8
Numi fengmin Krais tebe-nala takan kebe-nala Sinik Tambal dobe-se uta ko
(Jon 14:15-26, Rom 8:26-27, 1 Kor 2:10-16, Gal 5:16-26, 1 Jon 4:1-6)
1 Kale nuyo Krais imi ilak uta dolup bota, God iyo tebe bogobe-nala, “Ibo tol kup unang tinum kelip o,” age-se kale, nuyo Yesus Krais imi diim feba-sulup kale, kamano koyo God ilami yegemin umi weng kwek uyo maak bogo-nalata, “Ibo fengmin umi kun uyo maak kulan-temip o,” aganbaala kale,
2 bomi magam uyo kulbu kale, kanube nuyo Yesus Krais imi kelup e, kota God imi Sinik Tambal iyo tebe telela imola suun nin unang tinum kem-nuubup kale, fengmin so kaanamin so uyo tebe nuyo sok de imolin kelu bii-sulup kuta, niyo de namolu bii-sii uyo God imi Sinik Tambal imi titil uta tebe talaa nimdalu tambaliim albi kale,
3 umi ilep uyo kulbu ko. Numi fengmin boyo tebe ilep tonsu kale, ulo boyo tebe dogobeta nuyo dong dogobeluta, ulo boyo waafu-numup binim kuta, ulo uyo bagang-kale kanube-numu binim kelu kalaa age-nalata, God yagal tebe kanube-nalata, ilami Man ita daala malaak-nalata, imi dam uyo fengmin tinum numi dam ulutap ke-se kale, God iyo, numi fengmin uyo takan kepman o age-nalata, numi fengmin umi yan uyo ilami Man Yesus Krais imi kobelata, ita molata, waalan-sulup kale,
4 kanubelita, nimi ulo umi tol kuguup uyo bilip imi diim uyo abelu atin waafulin o age-nalata, kanube-se atamta, kamano koyo siin kuguup mafak uyo maak so waafubaalup kale, God imi Sinik Tambal imi kuguup uta waafubup ko.
5 Kale tinum iyo dok ita ilami siin kuguup mafak umi aget kup ugaa kwaala umdii, beyo ilami aget fugunin uta kup waafuu kuguup mafak uyo keman-tema kale minte, tinum iyo dok ita kuguup God imi Sinik tebe kafalebela umi aget kup ugaa kwaala umdii, beta God imi aget fugunin tambal, “Kanumal o,” agan-be uta waafulan-tema ko.
6 Kale kanube tinum imi aget fugunin uyo ilami siin kuguup mafak umi aget kup kola umdii, tinum beyo ilami kaanamin ilep uta tee-be kale minte, tinum iyo dok ita imi aget fugunin uyo God imi Sinik imi aget kup kola umdii, beta imi aget uyo bilili age-bom ilami tiin kafan ilep uyo tee-be kale minte,
7 kanube tinum iyo dok ita ilami siin kuguup mafak umi aget kup kola umdii, tinum beyo, God imi ulo uyo waafulan o aganbaala e minte, dogobeta waafu-nama binim kelan-tema kale, beyo God imi waasi kebelan-tema ko.
8 Kale tinum iyo dok ita ilami siin kuguup mafak uyo waafulin kup kema umdii, tinum beyo God imi aget fugun-be kuguup uyo fen bagang-kale waafu-nama binim ko.
9 Kuta kanube fen God imi Sinik Tambal iyo ipmi diim kal na umdii, ibo ilipmi siin kuguup mafak umi diim kal albaalip kale, ibo Sinik Tambal bemi kuguup umi diim kal albip ko. Minte waantap ita Krais imi Sinik Tambal iyo imi diim uyo albaala umdii, beyo Krais imi tinum ba ko.
10 Kale minte ilipmi fengmin uta tebe ipmi dam uyo ungkwalu kaanan-temu kuta, kanube Krais iyo ipmi iibak tem uyo alba umdii, bota God imi tiin diim uyo fen tol unang tinum ke-nilipta, ipmi sinik iyo asok waalanta tambaliim alba kale,
11 Yesus iyo kaana God iyo tebe asok dufola fen-se kale, kanube ipmi iibak tem uyo God imi Sinik Tambal iyo na umdii, son-temu nala God imi afungen am daanan-temu kota, God yagal tebe ipmi dam kaan-suu uyo asok kufola fen tiin kafan nan-temu no kale, kanupmin ogok boyo imi Sinik Tambal ipmi iibak tem alba imi kobelata, boyo kanuman-tema ko.
Sinik Tambal tebe numi dong dogobela mitam God imi man kemin umi sang uta ko
(Rom 8:1-11, Gal 4:5-7, 6:8, 2 Kor 1:22, 2 Tim 1:7, Rev 21:7)
12 Agelu kale, numi duubal ibaa. God iyo nuyo bogobe-nalata, “Ilipmi siin aget fugunin mafak bota waafunamin ba kale, God imi Sinik imi weng bagake-be uta kup waafu-bom-nilipta o,” agan-nuuba kale,
13 kanube ibo siin aget fugunin mafak uta waafulip umdii, ipmi kaanan-temip kota, ipmi win uyo atin kup binimanan-temu kale, kanube ibo Sinik Tambal iyo dagalip yagal tebe kuguup mafak ipmi diim albu uyo ungkwala kaanu ibo umik ugobe-nilip kupkalip umdii, ibo waalan kafan so nan-temip ko.
14 Kale tinum God imi Sinik imi weng tinangkamin bilip iyo God imi man kebelin iyo kulbip kale,
15 ipmi God imi Sinik du-silip iyo tebe ibo bisop de imo ipmi finanin boyo kupka-em-nuubaala kale, Sinik beta dulipta, ibo ulaa imdulata, mitam God imi man ke-em-nuubip kale, Sinik imi titil diim ilep God iyo ole-bomta, “Aatum aa. Aatum aa,” agan-bom olemin kup kem-nuubup ko.
16 Kale numi aget tem uyo utamupta e, nuyo God imi man kalaa agan-bulup kale, mungkup God imi Sinik yagal tebe kafale-balata, utamupta e, aafen nuyo God imi man kalaa agan-bulup kale,
17 nuyo God imi man ke-sulup kale, bota mungkup son-temu uyo, Aatum imi mufekmufek telela kobesa uyo ilami sagaal diim kululan-temup uyo, Krais sino ninggil maagup kwego dego ke-nulupta, kululan-temup kuta, kamano kagal albup koyo utamum. Nuyo Krais imi siin kaal fuyap ku-se ulutap ke kaal fuyap kugamup umdii, bota son-temu nala abiil tigiin uyo God imi tiin diim uyo Krais ilatap ke nuyo win tibin ke-nulup e minte, God imi mufekmufek tambal uyo kulu no kelan-temup ko.
Son-temu nala abiil tigiin uyo tambaliim kup tonan-temup umi sang uta ko
(2 Kor 4:17, 5:2-4, 2 Fit 3:13, Rev 21)
18 Kale nimi aget fugun-bii uyo, kamano komi kaal fuyap kugan-bulup uyo saak katip kale, son-temu nala abiil tigiin umi tambaliim kup tonan-temup kota, kuguup tambal God tebe numi kobelan-tema boyo kwiin kiim kale, tambaliim kup nan-temup kalaa agan-bii ko.
19 Kale yak kafin kaa kutufosu komi mufekmufek so dimduum so unang tinum so God imi telela imosa iyo bogo-nilip e, “God iyo kafalebelata, utamupta, God imi man bilip iyo dogonupmin unang tinum kalaa agelum o,” age-nilipta, kiit fen-bomta tiin daga-bom fen-bilip kale,
20 God imi mufekmufek so dimduum so unang tinum so telela imosa bilip iyo bom-nilipta, bilip imi ogok uyo tambaliim kem-nuubaalip kale, atin kup mafagansu kale, ilimi aget fugunin ugo ba kale, God yagal de imolata, kanum mitam abe tebesu kale,
21 fen-bulupta, tuluun God iyo talaa imdalata, mafaganan-temaalup ba kale, telela imolata, imi man bilip imi tiyuuk uta ku-nulupta, tambal kup num o age-nilipta, fen-bilip ko.
22 Kale nugol utamsup kale, God imi mufekmufek so dimduum so unang tinum so ko telela imosa imi kaal fuyap kugan tebesip uyo unang, man kolan o agan-bom kaal fuyap kugabu ulutap igil mungkup bong kup faga-bom amemin kup kwep tal kaa diibelip kale,
23 boyo alugum mufekmufek so dimduum so God imi ilak dolin binim unang tinum so ita kup bong kup faga-bom amanbaalip kale, God imi Sinik kamaki dobela du-sulup nugol mungkup kaal fuyap uyo kuga-bom ogen abin so utama-bom ke-bomta fen tebesup kale, nuyo mitam God imi man ke-sulup bota, God yagal tebe, kanupmin kuguup tambal kupka-eman-temi o agesa boyo kanube-nalata, fen numi dam uyo asok telela kobela migik kelan-temu kalaa age-nulupta, fen-bulup ko.
24 Kale God iyo numi ilim ko bo-se kota utamupta e, fen God beyo numi dam uyo asok telela kobela migik kelan-temu kalaa age-nulupta, fen tebesup kuta, mufekmufek umaak utamum o age fen-bulup mitam tulu utamup uyo, asok maak so fenan-temaalup kale, kanube tinum iyo mufekmufek uyo utama umdii, boyo maak so intaben uta utaman o ageta fenan-tema a?
25 Kuta kuguup God iyo numi kobelan-tema uyo kulin-tem albup uta, atin ki kobelan-tema kalaa age-nulupta, numi aget fugunin uyo kuguup ko kobelan-tema bomi aget uyo ugaa kwaa-bomta bilili age-bom fen-bulup ko.
26 Kale ulutap kale, God imi Sinik tebe numi utamin binim min, numi beten katip kemin min, numi dong daga-emin boyo kanumin kale, nuyo utamta, dok umi beten weng uta aman duga-eman-temup kalaa agelan-temaalup min, numi beten weng uyo dagalan agin kuta, dogobeta weng uyo ultam daa daga-numup binim kale, nulumi aget tem kwek ule fugunan-temup uyo, Sinik ita tebe numi dong daga-e-bomta aman duga-e-boma kale,
27 Aatum iyo tinum numi aget tem uyo atin utamebe-nala e minte, ilami Sinik imi aget fugunin boyo utamebe no kesa kale, bomi magam uyo, ilami Sinik iyo God imi aget fugunin ilami utamsa umi sang uta kup God iyo dagaga-bom-nalata, God imi unang tinum nuyo dong daga-em-nuuba ko.
28 Kale nugol utamsup kale, God ilami aget fugunin uta, unang tinum iip maak maak bilip iyo olabelata, meng God ilami miit tem meng-nilipta, kulip imi aget uyo God imi kobe-silip kale, intaben intaben mufekmufek bilip imi diim mitam tulu umdii, God yagal dong daga-e-balata, tambaliim nuubip ko.
29 Kale God imi olemin uyo kanumin kale, God iyo alugum unang tinum iyo atin itamsa kale, utamata e, dok ita nalami unang tinum aligaap kelan-temip kalaa age-nalata, bilip ita ulaa imdulita, kwiin tagang iyo nalami fen Man Krais ilatap kepnelip e minte, nalami fen Man ita bilip imi fik diil kebe no kelak o age-nalata, ulaa imdusa kale,
30 unang tinum ko siin ulaa imdusa bilip iyo olabela meng ilami miit tem uyo tilip kalaa age-nalata, bogobe-nala, “Ipmi fengmin umi yuum uyo binimanebeluta, tol kup unang tinum kelip o,” age-nalata, ilami titil umi atuk uyo kobelata, bilip iyo ku-silip ko.
Fol imi bogo-nala, “God imi i-filinin uyo nuyo imkalan-temaala o,” agesa uta ko
(Jon 3:16, Ef 3:14-21, 1 Jon 3:1-2, 4:7-21)
31 Kale God iyo boyo kanube-se kale, nugol intaben o agelan-temup a? Minte God imi titil uyo atin kwiin kiim kale, numi diim kal bom dong daga-e-boma kale, dok ita tebe nuyo waasi kebe imdaak tamalan-tema a? Boyo atin binim kwa.
32 Kale God imi aget fugunin uyo anung anung ke-bom-nalata, imi Man iyo daala tisaala kale, aget binim daala tal-nalata, kaan-nalata, alugum numi ilim uyo bobe-se kale, ilami Man iyo numi dobe-se ulutap ke alugum mufekmufek uyo aget binim nuyo kobelan-tema ko.
33 Kale tinum God ilami ulu-se bilip iyo waanta tebe-nalata, bilip iyo yega dopman-temaala binim ko. God iyo numi bogobe-nala, “Ibo tol unang tinum o,” agan-boma ko.
34 Kale waanta bogo-nalata, “Tinum iyo fengmin umi yan uyo kulin o,” agelan-tema a? Umbae. Yesus Krais iyo kaan-nala e, asok tigi mo-nalata, no God imi sagaal ipkuk ilo kal bom-nalata, numi beten uyo ke-e-bom dong daga-e-be ko.
35 Kale intaben uta tebe-nuluta, Krais iyo fegelebeluta, numi i-filin-boma boyo kupkalan-tema a?
Kanube iluum uyo mitam numi diim abemin min,
kaal fuyap mitam tebemin min,
tinum tebe kuguup mafak kupka-emin min,
iman tebok mitam tebemin min,
numi mufekmufek duumatamin min,
mufekmufek mafak tebe nuyo anolu kaanamin min,
tinum tebe nuso dinan-kalin min
kanupmin kanupmin mufekmufek mafak bota tebe-nuluta, Krais iyo fegelebeluta, numi i-filin-boma boyo kupka-nama bele a? Umbae. Boyo bagang-kale fegelebeluta, kupka-nama binim ko.
36 Bole kanupmin kanupmin boyo tal numi diim uyo aban-bomu kale, ulutap kale, God imi suuk kon tem uyo bogo-nulu kano,
“Nuyo God kapmi unang tinum kepkebup bota, kek kek iyo, anolup kaanin o age am tiinu kayop tiinu kemu koyo dubak kobelin kup ke-bom-nilip e, imi itabip uyo nuyo kong sipsip ilitap kale, anolup kaanamin uta kup o agan-bom no kem-nuubip o,”
agesu kale,
37 kanupmin kanupmin kuguup boyo mitam talan-nuubu kuta, Krais iyo numi aget uta ugaa kwaa-nalata, dong daga-e-balata, mitam nuta nuta ke yakyak kem tebesup ko.
38 Aa, dam kale, nimi tuluun utabi uyo mufekmufek umaak tebe-nuluta, Krais iyo fegelebeluta, numi i-filin-boma boyo kupka-nama binim kale,
tam kaanamin min,
tiin kafan nin min,
ensel min,
sinik mafak titil tebesu min,
mufekmufek kamano komi albu min,
mufekmufek son-temu nala mitam tolon-temu min,
yak titil ugulumi miit maak maak min,
39 isal abiil tigiin umi mufekmufek min,
iliip tem umi mufekmufek min,
mufekmufek migik yak abe mek abe ko albu kuso alugum bota tebe-nuluta, bagang-kale God iyo fegelebeluta, numi i-filin-boma boyo kupka-nama binim kale, i-filin-boma boyo numi Kamogim Yesus Krais imi diim ilep ku-sulup kale, mufekmufek umaak tebe fegelebeluta, kupka-nama binim ko.