16
Qorax Mısalqa ı'qqə
1 Leviyne nasıleençe, Qohatna neva eyxhena İsharna dix Qorax yik' hı'ı Mısalqa arayle. Mang'uka sacigee Ruvenne nasıleençe Eliavın dixbı Datanıyiy Aviram, Peletna dix On arayle.
2 Manbışika sacigee İzrailybışkecab g'əvxı'yn q'öd vəşşe xhots'al (250) doyukan, ç'ak'ınbı havayk'an.
3 Manbı sacigeeqa sabı Mısayk'leyiy Harunuk'le eyhen:
– Vuşun ç'əv! Milletıken gırgınbıcab muq'addasınbı vob, Rəbb manbışde yı'q'neyir eyxhena. Nya'a, şucab şu Rəbbine milletıke ooqanbı haa'a?
4 Man eyhenbı g'ayxhı Mısa aq'vakkena ç'iyelqa gizerçu, Allahıs düə haa'a.
5 Mang'vee Qoraxık'leyiy mang'une gırgıne hambazaaşik'le eyhen:
– G'iyqa miç'eed vuşuyiy Cuna eyxheva, nenayiy muq'addasnava, neng'usseyiy Cusqa qixhes əxəva Rəbbee Vucecad hagvasın. Vuşuyiy Mang'vee g'əyxı', mang'usser Cusqa qixhes əxəsda.
6 Qorax, ğunay yiğne gırgıne hambazaaşe in eyhen he'e: ətirbı gyoxhxhana'asın g'abbı alyaat'u,
7 g'iyqa mançine aqa gyopxhanna ghadır gyuvxhu, qiyğad mançilqa Rəbbine ögiyl ətirbı gixhxhe. Məxür Rəbbee Vucee, vuşiyiy muq'addasna hagvasda. Leviyke g'abıynbı, şu hı'iynbı ç'əv!
8 Mısee Qoraxık'le meed eyhen:
– Leviyke g'abıynbı, zal yugda k'ırı gyaqqe!
9 Nya'a, şos ç'əv dişee? İzrailyne Allahee şu İzrailybışike curav'iy, Cus k'ane qav'iy, Cune Rəbbine çadırısneedın gırgın işbı vuşde xılyaqa quviy. Şu məxüb milletıs gullux haa'a.
10 Mang'vee şunab, vuşda gırgına Leviyna nasılıb Cus k'ane qav'u. Şos man k'ıldanan xhinne, ooğançe, ho'ıne şos kaahinaaşin ç'ak'ınbıbne vuxhes vukkan?
11 Qorax, ğunay yiğın hambazar Rəbbilqa vobde g'elil qeepxha hı'nəxüb sabı. Nya'a, Harun vuşune vor şu mang'ulena haa'a?
12 Mısee Eliavın dixbı, Dataniy Aviram, qoot'al. Manbışe eyhen:
– Deş vüqqə!
13 Ğu şi sahree gyapt'asva nyakiy itv gyodatsene cigabışeençe qığav'u. Vas man ç'əv dexha, deşxhee, yişda xərnarne ixhes ıkkan?
14 Mançile ğayrı ğu şi nyakiy itv gyodatstsene cigabışeeqa qabı deş, çolbıyiy t'ımılen bağbı huvu deş. Deşxhee, vak'le man insanar bı'rq'ı'bavane ats'a? Deş vüqqə!
15 Mısa it'umra qəllamişxha Rəbbik'le eyhen:
– Manbışe helen ılymaat'a. Zı manbışike əməleb alyapt'ı deş, neng'uscadıd pisın hı'ı deş.
16 Mısee Qoraxık'le eyhen:
– G'iyqa ğu yiğne gırgıne hambazaaşika arı Rəbbine ögiyl ulyozre, maa'ar ğunar, hambazarıb, Harunur ixhecen.
17 Vuşde gırgıng'vee, vuşun ətirbı gyoxhxhan ha'an g'abbı alyaat'u, caqa ətirbı gixhxhe. Qiyğa q'öd vəşşe xhots'alyne (250) insanne gırgıngvee manbı Rəbbine ögiylqa allecen. Ğunad Haruneeyid vuşun ətirbı gyoxhxhan ha'an g'abbı alle.
18 Gırgıng'vee con ətirbı gyoxhxhan ha'an g'abbı alyaat'u caqa gyopxhanna ghadıriy ətir givxhu, Mısaykayiy Harunuka sacigee Rəbbika yuşan ha'ane çadırene ghalee ulyoozar.
19 Qoraxee Mısalqayiy Harunulqava gırgın cəmə'ət çadırene ghalee sı'ımee, Rəbbin Nur milletıs gyaagva.
20 Rəbbee Mısayk'leyiy Harunuk'le eyhen:
21 – Mane milletıke əq'əna qeepxhe, Zı manbı sa manzilee gyapt'as.
22 Man g'ayxhı Mısayiy Harun aq'vakkena ç'iyelqa gizepçi eyhen:
– Gırgıne üç'üdunçıs ı'mı'r hoolena Ğu vorna Allah! Hucoone ixhes, sang'vee bınah hav'uva, Ğu gırgıne cəmə'ətılqacab qəl hımaa'a!
Qoraxıs, Datanıs, Aviramıs cazaa hoole
23 Rəbbee Mısayk'le eyhen:
24 – Milletık'le eyhe: Qorax, Datan, Aviram aaxvane cigabışisse əq'əna qeepxhe!
25 Mısa suğots'u Datanısqayiy Aviramısqava ayk'an. İzrailin ağsaqqalarıb Mısayqab qihna avayk'an.
26 Mısee milletılqa xabar g'uxoole:
– Man pisın insanar aaxvane çadırbışisse əq'əna qeepxhe. Manbışde nişikcab sumot'a, deşxhee, şunab manbışde bınahbışil-alla hapt'as.
27 Gırgınbı Qorax, Datan, Aviram aaxvane çadırbışisse əq'əna qeebaxhe. Dataniy Aviram cone xhunaşşeşika, dixbışika, k'ınne uşaxaaşika qığeepç'ı, çadırene ghalee ulyoozar.
28 Mısee eyhen:
– İn gırgın karbı zı zaled alqana deş, Rəbbe uvhu hı'ıva şok'le inçike ats'axhxhes:
29 man insanar avxuyn gırgın insanar xhinne hapt'eene, manbışde vuk'lelqa qadiynbıd menne insanaaşine vuk'lelqa qadıynçik akarada ıxheene, şok'le ats'axhxhe zı Rəbbee deş g'axuvu.
30 Rəbbee sa medın həşdilqamee g'ıdecuyn kar he'eene, ç'iyeyn ghal aaqı manbı cone karaka höbğeene, manbı şene dyunyelqa üç'übba apk'ıneene, manbı Rəbbis əsi vuxhava şok'le ats'axhxhesın.
31 Man gırgın Mısee yuşan hı'ı ç'əvxhamee, ç'iye q'öne cigeeqa qexhe.
32 Ç'iyeyn ghal aaqı coyub, con xizanbıd, Qoraxın hambazarıb, con gırgın karıd höğən.
33 Manbı cone gırgıne karaka ahaleeqa üç'übba avayk'an. Ç'iye manbışil oo it'umexhen, manbı milletne əreençe avayk'ananbı.
34 Manbışde hiqiy-alla ulyobzurne İzrailybışik'le manbışin ts'irbı g'ayxhı, «Ç'iyeyn şinab hümööğəcenva!» uvhu heebaxanbı.
35 Rəbbee ts'a g'axuvu q'öd vəşşe xhots'al (250) ətirbı adına insan gyoyxhan ha'ana.
36 Rəbbee Mısayk'le eyhen:
37 – İlahiyetçiy Harunne duxayk'le Eliazarık'le eyhe, ətirbı gyoxhxhan ha'an g'abbı gyopxhunne insanaaşile aleet'ecen. Ətirbı gyooxhan ha'an g'abbı muq'addasınbı ıxhal-alla ğu manbı se'e. Qiyğa caana ghadır dağe'e.
38 Manbı bınahbı hı'iynbışin ətirbı gyoxhxhan ha'an g'abbı vod. Manbı cone bınahbışil-alla habat'a. Man ətirbı gyooxhan haa'an g'abbı k'etu k'üvə, qotku qe'e, manbı q'urbanbı allya'ane cigalqa gyuvaxanasınbı xhinne qe'e. Man g'abbı Rəbbis adıl-alla manbı muq'addasınbı vod. Hasre man İzrailybışdemee işaarat ixhecen.
39-40 Gyooxhan hav'uyne insanaaşe adıyn yezake hı'iyn man g'abbı, kaahin Eliazaree Rəbbee Mısayk'le uvhuyn xhinne, alyaat'u yugda k'etu, qotku qı'ı, q'urbanbı allya'ane cigeeqa gyıvaxanasınbı xhinne qa'a. Harunuke g'abıynbışile ğayrı menne şavacad Rəbbine ögiyl arı ətirbı gyoxhxhan hıma'acenva məxüd ha'a. Man İzrailybışe yugda yik'el aqqecenva, Qoraxıkiy cune hambazaaşik qitxhuyn divan mebınbışik mexhecenva ha'a.
Rəbbina qəl
41 Qinne yiğıl İzrailyne cəmə'ətıncab Mısaylenayiy Harunulena haa'a vuxha. Manbışe «Şu Rəbbin millet gik'uva» eyhe ıxha.
42 Millet sadı Mısalqayiy Harunulqa ı'qqəmee, Rəbbika yuşan ha'ane çadırısnee manbışik'le buludun çadır avqu g'ooce. Mançe manbışis Rəbbin Nur gyaagva.
43 Mısayiy Harunub çadırısqa qavayle.
44 Rəbbee Mısayk'le eyhen:
45 – Mane milletıke əq'əna qeepxhe, Zı manbı sa manzilee gyapt'as.
Man g'ayxhı Mısayiy Harun aq'vakkena ç'iyelqa dizyabatçe.
46 Mısee Harunuk'le eyhen:
– Yiğın ətirbı gyoxhxhan ha'an g'ab aleet'e, caqa q'urbanbı allya'ane cigeençe gyopxhanna ghadır alyapt'ı gyuvxhe, qiyğad çilqad ətirbı gixhxhe. Manbıd alyaat'u milletısqa g'adaxvne, manbışda bınah hooğle. Rəbb it'umra qəllamişxha, milletılqa haptasın xhinnen yı'q'ı'n ık'ar g'axuvu.
47 Harunee Mısee uvhuyn xhinne ha'a, ətirbı gyoxhxhan ha'an g'ab alyat'u milletısqa g'adayxhvan. Maa'ab insanar habat'a gibğıl vooxhe. Mang'vee vucee adiyn ətirbı gyopxhanne ghadırelqa gixhxhı, məxüb milletna bınah hooğalna.
48 Harun hapt'ınbışdeyiy üç'übınbışde yı'q'nee ulyorzuling'a ık'arbı ç'əveetxhaynbı.
49 Qoraxıl-alla hapt'ıynbışile ğayrı, yıts'ıyoq'vad aazıriy yighıd vəş (14700) insan mane ı'k'arbışike qek'a.
50 Man ı'k'arbı ç'əveetxhava, Harun siyk'alna Rəbbine çadırısqa, Mısayne k'anyaqa.