17
God imi tebe Babilon kasel imi kaal fuyap kobesa uta ko
(Rev 14:8, 16:19, 18:1-24, 19:2-3)
1 Kale ensel ban kal tet waafubip imi iibak tem ilota ensel maak tal bogopne-nala e, “Talapta, alop no kafalepkelita, uta-balapta, God iyo unang sa dagamin win tibin uyo kaal fuyap kobela kalaa agelal o ageta kale, weng ko bagan-bii bomi magam uyo ki, unang sa dagamin umi sang uyo felep yak abiip afalik Babilon umi diim to bagan-bii kale, Babilon boyo ok teta taban unsu magat diim mep so kugol tonsu kale,
2 kafin kaa kutufosu komi kamogimal iyo sa dagamin kuguup ulutap uyo unang kuso ke-bom-nilip e, kupkalipta, uta tebe-nulu e, umi kuguup mafak uyo kamogimal imi unang tinum iyo kafale-buluta, kanumip kale, kanube tinum ok mafak une dubom tem ilum ilum keba ulutap kale, kafin kaa kutufosu komi unang tinum iyo sa dagamin kuguup ulutap uyo unang kuso ke-bom-nilip e, umi kuguup mafak uyo waafu-bom-nilipta, ilum ilum ke-bom God iyo dupkaa yang iinip o,” age ensel iyo bogopnela ko.
3 Kale God imi Sinik iyo kafalne-balata, ilam uyo duga-bomta itamita, ensel beyo tal nimtamo unanbu no anang iibaan ku daala kalaa ageli e, ensel beyo kafalepnela utamita, unang maak te tam dimduum isagulut imi daang kun diim tonbu kalaa ageli kale, dimduum bemi dubom uyo ban kal e minte, imi dubom diim uyo kom ko age duk nagaal kal no kale, God imi win kufak daga-emin uyo imi alugum kaal diim uyo dolasip kale, uyo utamita e, beyo yol ok kumun tem umi dimduum kalaa ageli ko.
4 Kale unang bomi ilim tiilu boyo unang kamok kwiin umi ilim tiim-nuubu ulutap kale, uyo ilim tambal alop maak tiilu boyo isagulut ilim e minte, ket kon boyo gol so tuum titup fukolin so samaal so kulu telelalip bugup san kesu uyo tii-nulu e minte, umi sagaal diim uta gol ku kap telela kosip umi waafubu kulaak uyo sok dum ok ba kale, kulaak uyo mufekmufek mafak ninak tonsu kuguup sa dagamin ko age min, kuguup mafak mafak umi kap abu ko waafubu kalaa ageli ko.
5 Kale unang boyo ulumi kubasu win uyo ulumi tibit kun miton diim kugol dolalin kale, “Niyo abiip afalik titil so abiip Babilon kale, niyo kafin kaa kutufosu komi unang tinum sa dagamin kuguup so atin kuguup mafak mafak fitom binim kuguup so waafusip alugum imi ogen o,” age dola kosip ko.
6 Kale Babilon kasel iyo tebe God imi weng waafulin unang tinum dital fagaa Yesus imi diim febalin bilip iyo inolip kaanip kalaa age-nuluta, unang boyo imi deng faga-e-bom-nuluta, imi isak uyo une-nuluta, ilum ilum buluta, niyo utamta, kumang moli ko.
7 Kale ensel iyo bogopne-nala e, “Kabo boyo kumang saanin ba kale, niyo unang kanu-bo bomi magam uyo kupkem daapke-nili e minte, dimduum dubom ban kal so kom ko age duk nagaal kal no kesa imi daang kun diim tonbu dimduum bemi magam uyo kupkem daapke no kelan-temi kale, tinangku-salapta.
8 Kale boyo yol ok kumun tem umi dimduum ita siin uyo kamok ke unang tinum iyo tiin mo-bii-se kuta, kamano koyo kamok ke tiin mobaala kale, unanbu daak kafin umi tem kiim kalo kosu kulagal alba kale, siit ilugo-nalata, asok kulaak ilo mitam bom-salata, God iyo tebe atin angkola binimanan-tema ko. Kale sugamiyok God imi kafin komi telelalin-tem som-nala uyo, itamata, tinum milii kafin diim ko nan-temip bilip iyo nimi tinum kelan-temaalip kalaa age-nalata, imi win uyo suuk kon tem uyo dolebesaala binim kale, iyo imi suun abiip uyo isino nan-temaalip binim kale, kanupmin unang tinum iyo utamipta, yol ok kumun tem umi dimduum iyo asok mitam tala kalaa age-nilipta, kumang molan-temip ko.
9 “Kale kanube waantap kapta aget fugunin tambal ku-nalap nimi weng magam uyo utamta, dok umi magam uta bagan-be kalaa age utam bam daalan o agelap umdii, kabo bo tele aget fugunal. Yol ok kumun tem umi dimduum dubom ban kal boyo felep yak amdu ban kal unang ko age abiip afalik tonbu bomi diim to-nulu e minte, dubom ban kal boyo felep yak kamogimal ban kal ko age abiip afalik kutam imi king ban kal imi diim to no kelu ko.
10 Kale kamogimal ko age king ogal iyo isiik unang tinum iyo tiin mo bii kaana kaana ke-silip kale minte, kamano kota kamogim ko age king maagup beta kup unang tinum iyo tiin moba kale, son-temu uyo, afungim beta mitam kamok king ke-nalata, ita unang tinum iyo tiin molan-tema ko. Kale imi mitam king kelan-tema uyo, God iyo dupkalata, iyo king ke-bom siit ilugolin tap kelan-tema ko.
11 Kale siin uyo yol ok kumun tem umi dimduum iyo kamok ke unang tinum iyo tiin mo-bii-se kuta, kamano koyo kamok ke tiin mobaala kale, beyo king ban kal bilip imi iibak tem uyo tinum maagup beta kup som-nalata, kaan-se kuta, son-temu uyo, iyo asok mitam-nalata, ita asok king ke-nalata, unang tinum iyo tiin mo-bom-salata, God iyo tebe angkola atin kaan binimanan-tema ko.
12 “Kale kom ko age duk nagaal kal utabap boyo felep yak son-temu nala tinum nagaal kal mitam king kelan-temip bilip imi diim tolu kale, bilip iyo yol ok kumun tem umi dimduum imi ogok ke-emin tinum kelipta, yol ok kumun tem umi dimduum iyo tebe titil ku king nagaal kal bilip imi kobelata, bilip iyo yagalami abiip maak uyo tiin mola tiin mola ke siit ilugolin tap so kelan-temip ko.
13 Kale king nagaal kal bilip iyo aget maagup ke-nilipta, imi unang tinum bilip iyo imdalip yak yol ok kumun tem umi dimduum imi unang tinum aligaap kebelipta minte, king bilip ita dimduum imi ogok ke-emin tinum kebe no ke-nilip e minte, king bilip ita yol ok kumun tem umi dimduum imi titil uta kup ku-nilipta, unang tinum iyo tiin mo no kelan-temip ko.
14 Kale yol ok kumun tem umi dimduum so e minte king nagaal kal so iyo Sipsip Man Yesus so waasi dinan-kalon-temip kuta, Sipsip Man beyo alugum kamogimal imi dubom e minte, beta atin kamogim titil kup tebesa no kale, imi titil uta alugum king bilip imi titil uyo kubaganu imka-nalata, ita ita kesa kale, God iyo Sipsip Man imi unang tinum ita kup ulaa imdula mitam imi okumop man kebe-nilipta, iyo dital fagaa imi diim uyo febalipta, Sipsip Man so imi unang tinum so iyo yol ok kumun tem umi dimduum so king nagaal kal sino imi unang tinum sino dinan-kalon-temip uyo, Sipsip Man ninggil mangkal ita ita kelan-temip o,” age ensel iyo bogopnela ko.
15 Kale maak uyo ensel iyo bogopne-nala e, “Unang sa dagamin ko age abiip Babilon boyo ok teta taban unsu magat diim mep so kugol tonsu kalaa agebap bomi magam uyo kafin kaa kutufosu komi abiip maak maak unang tinum so, tinum miit maak maak so, tinum miit yagalami kaal migik migik so, tinum miit yagalami weng migik bagamin so bilip iyo Babilon kasel imi afak tem iinipta, tiin molip albip ko.
16-17 Kale God iyo yol ok kumun tem umi dimduum so king nagaal kal sino imi bogobe-nala e, ‘Kanubelin o,’ agelata, bilip iyo, maagalo kanubelum o age-nilipta, king nagaal kal iyo aget maagup ke-nilipta, imi unang tinum bilip iyo imdalip yak yol ok kumun tem umi dimduum imi unang tinum aligaap kebelipta, king ita imi ogok ke-emin tinum kebe no kelip kale, yol ok kumun tem umi dimduum ita king nagaal kal imi kamok ke-nalata, imi unang tinum iyo tiin molan-tema kale, yol ok kumun tem umi dimduum isino king nagaal kal so iyo unang sa dagamin ko age abiip Babilon umi waasi kebe olsak kobe no ke-nilipta, unang umi mufekmufek tambal uyo alugum kupkan kebe bisop kaal kem kupka-nilipta, umi dam uyo alugum bukobe une at kwegalip ken tebelan-temu kale, ko kanubelan-temip boyo abiip Babilon umi mufekmufek tambal umi sang kale, alugum kupkan ke fegela ko at kwegalip bii, tiban binimanuta, God imi weng uyo abulan-temu ko.
18 “Kale unang ko utamap boyo felep yak abiip afalik win tibin umi diim tolu kale, sugayok uyo abiip kasel imi king ko age kamogimal iyo ita ita ke kafin kaa kutufosu komi king migik iyo kubaganip imka-nilipta, ita kafin kaa kutufosu komi abiip maak maak uyo tiin mo-bii kaana kaana kem tebesip o,” age ensel iyo baganema ko.