3
Yohaana naalangilila kwisa kwa Yesu
(Maliko 1:1-8; Luka 3:1-18; Yohaana 1:19-28)
1 Bwile obu Yohaana Mubati̱ji̱ aasa, aatandika kutebeja mu elungu lya di̱si̱tu̱li̱ki̱ti̱ ya Bu̱yu̱daaya.
2 Aatebeja naaghila bantu ati, “Mwekuukemu, nanga bu̱lemi̱ bwʼomu eghulu buli haai ku̱hi̱ka.”
3 Yohaana oghu niiye mulangi̱ I̱saaya aabu̱ghi̱yʼo hambele ati,
“Muntu niibuwo aalangilila mu elungu ati,
‘Mweteekani̱li̱je kwisa kwa Mukama;
mukole ebi abbali̱ye!’ ”
4 Yohaana oghu aalu̱walagha ki̱lu̱walo ki̱koleeu̱we mu byoha bya ngamila, aalu̱walagha mu̱ci̱pi̱ ghwa luhu. Byokuliya biye aaliyagha njighe na bwoki bwa njoki, ebi aagubhagha kutunga mu elungu.
5 Bantu bakani̱ye baaghenda ku̱mu̱tegheeleli̱ya mbalu̱gha e Yelusaalemu, na mu di̱si̱tu̱li̱ki̱ti̱ ya Bu̱yu̱daaya yoona. Na banji baalu̱ghagha mu byalo ebyeli̱ghi̱li̱i̱ye maasi Yolodaani̱.
6 Ti̱ abaakaatulaagha bibhi byabo, ababati̱ji̱la mu maasi Yolodaani̱.
7 Bhaatu obu aaboone Bafali̱saayo na Basadukaayo bakani̱ye mbaasa hambali akwete kubati̱ji̱la bantu, aabaghila ati, “Enu̱we abali na bubhi nga bwa njoka! Mu̱kweli̱li̱kana muti kubati̱i̱ji̱buwa kwonkaha kukuleka Luhanga atabafubila?
8 Hatiini mukole ebikwoleka ngoku mweku̱u̱ki̱yemu.
9 Muleke kweghila muti Luhanga taakubafubila haabwa enu̱we kuba baasukulu baa Ebbulahi̱mu̱, nanga mbaghambiiye, Luhanga naabbali̱ye akugubha kuuhila Ebbulahi̱mu̱ baasukulu, nankabha mu mabaale ghani!
10 Ti̱ nʼendindi Luhanga eeteekani̱i̱je kufubiilila kimui abakukolagha bintu bi̱bhi̱i̱hi̱ye, Ti̱ na bu̱li̱ kiti ekitaakwana bi̱ghu̱ma bisemeeye, bakukijomba na ndyankui, bakikube mu mulilo.”
11 “Si̱ye nkubabati̱jagha na maasi kwoleka ngoku beeku̱u̱ki̱yemu bibhi byabo. Bhaatu oghu akwisa andabhi̱ye tani̱hi̱ki̱ye na kuba mu̱heeleli̱ya wee, nanga ansaai̱ye bu̱toki̱. Eye akubabati̱ja na Mwoyo Ahi̱ki̱li̱i̱ye kandi na mulilo.
12 Eeteekani̱i̱je kukola bantu ngoku mu̱li̱mi̱ akweteekani̱jagha akwata kitalo kiye kweha mucele ghuwe kuuyamu bisunga. Oghusemeeye aghubiika mu nguli kandi bisunga abikuba mu mulilo ghutaaku̱li̱magha.”
Yesu naabati̱i̱ji̱buwa
(Maliko 1:9-11; Luka 3:21-22)
13 Niibuwo Yesu aalu̱ghi̱ye mu di̱si̱tu̱li̱ki̱ti̱ ya Galilaaya, aaghenda haa kyambu kya maasi Yolodaani̱ Yohaana kumubati̱ja.
14 Bhaatu Yohaana aabbala kubhenga, aaghila Yesu ati, “Ni̱i̱si̱ye nkwetaaghisibuwa uwe kumbati̱ja, ti̱ uwe waasa oti si̱ye nkubati̱je?”
15 Yesu aamukuukamu ati, “Endindi niikuwo kibhonganuuwe kuba kitiyo. Tukulaghiluwa ku̱u̱su̱li̱i̱si̱ya bikoluwa bi̱hi̱ki̱li̱i̱ye byona.” Du̱mbi̱ Yohaana aasi̱i̱ma aabati̱ja Yesu.
16 Yesu makamala ati kubati̱i̱ji̱buwa, du̱mbi̱ aalu̱gha mu maasi. Bwile obu bwonini aabona eghulu li̱i̱ghu̱li̱ki̱ye, aabona Mwoyo wa Luhanga naalu̱gha eghulu, aasa aamu̱su̱ndʼo nga ki̱i̱bbi̱mbo.
17 Niibuwo elaka lyalu̱ghi̱ye mu eghulu ndighila liti, “Nuuwe Mwana wanje oghu nku̱ndi̱ye, oghu needheedheeu̱we.”