ablyav'uy
nya'a yugunne vod?
Məxbına sa həyvan yiğne ölkayne xərıng'us hevle,
ilekke mang'us ğu ikkiykanaseeva,
mang'vee yiğna haa'asee?
Məxüd Xəəne G'oşunbışde Rəbbee eyhe!
9 Həşde Allahıs düə hee'e,
Mang'vee şos rəhı'm hee'ecen.
Şu məxdın q'urbanbı allya'amee,
Mana şoqa yugra eyxheye?
Məxüd Xəəne G'oşunbışde Rəbbee eyhe!
10 Vuşde sang'vee, Yizde q'urbanbı allya'ane cigee,
q'ərane cigeeqa ts'a gyoxhxhan ha'asse,
Yizde xaan akkabıcad qı'iynxhiy yugda eyxheyiy!
Yizın yik' şoka gyotxhan deş,
şu allya'an q'urbanbıd alyaat'as deş!
Məxüd Xəəne G'oşunbışde Rəbbee eyhe!
11 Verığ ılqəəne cigeençe, k'yooçene cigeeqamee,
Yizın do milletbışde yı'q'nee axtıda vod!
Gırgınəəng'ə Yizde doyule ətirbı gyoxhxhan ha'a,
məttın paybı adayle!
Man Yizın do milletbışde yı'q'nee,
axtıda ıxhayke ha'a!
Məxüd Xəəne G'oşunbışde Rəbbee eyhe!
12 Şumee, «Rəbbine q'urbanbı allya'ane cigaylin otxhuniy muq'addasın deş vod,
man qizar hide'eeyid eyxheva» uvhu,
mançina muq'addasiyvalla avaak'an haa'a.
13 Ooğançe «İnimeena əq'übavad!» uvhu,
şu mançilqa yı'q' sak'al ha'a!
Məxüd Xəybışde Xərıng'vee Rəbbee eyhe!
Şu Zas q'urbanna ablyaa'asva
q'ööq'üna, k'aana, vuk'arna həyvan abeene,
Zı mana şoke alyabat'aye?
Məxüd Rəbbee eyhe!
14 Syuruneençe g'apsırne yugne g'argıne cigee,
Xudaavandays q'ı'bı'lyna həyvan abıyne horalays bed-düə vuxhena!
Zı inekke xərna Paççahva,
gırgıne milletbışe Yizın do axtı qa'a!
Məxüd Xəəne G'oşunbışde Rəbbee eyhe!