9
Luhanga na bantu be
1 Nkwete ku̱bu̱gha majima mu Ki̱li̱si̱to, tankwete kuha bisubha bbaa. Mwoyo Ahi̱ki̱li̱i̱ye amani̱ye ngoku mutima ghwanje ghu̱bbeni̱ye.
2 Ni̱i̱ghu̱u̱ye ntuntuuye kwonini kandi mutima ghunsaaliiye munda.
3 Nangwekumbuuye Luhanga ankiina kandi anfoola kinughuwa ewaa Ki̱li̱si̱to mu ki̱i̱kalo kya Banai̱saaleeli̱ baanakyanje kandi nganda syanje.
4 Niibo Banai̱saaleeli̱ aba Luhanga aafooye baana be. Baabona ki̱ti̱i̱ni̱sa kiye. Aabaha ndaghaano yee na bilaghilo biye. Aabooleka mulingo babhonganuuwe kumulami̱li̱yamu, kandi kukwama mu ebo, niiyo Luhanga aalaghi̱i̱sani̱i̱ye kujuna bantu.
5 Ni baasukulu baa baataata baatu. Ti̱ mu ebo niiyo baabyaliiye Ki̱li̱si̱to oghu ali Luhanga kandi oghu alemi̱ye bintu byona. Niiye bantu boona babhonganuuwe kusinda bilo nʼebilo. Aami̱i̱na.
6 Kini takikumani̱i̱si̱ya ngu mi̱gi̱sa eghi Luhanga aalaghi̱i̱sani̱i̱ye Banai̱saaleeli̱ tayaabaayʼo, nanga tabali Bayu̱daaya boona abali Bayu̱daaya boonini.
7 Kandi nankabha Bayu̱daaya boona bali baasukulu baa Ebbulahi̱mu̱, boona tabali baasukulu be boonini, nanga Luhanga akamughila ati, “Baana baa I̱saka bonkaha niibo nkubala kuba baasukulu baawe.”
8 Kuba muusukulu wa Ebbulahi̱mu̱ mu bubyaluwa takikufoolagha muntu kuba wa Luhanga, bhaatu aba bonkaha abaku̱hi̱li̱jagha eki Luhanga aalaghi̱i̱sani̱i̱ye ngoku Ebbulahi̱mu̱ aahi̱ki̱li̱i̱je eki Luhanga aamulaghiisani̱i̱ye.
9 Nanga Luhanga akaghila Ebbulahi̱mu̱ ati, “Bwile bu̱ku̱hi̱ka obu nkukwoleka bu̱toki̱ bwanje, mukaawe Saala aku̱byala mwana wabusaasa.”
10 Mwana oghu ni taata waatu I̱saka, oghu akakula aaswela Lebbeeka, aamubyalʼo balongo.
11-12 Bhaatu balongo aba batakabyahuwe, kandi batakakoli̱ye kintu kyona kilungi kedha kibhi, Luhanga aaghambila Lebbeeka ati wʼobuto niiye akulema wʼobukulu. Eki kyoleka ngu kukoma kwa Luhanga takusighikiiye hʼebi bantu bakukolagha.
13 Ngoku kihandi̱i̱ku̱u̱we ngu Luhanga aaghila ati, “Nkukunda Yakobbo bhaatu noohe Esau.”
14 Buuye tu̱bu̱ghe ki? Tughile tuti Luhanga taali na bwengani̱ja? Majima kuwo bbaa!
15 Hambele Luhanga akaghila mulangi̱ Musa ati,
“Nkughilila ngughuma oghu mbbali̱ye kughilila ngughuma,
kandi nkughilila kisa oghu mbbali̱ye kughilila kisa.”
16 Nahabweki kukoma kwa Luhanga oku takusighikiiye haa kwekumbula kwa muntu kedha kwekamba kuwe, bhaatu kusighikiiye haa kisa kya Luhanga.
17 Niikiyo kyaleki̱ye mu Ebyahandi̱i̱ku̱u̱we Luhanga aaghila Falaaho ati, “Kighendeleluwa ekyaleki̱ye naakufoola mu̱lemi̱ niikuwo ngu, haabwawe bantu bagubhe kubona ngoku ndi na bu̱toki̱ niikuwo bantu bakani̱ye munsi aba bakulangilila, bagubhe kumanya si̱ye Luhanga.”
18 Nahabweki Luhanga akughililagha kisa oghu abbali̱ye kukighilila, kandi atimbiikani̱ya mutima ghwʼoghu abbali̱ye kutimbiikani̱ya.
19 Muntu akugubha kungila ati, “Taaliyo oghu akugubha kubhenga ntegheka ya Luhanga, ti̱ ekikuleka naanatusoghosa nkiki?”
20 Eki nkukikuukamu nti, bhaatu uwe muntu kwonkaha, nuuwe ani̱ kukuukamu Luhanga? “Buuye eki babu̱mbi̱ye kikugubha ku̱bu̱u̱li̱ya oghu aaki̱bu̱mbi̱ye kiti, ‘Ekyaleki̱ye wambumba oti nkiki?’ ”
21 Mu̱bu̱mbi̱ wa minagha taali na bughabe mu kibumba kimui kubumbamu munagha ali na kighendeleluwa kya ku̱ghu̱koleesi̱ya bintu bya mughaso, mu ebumba eli atodhe abumbemu bintu bya ku̱koleesi̱ya milimo ya bu̱li̱ kilo?
22 Buuye mumani̱ye mu̱ti̱ya? Nankabha Luhanga naabbalagha ku̱hwelekeeleli̱ya abaamukwati̱yagha ki̱i̱ni̱gha, haabwa kwoleka bu̱toki̱ buwe akabagu̱mi̱si̱li̱ja kwonini haabwa ngughuma siye sikani̱ye ataabahwelekeeleli̱ya.
23 Akaghendelela kwoleka ki̱ti̱i̱ni̱sa kiye kikani̱ye haa bantu akughilila ngughuma, aba mu ntandiko aasangu̱u̱we ateekani̱i̱je kuha ki̱ti̱i̱ni̱sa.
24 Otaayemu naatu dhee aba aabilikiiye ku̱mu̱hi̱ki̱li̱ja, taali Bayu̱daaya bonkaha, bhaatu na batali Bayu̱daaya.
25 Mu kitabo kya Hoseya Luhanga akaghila ati,
“Endindi abatali bantu banje, ndibaghilamu, ‘bantu banje,’
aba ntaku̱ndi̱ye endindi niibo ndighilamu ‘bantu banje nku̱ndi̱ye.’ ”
26 Kandi,
“Kilijooka ngu mu ki̱i̱kalo kyonini hambali aabaghambiliiye ati,
‘Tamuli bantu banje,’
niiho balibaghililamu ‘baana baa Luhanga mwomi̱i̱li̱.’ ”
27 Mulangi̱ I̱saaya hambele akabu̱gha nʼelaka lyamaani̱ obu aabu̱ghagha na Banai̱saaleeli̱ ati,
“Nankabha Banai̱saaleeli̱ bakana ngoku musene ghwa ki̱si̱yo kya nanja ghukani̱ye,
bhaatu bakee mubo niibo balijunuwa.
28 Nanga Mukama amaliliiye kufubila bantu boona baa munsi,
akukikola bwangu kandi mulundi ghumui.”
29 Kili kwonini ngoku I̱saaya hambele aaghi̱li̱ye ati,
“Nguli Mukama wa bu̱toki̱ bwona
ataati̱ghi̱yʼo bantu bakee mu etu̱we,
twangu̱hwelekeleeye nga bantu baa Sodomu,
kandi tu̱twi̱ka nga bantu baa Gomola.”
Banai̱saaleeli̱ kutahi̱ki̱li̱ja Ki̱li̱si̱to
30 Eki nkumani̱i̱si̱ya ni ngu, batali Bayu̱daaya abateekambi̱ye kukola ebi bilaghilo bilaghiiye niikuwo babe bahi̱ki̱li̱i̱ye, bakaba bahi̱ki̱li̱i̱ye haabwa ku̱hi̱ki̱li̱ja Ki̱li̱si̱to.
31 Bhaatu bantu baa I̱saaleeli̱ abeekambagha kuba bahi̱ki̱li̱i̱ye haabwa kukola ebi bilaghilo bilaghiiye, tabaafooki̱ye bahi̱ki̱li̱i̱ye bbaa.
32 Ekyaleki̱ye batafooka bahi̱ki̱li̱i̱ye, ni nanga beekambagha kuba bahi̱ki̱li̱i̱ye etali haabwa ku̱hi̱ki̱li̱ja Luhanga, bhaatu haabwa bikoluwa bakukola. Baaba nga bantu bakobhoki̱ye ebaale elikuleka mbeegenga.
33 Ebyahandi̱i̱ku̱u̱we bi̱ghi̱li̱ye ngu:
“Olole, nkuta mu kibugha kya Sayu̱u̱ni̱
ebaale lyakukobhoka,
kandi kibaale kyakubagenga,
ti̱ weena oghu aku̱mu̱hi̱ki̱li̱ja, taalihemuka.”