20
Mıseeyiy Harunee hav'una bınah
1 Ts'eppiyne vuza gırgın İzrailybı Tsinne sahreeqa qabı, Qadişee ulyoozar. Maa Mayram qeek'ana, maayir k'eyxhına.
2 İzrailyne cəmə'ətıqa ulyoğasın xhyan eyxhe deş, mançil-allad cəmə'ət Mısayneyiy Harunne hiqiy-alla sadı, manbışik'le cuvabbı eyhe ıxha.
3 Cəmə'ətın manbı t'yats'axala'amee eyhe ıxha:
– Yişin çocar habat'amee, şinab hapt'ınbıxhiy nimee yugda eyxheyiy!
4 Nişisne şu Rəbbin cəmə'ət ine sahreeqa qadı? Şinab yişin həyvanarıd hatt'ecenvane?
5 Nişisne şi Misirğançe qığav'u ine pisde cigeeqa qabı? İnyaa taxılib, inciliyib, t'ımılid, narar ələənçik akar deşod. İnyaa ulyoğasın xhyanıd deşod!
6 Mısayiy Harun cəmə'ətısse Rəbbika yuşan ha'ane çadıresqa apk'ın, mançine ghalee aq'vakkena ç'iyelqa dizyabatçe. Maa'ad manbışisqa Rəbbin nur gyagva.
7 Rəbbee Mısayk'le eyhen:
8 – Əsaayid alyat'u, ğunayiy yiğne çocee Harunee cəmə'ət se'e. Manbışde ulene ögiyl ganzıke xhyan heqqe. Məxüd ğu milletıs ganzın xhyan heles, coyud cone çavra-vəq'əynıd avts'esınmeen xhyan ulyoğecenva.
9 Mısee cuk'le uvhuyn xhinne əsaa Rəbbine ögiyle alyaat'an.
10 Mıseeyiy Harunee cəmə'ət ganzine ögiylqa sı'ımee, Mısee maa'ad manbışik'le bınah ha'asın cuvab uvhu:
– Zalqa vüqqənbı, zal k'ırı alixhxhe, nya'a, xhyan şi şos ine ganzeençene qığahas?
11 Mısee xıl ooqa qı'ı, xılene əsaaka q'öne yəqqees ganzıle k'ena ı'xı'mee, mançeençe geed xhyan gyodatstse giyğal. Gırgıne cəmə'ətınıd cone çavra-vəq'əynıd mançe avts'esımeen xhyan ulyoğa.
12 Rəbbemee Mısayk'leyiy Harunuk'le eyhen:
– İzrailyne milletıs Yizda muq'addasiyvalla haagvas vuşun inyam hiditxhırva, Zı manbışis helesva uvhuyne cigeeqa, Zı şosqa manbı hivxhara'as havaasaras deş.
13 Man xhyan Meriva (cuvabbı uvhiyn) eyhene cigaysneniy vod. İzrailybı ma'ab Rəbbika cuvabılqa abayle, Mang'veeyib Cuna muq'addasiyvalla ma'ab manbışik'le haagva.