LA CARTA DEL APOSTOL SAN PABLO A
TITO
Pablo ja ye quirica edeahue Tito tiametaidha. Ye quirica sa quimisha capítulo bahui yani. Pablo ja Tito buetsuataidha cuaja dharejiji cuana huidusume a taji. Daja huecha deretaidha cuaja dharejiji huidusuji cuana sa pu taji.
Ye versículo cuana da ebia su saida quita ebuetsuati puji:
1.9
3.4,5
1
Pablo ja Tito quirica tiametana
1 Ema da Pablo Diusu sa emebajaji.
Cristo sa apóstol da ema. Tuahueda ema mesa dharejiji cuana peje su beitutana mesa jabuetsuati cuana yama ebuetsua huecuana puji. Daja yama yainia Diusu pashanapaenita huecuana puji.
2 Biahua tiempo Diusu ja mesa jamitsuti ichataidha, ahua quebata papu tu peje su enimetucheati su, tueda eid'e yameenitayu. Diusu aimue bid'umimi epuani mahue.
3 Jiahue cristiano cuana mesa quisa saida cuana eshanapametani ema quisaquisa epuani jepuiti. Ecuana Déji su Aji Diusu ja ema huaratiatana mesa quisa saida cuana quisaquisa epu puji.
4 Tito, yama mi ye quirica etiameinia. Mida da quema Cristo jepuiti ebacua. Tata Diusu, ecuana Déji su Aji Jesucristo detse ja ibunebataque. Tuatseda nimepijajametaque.
Tito ja Diusu mebajatana Creta edhapupu su
5 Tito, Creta edhapupu su mi yama ichajusiana dapia mi Diusu emebaja puji. Yama Diusu sa mudu apiruana miada yapeyu puji, yama mi ichajusiana. Pamapa ejude cuana je Diusu sa dharejiji cuana sa ehuidusuji huaratiaque puji yama mi cuatsasiana, mi neje ema anina su.
6 Ehuidusuji cuana sa saida, butsepi ani taji aimue aiya biame patuaquisata huecuana mahue puji. Ehuidusuji cuana sa piada ehuaneji cama bahui pu taji. Tuna sa ebacua cuana sa Diusu peje su jei pu taji. Saida padusutita huecuana cristiano cuana neje. Be a taji mahue paputa huecuana aimue aiya biame patuaquisata huecuana puji mahue.
7 Ehuidusuji cuana sa saida, butsepi puniuneti taji, Diusu sa quisaquisa puji huecuana putsu. Be tuneda ebia su aida pabatita. Be nimemadhada, duinini aida, tsetse aida, icheiche aida paputa huecuana. Be cristiano cuana pabaseata huecuana chipilu inatsu puji.
8 Ai hora biame epereji cuana epuetani su, ehuidusuji cuana sa saida ba taji huecuana. Mecuana sa ai saida cuana bahui a taji. Jatupuatiji, butsepi mecuana sa pu taji. Diusu sa puji ichaderajiji mecuana sa pu taji.
9 Cuaja Diusu sa ene quita jabuetsuati cuana jabuetsuatiana batame, daja mecuana sa puderati taji. Tuneseda Diusu sa mimi pia cuana buetsua taji. Jei ame taji Diusu sa puji madhada hue emimitani cuana.
10 Beju deja a taji mahue cuana jucuada yani. Ebia su yanita judío cuana duju su. Tuneda bid'umimi jabuetsuati cuana ebuetsuatani cristiano cuana ebasea puji.
11 Mitaname taji pamimiderata huecuana mahue puji. Tuneda familia quitaita cuana ebaseametani. Ai bid'umimi cuana ebuetsuatani huecuana chipilu einatsu epu puji.
12 Biahua tiempo Creta edhapupu su piada profeta anidha. Creta edhapupu su aniji cuana jepuiti uja puidha: “Creta edhapupu su aniji cristiano cuana da bid'umimi aida puji. Tuneda da animalo d'aida cuana nime. Diadia aida, tunada huecuana.” Daja puidha profeta tuna jepuiti.
13 Beju tusa quisa da ene quita, butsepi. Da putsu, Tito, miqueda puji jubida d'aya taji huecuana nimebutsepi Diusu butse su paputa huecuana puji.
14 Jubida butsepia taji huecuana judío cuana sa bid'umimi jabuetsuati cuana paid'abata mahue huecuana puji, daja huecha Diusu sa mimi jei aja mahue cuana sa jacuatsasiati cuana paid'abata mahue huecuana puji.
15 Ahua quebata cristiano cuana saida, butsepi epibatiani su, tuneseda puji pamapa ai cuana da saida butsepi. Ahua quebata cristiano cuana madhada hue epibatiani su, ahua aimue Diusu peje su jei eputani mahue su, tuneseda puji mue ai biame saida, butsepi mahue, tuna sa piba cuana da adhida putsu.
16 Tuneda pa Diusu eshanapatani eputani biame, aimue daja mahue, madhada hue edusutitani huecuana putsu. Ebia su ate, a taji mahue, ai saida papu biame a bue mahue ta huecuana.