20
Ensel tebe Saatan iyo sok de dola bii, atol ulumi kup wan tausen (1,000) dakan kesa uta ko
(Rev 11:15, 12:5,10)
1 Kelip e, kota Jon niyo utamita, ensel maak abiil tigiin ilo tala bemi sagaal diim uyo kafin umi tem kiim kalo kosu umi faal umi kii so minte ain sok ko age sen iluum kup tebesu kuso waafuba kalaa ageli kale,
2-3 inap kiim sugamiyok God imi waasi ke-bom God imi unang tinum imi weng mafak baga-e-bom kem titin-e-bii-se Saatan iyo aafuu sen tuup sok de do daala unanbu daak kafin umi tem kiim kalo kosu kulaak iina e, faal uyo ilobe fomtuup nagat mobe dupkalata, waantap ita faal bitobe-nama binim kela e, Saatan iyo kulagal bom-balata bii, atol ulumi kup wan tausen (1,000) komi dakan kelan-tema kwek uyo, iyo dogonubeta mitamta kafin kaa kutufosu komi unang tinum iyo bisop baga-e-bom ifak daga-bom keman-temaala binim bii, atol ulumi kup wan tausen (1,000) koyo dakan kela binimanan-temu kota, God iyo bogobelata, asok talaa daalipta, mitam abe tiinan-siit ilugolan-tema ko.
4 Kale niyo Yesus imi unang tinum inolip kaanan unsip imi sinik iyo itami kale, tinum kaansip bilip iyo Yesus imi tuluun weng kupkem daabesa so God imi weng sino uyo dital faga-bom kwep yang ipkumal migik iyo fomtuup baga-e-bom kafale-bom kemsip kale, bilip iyo yol ok kumun tem umi dimduum so dimduum imi sinik telela kwep daasip so iyo aman duga-emsaalip binim e minte, imkalip dimduum imi ogok kemin iyo tebe imi namba ko age win felep yak ku tosu uyo tibit kun diim so sagaal diim so dolasaalip binim no kale, bomi kalan uta Yesus imi waasi iyo tebe-nilip e, kaabak ku Yesus imi unang tinum imi dubom ukan kebesip kuta, God iyo ifola fen tigi molipta, iyo titil kobe-nalata, “Ipta unang tinum tiin molin o,” age-nala e minte, “Yesus Krais isino ipso ibo unang tinum iyo tiin mo-bilip bii, atol ulumi kup wan tausen (1,000) koyo dakan keluk o,” age no kelata, niyo asok itamita, iyo king imi tonamin baan diim uyo tonbip kalaa ageli ko.
5-6 Kale alugum unang tinum kaan-silip imi iibak tem uyo Yesus imi ilak uyo dobip kalaa age-nilip anolip kaansip ita God iyo tebe kamaki uyo ifola fen tigi molan-temip kale, unang tinum bilip iyo God ilami unang tinum aligaap kebesip ita kale, bilip iyo kaal binim kelan-temip kale, bilip iyo yak suun at kenan-bomu umi tem umaak iinom amiit kaan atin binimanan-temaalip binim kale, bilip iyo God so Krais so ulim ilimi pris ko age unang tinum amem kebe-bom ulim imi ogok uta kup ke-bilip e, iso Krais isino iyo kafin kaa kutufosu komi unang tinum iyo tiin mo-bilipta bii, atol ulumi kup wan tausen (1,000) koyo dakan kelan-temip ko. Kale ipkumal milii kaansip ita kafin tem kugol bom-bilip bii, atol ulumi kup wan tausen (1,000) boyo dakan kelip binimanuta, kota igil fen tigi mo no kelan-temip ko.
God imi tebe Saatan ang kugan kelan-tema umi sang uta ko
(Mat 7:21-23, 25:41, Rev 11:7, 12:3-4,7-18, 13:2,4, 16:13-14, 17:7-8, 20:1-3)
7 Kale kanube atol ulumi kup wan tausen (1,000) komi dakan kela binimanan-temu kota, ensel iyo kafin umi tem kiim kulaak Saatan alba umi faal uyo bitobe-nala e minte, sok talaa daa no kebelata, mitam e tolon-tema ko.
8 Kale mitam abe-nala e, kafin kaa kutufosu komi unang tinum iyo bisop baga-e-bom ifak daga-bilita, nimi aget uyo kop-namin o age-nalata, bisop baga-em tiineman-tema kale, God imi ilak dolin binim unang tinum milii kulip imi win uyo, Gok kasel o agan-bom-nilip e minte, tinum milii maak imi win uta, Magok kasel o agan-bom no kem-nuubip kale, Saatan iyo tebe, tinum miit alop kulip iyo kwego dego ke alugum afeta kolita, God imi tinum sino dinan-kulum o agelan-temip kale, tinum miit alop bilip imi tinum iyo ki kwiin tagang kale, yol ok umi ok diniing tem ulutap kale, dogobeta tiki-namap binim kale,
9 bilip iyo segela tebe kafin kaa kutufosu koyo bugu-bii kupkalan-temip kale, mungkup God imi abiip afalik aget kobe-boma Jerusalam kutam kal imi unang tinum iyo alugum afeta-bom waasi bilip imi fen-bilipta, waasi bilip iyo nota falala-bii ko-nulupta, aamum o age fiko tal bigilan-temip kuta, God yagal tebe abiil tigiin ilota at dong kwaala malaak-nuluta, alugum bilip iyo fuulu ken tebe binimanan-temip ko.
10 Kale Krais iyo tebe tinum kulip imi bisop baga-emin tinum Saatan iyo daala unanbu daak suun at kenamin umi tem kulaak iinon-tema kale, siin yol ok kumun tem umi dimduum so e minte kafin tem umi dimduum ko age bisop bagamin profet iso Krais tebe imdala unanbu daak kafin tem iin-silip alop iso Saatan so ninggil bilip iyo kulagal bom kaal fuyabok afalik uyo daanin so mililep so uyo ogen man figilip uyo utama-bom suun kup nan-temip kale, suun at kenamin boyo, tuum naam uyo mimin fuu-bom mangan-nuluta, dela daak abe-bom-nuluta, ok muk ibolin tap ke-nuluta, kulagal suun kup at kena-bom tang mafak uyo kuun-bom no ke-bomu kale, bomi iibak tem kulagal Saatan ulimal iyo nan-temip ko.
God imi afung afung yega dopman-tema uta ko
(Mat 25:31-46, Rom 2:1-16, 2 Tes 1:7-10, 2:3-12, Rev 14:9-11,14-20, 16:1-20, 22:12)
11 Kale niyo utamita, God iyo ilami baan diim kugol tonba kalaa ageli kale, imi tonamin baan diim boyo kwiin kiim e minte namaal no kale, kugol ton-bomta imi weng uta bagam-salata, kafin sino abiil sino koyo bubat mo maagalo keluta, dogonubeta maak so utam-nimip binim kelip ko.
12 Kale niyo utamita, unang tinum kaansip imi fenin-tem albip bilip iyo tinum win so so e minte tinum win binim iip kugol man sino imi kaansip ita kalaa ageli e, alugum iyo no God imi tibit diim kugol molip e, God imi suuk kon iip maak maak umi tem kwek uyo tinum imi kuguup tambal so mafak so kanum-nuubip uyo kwegal dolam-nuuba kale, ensel iyo suuk kon boyo bam daa kulep to-nilip e minte, suuk kon maak God tebe unang tinum suun nan-temip imi win dolasa uyo bam daa kwep daa no kelip e, kota God iyo tinum imi kuguup kanu-bii kaansip umi sang uyo fomtuup utafi-bom tiki-e-bom-nalata, imi kuguup kanum-nuubip uta tii-e-bom yan kebe yan kebe kema ko.
13 Kale tinum yol ok tebe mimilepmu kaansip iyo asok fen tigi mo yol ok kumun tem uyo kupkaa mitam tamip e minte, tinum abiip kal kaana-bala sep kal kaana-bala kem unsip iyo asok fen tigi mo begel am uyo kupkaa mitam tal no kelip e, iyo mangkal ninggil kwego dego ke-nilip e, God imi tibit diim kal molip e, God iyo tebe imi kuguup kanu-bii kupkaa kaansip umi sang uyo fomtuup utama-bom tiki-e-bom-nalata, imi kuguup kanum-nuubip uta tii-e-bom yan kebe yan kebe kema ko.
14 Kale ensel iyo kaanamin umi ilep sino kaanamin abiip sino uyo alula kwaala daak ok muk ibolin tap ke-bom suun at kenan-bomu umi tem iinom binimanu kalaa ageli kale, daak suun at kenamin umi tem iinemin boyo amiit kaan atin binimanamin uyo kulbu ko.
15 Kale God imi yega duga-eman-tema boyo, unang tinum waantap ita imi win uyo God imi suun nin unang tinum kelan-temip imi suuk kon tem kwek uyo albaalu kalaa agela umdii, bilip iyo alula kulala daak suun at kenamin umi tem iinon-temip ko.