9
Ensel ok kemi tebe ilami bigul bo-bala olan-bii kupkasa uta ko
(Mat 24:29-31, Rev 6:12-17, 8:6-13, 9:13-19, 11:6,13, 16:1-20)
1 Aa mungkup ensel ok kegal mungkup ilami bigul uyo bo-bala ol-bulu e, niyo biningok maak utamita, daak kafin diim abebu uyo, God tebe kafin umi tem kiim kalo kosu umi faal umi kii uyo biningok bomi ensel imi kobela kalaa ageli kale, kafin umi tem kiim kulaak uyo sinik mafak iyo imi kaal fuyap kugamin am daanan-temu uyo bigibip ko.
2 Kale biningok bomi ensel iyo tebe faal umi kii uyo ku-nala e, kafin umi tem kiim umi faal uyo bitola e minte, at kiim umi at tum ulutap mitambe tal-nulu e, atanim sino abiil sino uyo katilu mililanu e, atanim uyo dogonubeta ken-numu binim kelu ko.
3 Aa mungkup kweng yuuk ko age mufekmufek ifuul kon unan-kalin uyo abiil tigiin umi at tum tem kutam-tele malaak kafin diim tilip kalaa ageli e, God tebe kuntuk mobelata, kafin diim umi atoguum ulutap ke-nilipta, tebe unang tinum iyo yemip ko.
4 Kale God iyo bogobe-nala e, “Ibo tebe-nilip ilipmi kuguup uyo ku-nilip ifuul kon sino at kon sino mufekmufek tebemin migik sino boyo kufak dagamin ba kale, unang tinum imi tibit kun diim God nimi win dolalin binim bilip ita kup ifak dagamin o ageta ko.
5 Ibo unang tinum bilip iyo inolip kaanamin ba kale, ipkil kaal fuyap afaligen uta suun kup kupka-e-bilip bii, kayop ogal kelin o,” agela ko.
Kale yuuk ko age bilip imi tinum aa-bom atul kupka-em-nuubip uyo atoguum imi atul kupka-em-nuubip ulutap kem-nuubip ko.
6 Kale kayop ogal kwek uyo unang tinum bilip iyo kaal fuyap afaligen kuga-bom-nilipta, imi aget kiim fugunin uyo, kaanupta bole, numi kaal fuyap binimanan-temu o agan-nuubip kuta, God iyo imkala kaansaalip kale, bilip iyo kafan so bom-nilipta, kaal fuyap kugan-bii-silip ko.
7 Kale yuuk ko age kweng kulip iyo kanupmin kale, bilip iyo ki hos tiin molin tinum imi, hos kulu waasi dinan-kulum o age telela kobip ulutap ko. Yuuk ko age kweng bilip imi dubom diim uyo mufekmufek kamogimal imi dufalum gol ku telelasip ulutap uta tiilin e minte, imi tibit kun uyo tinum imi tibit kun ulutap no ko.
8 Minte imi dubom kon uyo taabalasep unang iip maak maak imi dubom kon timitim ulutap e minte, imi sit kun uyo timitim e minte atin taalin no kale, boyo pusi kiim ko age layon imi sit kun ulutap ko.
9 Kale iyo mufekmufek ain ku naam telela kosip ulutap uyo kwaak kalilipta, tuup kun uksulu ko. Kale minte imi fululuu tiinemip uyo, imi bal kun weng uyo ok faga-bulu umi biileng ulutap ko.
10 Kale imi umsan kun ko age abuk uyo atoguum umi abuk ulutap atul so kale, imi atul uyo tii no unang tinum iyo ye-bii kayop ogal kemin no kale,
11 yuuk ko age kweng bilip imi kamok king tiin mosa beyo ensel mafak kale, beyo asok kafin umi tem kiim bomi tiin mosa kale, bemi win uyo Hibru kasel iyo bogo-nilip, Abadon o agan-bilip e minte, Grik kasel igil bogo-nilip, Apolyon o agan-bom no kem-nuubip kale, win alop komi magam uyo ki, mufekmufek kufak dagamin o agesu ko.
12 Kale Jon nimi ilam kaa dugan-bii koyo kuguup mafak so kaal fuyabok so umi mitam tolon-temu umi ilam dugan-bii kale, baga-e-bom dole-bom ke-bili kamaki anung uyo binimanbu kale minte, alop maak albu kale, umi iibak tem so e minte afung so umi weng uyo kulbu kale, bogobelin-tem albi kale, suluta, bomi weng uyo bogobelan-temi ko.
Ensel bugup kemi tebe ilami bigul bo-bala olan-bii kupkasu uta ko
(Mat 24:29-31, Rev 6:12-17, 8:6-13, 9:1-12, 11:6,13, 16:1-20)
13 Kale ensel bugup keyo ilami bigul uyo bo-bala ol-buluta, at dan min at kon umi fuumin baan diim at sino gol sino umi ku telela kosip uyo God imi tibit diim kugol mobu kale, bomi iibak tem ku-tele weng maak tuluta, tolong dolita,
14 ensel bugup kemi bigul tol kup waafuba bemi bogobe-nulu kano, “Israel kasel imi waasi iyo ok afek Yufretis bomi ok bal kal nin kale, God iyo bilip imi ensel mafak kalbinim bilip iyo ok bal kugol sok de imolata, kugol bigi-bii-silip kale, no-nalap talaa imdalapta, daaginin o,” agan-bo kalaa ageli ko.
15 Kale bomi magam uyo ki, God iyo utamata e, kafin diim unang tinum iyo baan asuno kale, ensel mafak kalbinim bilip iyo tebe baan maak ita inolip kaan binimanan-temip kale minte, baan alop maak ita imkalip tambaliim kup nan-temip kalaa age-nala e, sok de imo fomtuup nagat mo yakyak kela bii, ulumi am umi bogosi uyo tulu kalaa age-nilita, tiila imolan-temi o agesa ko. Kale am kanupmin beta daan-bom-salata, kanupman-temi o agesa uyo mitam tulu e, God iyo ensel bugup kemi bogobela beta tebe talaa imdala daaginip ko.
16 Talaa imdala daaginip e, waasi dinan-kalin tinum kwiin tagang iyo hos daang kun diim ton-nilip e, tala tala bii koli kale, ensel bugup iyo bogopne-nala e, “Waasi dinan-kalin tinum deng saak saak ilimi kup 200 milion ita albip o,” age ko.
17 Kale ilam anung kwek uyo kopneluta, utamita e, hos kwiin tagang sino tinum kulep tiinemin so iyo kanupmin kalaa ageli kale, waasi dinan-kalin tinum imi naam kwaak kalilip uyo bagan isagulut so bagan miil so bagan naam so uyo fogolip dong tebesu ko. Kale minte hos imi dubom uyo pusi kwiin kiim atul tebesu ko age layon umi dubom ulutap keluta, at dong sino at tum sino minte tang mafak sino uyo imi bon tem ilep mitam e talan-bo kalaa ageli ko.
18-19 Minte hos umi bon tem sino umsan sino alop kwek uyo titil kup tebe-nulu e minte, atul kup tebe no kesu kale, unang tinum iyo an-nuubu kale, hos umi umsan uyo inap dubom ulutap ke-nuluta, unang tinum iyo an-bii-suu ko. Kale at dong sino at tum sino minte tang mafak sino mufekmufek mafak asuno bota hos umi bon tem ilep mitam-nuluta, kafin diim komi unang tinum milii maak uyo bagaa kupkan ke anolu kaanipta minte, unang tinum milii alop bilip ita uk kugan imoluta, waalan-silip ko.
20 Kale mufekmufek mafak asuno uyo tebe unang tinum milii alop kulip iyo anolu kaansaalip kuta, asok iyo mufekmufek mitam ti-suu boyo utam-silip kuta, imi aget fugunin umaak fupkelata, kuguup mafak ke-bilip boyo kupkalin-tem ke-nilipta, imi bisop bagamin kuguup ilimi sagaal tuup telela ko-silip uyo umik ugobe kupkalin-tem ke-nilip e, sinik mafak so men amem so umi deng uyo tebe-bom aman duga-e-bom-nilip e minte, gol min, silva min, kopa min, kuung kuung min, at min uta kulu naman-bii-nilip e, tinum so dimduum so imi sinik uta telela ko-nilip e, kwep ku daalip bom-buluta, “Bota numi god umdii kulbu o,” age-nilipta, umi deng uyo tebe-bom aman duga-e-bom no kem-nuubip kale, kuguup boyo kupkasaalip kale, kanupmin mufekmufek boyo sinik binim kale, boyo tii utamamin binim, tolong dugamin binim, tigitanin binim kuta, aman duga-em-nuubip ko.
21 Kale mungkup unang tinum bilip iyo aget fupkela ko imi tinum aamin so timon unan-kalin so sa dagamin so yuguut unan-kalin so umi kuguup uyo kupkasaalip binim ko.