15
Bifubilo musanju̱ byokumaliilila
1 Naabona mu eghulu kintu kinji kyamaani̱ kandi kyakuswekani̱ya. Naabona baamalai̱ka musanju̱ abali na bifubilo musanju̱ byokumaliilila. Nanga ebi niibiyo Luhanga aamaliliiyemu ki̱i̱ni̱gha kiye.
2 Naabona dhee kintu ki̱su̱si̱ye nanja yeeleeye kimui dhiyo nga gilaasi etabuuyemu mulilo, nʼabaasi̱ngu̱u̱ye kisolo, na kisasani̱ ki̱su̱si̱ye kisolo eki, na namba ya li̱i̱na lyakiyo. Bantu aba bakaba baamiliiye haa ki̱si̱yo kya nanja eghi esu̱si̱ye gilaasi. Bakaba bakwete du̱ngu̱ esi baakoleesi̱yagha kulami̱ya Luhanga.
3 Baalimbagha kilimbo kya Musa mu̱heeleli̱ya wa Luhanga, na kya Kyana kya Ntaama bati,
“Uwe Mukama wa Bu̱toki̱ Bwona,
bikoluwa byawe mbikulu kandi byakuswekani̱ya!
Nuuwe Mukama wa mahanga ghoona,
bihanda byawe bi̱hi̱ki̱ye kandi mbyamajima!
4 Nuuwe Mukama oghu bu̱li̱ muntu weena abhonganuuwe ku̱hu̱ti̱ya,
kandi kuha ki̱ti̱i̱ni̱sa,
ti̱ uwe wenkaha nuuwe ohi̱ki̱li̱i̱ye!
Kandi bantu bakani̱ye bʼomu mahanga ghoona
baliisa bagumbaane kukulami̱ya,
nanga okwolekagha bu̱li̱ muntu weena
ngoku oku̱twi̱lagha bantu musango mu bwengani̱ja.”
5 Haanu̱ma yʼebi, naabona mu eghulu Numba ya Luhanga eeghuuye, elimu weema ehi̱ki̱li̱i̱ye,
6 baamalai̱ka musanju̱ abaabaagha na bifubilo musanju̱, baatuwa mu Numba ya Luhanga eghi. Bakaba balu̱wete nkanji̱ sinjelu dhiyo kandi balu̱wete mi̱ci̱pi̱ ya feeja.
7 Niibuwo kimui mu bihanguwa bbinaa byomi̱i̱li̱ kyahaaye baamalai̱ka musanju̱ bibindi musanju̱ bya feeja biisuuyemu vi̱i̱ni̱. Vi̱i̱ni̱ eghi yoolekagha ki̱i̱ni̱gha kya Luhanga, oghu aliyo bilo nʼebilo.
8 Numba eghi yaasulamu mwi̱ka ku̱lu̱gha haa ki̱ti̱i̱ni̱sa kya Luhanga na mu maani̱ ghe, kandi taaliyo muntu nʼomui oghu akagubha kutaaha mu numba eghi ku̱hi̱ki̱ya bifubilo musanju̱, ebi baamalai̱ka musanju̱ baaghendagha kuha bantu bihooye.