5
Jon imi tebe, God imi suuk kon dola fufala ko kwep daasa umi utam-se uta ko
1 Jon niyo utamita, tam Bisel God iyo suuk kon timitim fufala kosu maak ilami sagaal ipkuk diim kal waafuba kalaa ageli kale, suuk kon boyo tip diim katam uyo dola som, minte afak tem kalaak uyo dola no kelin kalaa ageta utamita, at dan ban kal maak fugu-nala e, suuk kon boyo fufalam kwep abe-bom-nala e, at dan uyo fukola nagat molu kupkaa yakyak ke binimanu de kwep ku daasa kale, umi kanubesa kwek uyo tinum iyo maak utamta tiki-nama binim kalaa ageli ko.
2 Kale ensel titil tebesa maak atami e, fomtuup olapne-nala e, dagala ko. “Tambal kup tebesa tinum iyo waantap ita ki tii at dan boyo tagaa kupkan ke-nalata, suuk kon boyo tiila kolan-tema o?” agela kuta,
3 tam abiil tigiin sino kafin diim sino e minte tinum kaan unsip imi abiip sino uyo tinum tambal kup tebesa iyo maak tebe-nalata, tii at dan boyo tagaa kupkan ke-nalata, suuk kon boyo tiila ko-nalata, weng kwek uyo tiki-nama binim ko.
4 Kale niyo utamita e, tinum tambal kup tebesa iyo maak tii suuk kon boyo tiila ko weng kwek uyo tiki-nama binim kalaa age-nilita, nimi aget tem uyo iluum kup tebepneluta, fomtuup amemi e,
5 kamok kamok ilimi kup 24 bilip iyo maagup maak bogopne-nala e, “Kabo amemin ba kale, mep tinum moba beyo tii kale, kek fen atamal a. Kale bemi sang uyo bogo-nilip, ‘Bemi win uyo, pusi kiim ko age layon o,’ agan-nuubip kale, win bomi magam uyo, ‘Juda imi man ilop imi kamok o,’ agan-bom-nilip e minte, asok bemi win maak uyo, ‘King Devit imi man ilop miton o,’ agan-bom no kem-nuubip kale, beyo titil kup tebe-nala minte, mufekmufek mafak uyo alugum kubaganu ita ita ke no kesa kale, beta tii suuk kon diim umi at dan uyo tagaa kupkan ke-nalata, suuk kon boyo tiila kolan-tema o,” age bogopnela ko.
Jon imi Sipsip Man Yesus atamsa uta ko
(Rev 7:17, 14:1-5, 17:14, 21:22-24)
6 Jon niyo kiit fenita, pusi ko age layon titil tebesa iyo atamin-tem keli kuta, Sipsip Man maak ita God imi tonamin baan diim umi atin ki mep sino kugol moba kalaa age-nili e, beyo tam God imi mufekmufek tinum ke dimduum ke kelin kalbinim isino kamok kamok isino imi iibak tem kutam kal moba kalaa age no keli kale, Sipsip Man Yesus beyo angkolip kaan-nala imi kaal diim uyo dul tagang kup bugusu kuta minte, beyo kafan alba kale, imi dubom diim boyo kom ko age duk ban kal e minte, imi tiin uyo ban kal no kale, tiin ban kal boyo God imi ensel ko age sinik ban kal imi sang felep yak to-nalata, God iyo bilip ita imdala no kafin kaa kutufosu koyo tiin mo tiinemin kup bomip ko.
7 Kale Sipsip Man beyo yak suuk kon Bisel God imi sagaal ipkuk diim albu uyo kula e minte,
8 mufekmufek tinum ke dimduum ke kelin kalbinim sino kamok kamok ilimi kup 24 sino iyo Sipsip Man imi tibit diim ilo kugol katuun duung fegela daak ton-nilip e, alugum maagup maagup bilip iyo biingbuung ko age gitaa sino at dan min at kon tambal tang kuunin umi at kwegalip kenan-bo umi gol tet sino uyo waafuu no kebip kale, at dan so at kon so umi tet boyo God imi unang tinum imi tebe beten kemin umi sang uta felep yak ku to-nuluta, kam agesu ko.
9-10 Kota alugum bilip iyo kamaa aseng maak kwaa-bom-nilip e, Sipsip Man Yesus bemi bogobe-nilip, “Kabo kangkolipta, kaan-nalap kapmi isak tambal boyo singkam daa tebe-nuluta,
tinum miit maak maak sino,
tinum miit yagalami weng migik bagamin sino,
abiip maak maak unang tinum sino,
tinum miit yagalami kaal migik migik sino
alugum bilip imi unang tinum iip maak maak imi fengmin uta mobe-nalapta, ilim bobe-nalap imdep meng God imi miit tem daabelapta, bilip iyo mitam kalapmi kamaa tinum miit ke-silip kale, kamano koyo God imi pris ko age tinum amem imi siin kanumsip ulutap ke-nilipta, numi God imi ogok uyo ke-bilip kale, biilan-temu uyo, bilip ita tebe kafin kaa kutufosu komi unang tinum iyo alugum tiin molan-temip kale, boyo kapta felep-kamuta, kanube-nalapta, suuk kon fufala kosu uyo ku-nalapta, at dan uyo tagaa kupkan ke-nalapta, suuk kon uyo tiila kolan-temap o,” age mufekmufek tinum ke dimduum ke kelin kalbinim sino kamok kamok ilimi kup 24 so bilip ita deng tebe-bom Sipsip Man imi win uyo kufu-emip ko.
Ulotu ke-bom Yesus imi win kufu-emsip uta ko
(Rev 4:6-11, 5:8-10, 15:3-4)
11 Aa mungkup ensel tagang ko ageta tinum iyo maak tebe tiki-nama binim iyo dagaa kulep no God imi tonamin baan diim sino God imi mufekmufek tinum ke dimduum ke kelin sino kamok kamok sino imi mep so kugol falala imdek mobip kalaa age itam-nili e,
12 tolong dolita e, alugum aseng uyo fomtuup kwan-bilip kalaa ageli e, bogo-nilip, “Sipsip Man kabo kangkolip kaan-nalapta, numi ilim uyo bobe-salap kale, nuyo katamupta e,
kabo afaligen kalaa agebup,
kabo titil magam kayaak kalaa agebup,
kabo mufekmufek soyaap kalaa agebup,
kabo aget tambal fugunin kalaa age-nulupta,
nuyo felepmuta, kapmi deng kup tebe-bom-nulup e, ‘Misam o,’ agan-bom no ke-bulup o,” age aseng kwaa-emip ko.
13 Kale niyo tinangkulita, dimduum min, sinik min, unang tinum min imi abiil tigiin albip isino kafin diim albip isino unang tinum kaansip imi abiip albip isino e minte, yol ok kumun tem albip isino iyo alugum maagup aseng kwan-bilip kalaa ageta tinangkulita e, aseng kwek uyo bogo-nilip e, “Alugum numi tiin molin tinum God isino minte Sipsip Man isino ulim ibo afaligen e minte, titil miit kasel no kalaa age-nulupta, ulim ipmi deng uyo tebe-bom, ‘Misam o,’ agan-kulum o ageta kale, nuyo suun kup aseng kwaa-e-bom-nulup e, ipmi deng uyo tebe-bom no keman-temup o,” age aseng kwaa-emip ko.
14 Aa mungkup mufekmufek tinum ke dimduum ke kelin kalbinim iyo, “Aafen o,” agelip e minte, kamok kamok ilimi kup 24 igil mungkup katuun duung fegela daak ton-nilip e, Bisel isino Sipsip Man isino ulim imi win uyo kufu-e-bom ulotu ke-emip ko.