8
I'see ı'xnabışe gyatsts'ına insan yug qa'a
1 I'sa suvayle giç'umee, Mang'uqab qihna geeb insanar qavayle.
2 Maa'ar Mang'usqa maşnane ı'xnabışe gyatsts'ına sa insan qıxha: «Yizda Xərna, Vas zı məttı qa'as ıkkiykınee, əxəsdava» uvhu Mang'us k'yoyzarna.
3 I'see xıl hotku mang'uk set'u eyhen:
– Ho'o, Zas ıkkanan, məttı qıxhe!
Mana insan mankecar məttı qexhena.
4 I'see mang'uk'le eyhen:
– Nyaggah neng'uk'lecad vuççud immeyhe. Ğunar kaahinısqa hak'ne mang'uk'le ğu hagve. Qiyğab Mısee uvhuyn xhinne q'urban ablee'e. Məxüd yiğın yug qıxhay insanaaşik'le g'acesın.
I'see vəşıng'une k'omandirna nukar yug qa'a
5 I'sa Kefernahumqa arımee, Mang'usqa vəşıng'una k'omandir qıxha, miz k'yaa'a:
6 – Yizda Xərna, yizde nukarıs paralic ı'xı' xaa g'alirxhu vor, mang'vee xəppa əq'üba opxhan.
7 I'see mang'uk'le eyhen:
– Zı arı mana yug qa'asda.
8 Vəşıng'une k'omandiree Mang'une cuvabıs eyhen:
– Yizda Xərna, zı Vak avaak'ına deş vor, Ğu yizde akkalqa ayres. Ğu sa cuvabcad uvhee, yizda nukar qixhesda.
9 Zaqa ç'ak'ınbıb vobunbı, yizdeb xılek avub eskerar vob. Zı manbışde sang'uk'le «Hoorava!» uvhee, mana əlyhəəsda, mansang'uk'led «Qorava!» uvhee, manar qalesda, nukarık'le «İn he'eva!» uvhee mang'veeyid ha'asın.
10 Mang'une cuvabıle I'sa mattexhena. Mang'vee Cuqad qihna q'ööne milletık'le eyhen:
– Zı şok'le hək'eda eyhe, Zak'le İzrailee məxdın xədın inyam neng'uqacad g'acu deş.
11 Zı şok'le eyhen, Xəybışeene Paççahiyvalleeqa şargıleyiy garbıle menne milletbışinbı geebbı ables. Manbı İbrıhımıka, I'saq'ıka, Yaaq'ubuka sa sufranıl savaales.
12 Co ine Paççahiyvalinbıva eyhenbımee ine Paççahiayvaleençe miç'axne cigeeqa dağaa'as. Mançe geşşuybıyiy ık'arıke silibı sana-sançil qadaxan ses qöö ixhes.
13 Qiyğa I'see vəşıng'une k'omandirık'le eyhen:
– Hoora! Yiğne inyamıs sik'ı vas heles.
Mang'una nukar mankecar yug qexhena.
I'see geeb insanar yug qaa'a
14 I'sa Pyoturne xaaqa arımee, mang'una abay g'ızdırmayn gyorxhan tyulee g'eece.
15 I'sa məng'ı'ne xılek set'umee, g'ızdırma avayk'anna. Mana siğeetsu, Mang'us sufra qa'a.
16 Exha qıxhameeyid I'saysqa cinaaşe avquyn geeb insanar abayle. Mang'vee cuvabıka cinaarıd qığa'anbı, vuk'aranbıb yug qaa'anbı.
17 Məxüd Yeşaya peyğambaree otk'unin xhinne eyxhe:
«Mang'vee yişin ık'arbı ts'ıts'ı'ı,
Yişin ç'irvallabı Culqa alyaat'u».
I'sayna yəq avquynbı
18 I'sayk'le Cune hiqiy-alla geed millet sadı g'acumee, Mang'vee Cune telebabışik'le golyune şene suralqa ılğeepç'eva eyhe.
19 Maa'ar Mang'usqa Q'aanunne mə'əllimaaşina sa qıxha eyhen:
– Mə'əllim, Ğu nyaqa ark'ınee, zı Vaqar qihna qales.
20 I'see mang'uk'le eyhen:
– Süvəbışiqad, xəə'əd ileedaxvane şit'yaaşiqad akvaa vodun. İnsanne Duxayqamee vuk'ul apçesınıd ciga deşin.
21 I'sayne sa menne telebee I'sayk'le eyhen:
– Yizda Xərna, hasre zı ts'erra hark'ın dek k'eyxhas.
22 I'see mang'uk'le eyhen:
– Zaqa qihna qora. Havaasre hapt'ıynbışecab con hapt'ıynbı k'evxhecen.
I'see goleena t'ufan ulyoozar haa'a
23 I'sa lotk'eeqa gyu'urmee, Mang'un telebabı Cuqab qihna qavayle.
24 Sayangaba golee xəbna t'ufan g'ooxa, mançin hı'iyne mırtbışin lotk'a gyayts'en. Mane gahıl I'sa g'alirxhu eyxhe.
25 Telebabı Mang'usqa qeepxha Mana muğur qı'ı eyhen:
– Yişda Xərna, şakın eyxhe vod, şi g'attivxhan hee'e!
26 I'see manbışik'le eyhen:
– İnyam k'ıldananbı, nya'a şu qəvəyq'ən?
Mana oza qıxha t'ufanık'leyiy mırtbışik'le «İleezreva!» eyhe. Manbıd ileezaranbı.
27 Mançile telebabı mattepxha eyhen:
– Mana nəxrına İnsanne? T'ufanınıd, mırtbışinıd Mang'vee uvhuyn ha'a?
I'see q'öyre cinaaşe aqqına yug qa'a
28 I'sa golyune şene aq'valqa ılğeç'u, Gadarbışde cigabışeeqa qarımee, maane mağarabışeene nyaq'vbışeençe, q'öyre cinaaşe aqqına insan Mang'une ögiylqa qarayle. Manbışiqa məhbına qəl vuxha, insanar qəpq'ı'niyvalin mane yəqqı'le ı'lğəə vuxha deş.
29 Manbışe ts'ir üvxü eyhen:
– Allahna Dix, Vas şake hucoone ıkkan? Ğu şas əq'üba hevlesne, gah hidipxhırcar qarı?
30 Manbışike sık'ılda şaqana vokbışin turuğ uxhiyxhan eyxhe.
31 Cinaaşe I'says miz k'yaa'a vuxha:
– Ğu şi qığa'asxhee, vokbışde turuğeeqa g'e'eepşe.
32 I'see mançik'le «Hiderava!» eyhe. Manbıd insanaaşine adğançe qığeeç'u, vokbışde turuğeeqa ayk'an. Vokbışin turuğcad ganzıle goleeqa ayhe, mançina sacab üç'übba aaxva deş.
33 Vokbı uxhiyxhan ha'anbı hepxı şahareeqa qabı, cinaaşe avq'uyne insanaaşine vuk'lelqa qadıyn gırgın yuşan ha'an.
34 Mançile qiyğa şaharın cəmə'ətcad I'sayne ögiylqa qığeç'u, Mang'uk'le eyhen:
– Hucoone ixhes, yişde cigabışeençe qığeç'e.