Bbaluwa yaakabili eghi
Peetelo
Aahandi̱i̱ki̱ye
Kwanjula
Mukwenda Peetelo akahandiikila Baki̱li̱si̱taayo bbaluwa eni, haa bwile aabaagha amani̱ye ngoku ali haai kwituwa. Aabbalagha ku̱u̱su̱ki̱ya Baki̱li̱si̱taayo kuukalagha bwile bwona mu mulingo ghu̱dheedhi̱ye Luhanga. Mu bbaluwa eni abeekambi̱i̱si̱i̱ye kutaleka kumanya Luhanga na Yesu Ki̱li̱si̱to oghu eye eenini hamui na banji abaakaayʼo na Yesu baabateebeji̱yʼo.
Aabahabula haa beegheesi̱ya baa bisubha abaasagha mu bi̱bbu̱la bya bahi̱ki̱li̱ja. Beegheesi̱ya baa bisubha aba baaleetelejagha Baki̱li̱si̱taayo kwetwalikani̱ya mu milingo ya bu̱syani̱ kandi kuukala mbaghu̱lu̱ka-ghu̱lu̱ki̱ya haa kukuuka kwa Ki̱li̱si̱to. Bhaatu Peetelo abaghi̱li̱ye ati Ki̱li̱si̱to majima kuwo akukuuka. Luhanga aku̱hwelekeeleli̱ya buhanguwa obuliho endindi. Aku̱ku̱u̱ki̱yʼo buhanguwa buhyaka bu̱hi̱ki̱li̱i̱ye obutaakubaamu kibhi.
1
1 Si̱ye Si̱mooni̱ Peetelo, mu̱heeleli̱ya kandi mukwenda wa Yesu Ki̱li̱si̱to, ni̱i̱si̱ye naahandiikila enu̱we abaaheebeeu̱we ku̱hi̱ki̱li̱ja kwa muhendo okwengaane na okwatu. Ku̱hi̱ki̱li̱ja oku ku̱ku̱lu̱ghagha mu bwengani̱ja bwa Luhanga, Mu̱ju̱ni̱ waatu Yesu Ki̱li̱si̱to.
2 Luhanga abaghilile ngughuma sikani̱ye kandi abahe mpempa yonkaha ngoku mukweyongela kumanya Luhanga hamui na Mukama waatu Yesu Ki̱li̱si̱to.
Kuukalʼo nga bakwami̱li̱li̱ baa Ki̱li̱si̱to
3 Mukama waatu Yesu Ki̱li̱si̱to haabwa maani̱ ghe ghaa bwaluhanga, akatuha bilungi byona ebi tukwetaaghisibuwa mu bwomi̱i̱li̱ bwatu. Aatu̱gu̱bhi̱i̱si̱ya ku̱hu̱ti̱ya Luhanga, kukwama mu kumanya Ki̱li̱si̱to oghu akatubilikila haabwa ki̱ti̱i̱ni̱sa kiye na bulungi buwe.
4 Kukwama mu bu̱toki̱ bwa bwaluhanga buwe obu, akatulaghani̱ja mi̱gi̱sa yakuswekani̱ya ya muhendo. Ti̱ kukwama mu ndaghaano esi, mugubhe kutaba na kabhi koona akakuleetuwa kweghomba kubhi kwa munsi muni, kandi mutunge haa bwaluhanga buwe.
5 Nahabweki mutʼo ku̱lu̱ na nkokolo, kwongela haa ku̱hi̱ki̱li̱ja kwanu ngeso sisemeeye; haa ngeso syanu sisemeeye, mwongelʼo kwetegheeleli̱ya;
6 kandi haa kwetegheeleli̱ya kwanu, mwongelʼo kwelinda; kandi haa kwelinda kwanu, mwongelʼo ku̱gu̱mi̱si̱li̱ja, kandi haa ku̱gu̱mi̱si̱li̱ja kwanu, mwongelʼo ku̱hu̱ti̱ya Luhanga;
7 haa ku̱hu̱ti̱ya kwanu Luhanga, mwongelʼo kughililana kisa nga bahi̱ki̱li̱ja; haa kughililana kwanu kisa, mwongelʼo kukundangana.
8 Kaakuba muba na bilungi ebi byona kandi byeyongela kubakanamu, kikubakoonela kutaba bantu abatali na mughaso kandi abatali baghala mu kwetegheeleli̱ya kwanu haa bikwetʼo Mukama Yesu Ki̱li̱si̱to.
9 Bhaatu muntu weena ataabaaye na bintu bilungi ebi, akuba ali nga muntu akubonagha ebya haai-haai kedha ngʼoghu aaghaaye maaso, kandi aabuluuwe ngoku Luhanga aamunaabi̱i̱yʼo bibhi aakolagha.
10 Nahabweki bahi̱ki̱li̱ja baanakyanje, mutʼo ku̱lu̱ na nkokolo kwoleka majima kuwo ngoku muli mu bantu aba Luhanga aakomi̱ye kandi aabilikila. Nanga nimweyongeeye kukola bintu ebi tamu̱ku̱lu̱gha haa ku̱hi̱ki̱li̱ja kwanu bbaa.
11 Mukama kandi Mu̱ju̱ni̱ waatu Yesu Ki̱li̱si̱to alibeebali̱ya kwonini kutaaha mu bu̱lemi̱ buwe bwa bilo nʼebilo.
Ku̱u̱su̱ki̱ya bahi̱ki̱li̱ja Ebyahandi̱i̱ku̱u̱we
12 Nahabweki bikoluwa bilungi ebi nkweyongela kuukala ninaabaasu̱ki̱ya biyo, nankabha muba mubimani̱ye kandi munagumiiye haa majima agha baabeegheeseei̱ye.
13 Nkweli̱li̱kana nti, nkilungi kuukala ninaabaasu̱ki̱ya biyo ku̱hi̱ki̱ya nku̱u̱ye ndu̱ghi̱ye mu mubili ghuni,
14 nanga nkimani̱ye ndi haai ku̱ku̱wa ku̱lu̱gha mu mubili ghuni, kusighikila ngoku Mukama waatu Yesu Ki̱li̱si̱to angambiiye.
15 Kandi nkukola na maani̱ kulola ngu mwetegheeleli̱ya bintu ebi naabaghambiiye ebi, niikuwo ninaaku̱u̱ye muukale nimunabiisuka.
16 Obu twabaghambiiyʼo haa maani̱ kandi na kukuuka kwa Mukama waatu Yesu Ki̱li̱si̱to, tatwabaghambilagha bisubha. Ki̱ti̱i̱ni̱sa kyamaani̱ kya Luhanga eki, etu̱we boonini tukakyebonela bbeni̱-bbeni̱ na maaso ghaatu.
17 Nanga obu Ese wee Luhanga aamu̱hu̱ti̱yagha kandi naamuha ki̱ti̱i̱ni̱sa, tukaaghu̱wa elaka ndi̱lu̱gha ewaa Luhanga wa ki̱ti̱i̱ni̱sa kyamaani̱. Elaka eli lyaghila liti, “Oghu niiye Mwana wanje oghu nku̱ndi̱ye, kandi oghu needheedheeu̱we.”
18 Etu̱we boonini tu̱keehi̱ghwi̱la elaka elyalu̱ghi̱ye eghulu eli obu twabaagha tuli hamui na Mukama Ki̱li̱si̱to haa mwena ghwa Luhanga ghu̱hi̱ki̱li̱i̱ye.
19 Ti̱ eki niikiyo kikulekagha tumanya ngoku butumuwa bwa balangi̱ ghali majima. Nkikulu munu enu̱we kwegha butumuwa obu ku̱bbeni̱ye mitima yaanu niikuwo mube na kunihila ngoku Yesu alikuuka. Kunihila oku kuli nga taala babhaki̱i̱ye mu mweli̱ma ku̱bbeni̱ya ku̱hi̱ki̱ya nsooli̱ya ya nkyambisi eboneki̱ye.
20 Kwongela haa ebi byona mubhonganuuwe kumanya ngu taaliyo bulangi̱ bwona obuli mu Ebyahandi̱i̱ku̱u̱we obu mulangi̱ eenini eehanga-hangi̱ye.
21 Nanga taaliyo mulangi̱ nʼomui oghu akeetuma eeninini, bhaatu Mwoyo Ahi̱ki̱li̱i̱ye niiye aabagu̱bhi̱i̱si̱yagha ku̱bu̱gha bighambo bya Luhanga.