2
Moaɓe nuiti daalɔɠɔma
1 Ɠɔoɠɔ GALAGI wooi ɠaa:
«Moaɓe nuiti ti tɔ koloɠolo mɔinmɔin kɛɛʋɛ, da ge leʋe.
Naa ɠa é ba, gè la zeɠea nà-devei ʋolu pɛ.
Mazɔlɔɔ ti Edɔme masagi ma ɠaeiti galani,
ti kɛ ga sɛɠɛ yuʋui.
2 Nà ʋaazu abui losu Moaɓe yooi ʋa,
toɠa poluzeizuʋɛti gala Keliyɔte taazuʋɛ,
Moaɓe nuiti undaa ɠa ʋili faa wuuleegi zaama,
kɔɔ ɓee wooi ta koolei lugi zaama.
3 Gè ta-masagi zuwuɠaaleʋe, ta ta-ɠundiɠiiti pɛ.»
Ɠɔoɠɔ GALAGI ɠa é boga.
Zuda nuiti daalɔɠɔma
4 Ɠɔoɠɔ GALAGI wooi ɠaa:
«Zuda nuiti ti tɔ koloɠolo mɔinmɔin kɛɛʋɛ, da ge leʋe.
Naa ɠa é ba, gè la zeɠea nà-devei ʋolu pɛ.
Mazɔlɔɔ ti ɠɛlɛni nà-tɔgi ʋa,
ti la nà-deveiti soni,
ti ɓɔɠɔ ʋilɛga kakagi zu, zɛɛ ɠalagiti polu,
niiti ti-mɛmɛwolani ti ʋilɛni ti ʋolu mɔungi.
5 Nà ʋaazu abui losu Zuda yooi ʋa,
toɠa poluzeizuʋɛti gala Zeluzalɛme taazuʋɛ.»
Izilayɛle nuiti daalɔɠɔma
6 Ɠɔoɠɔ GALAGI wooi ɠaa:
«Izilayɛle nuiti ti tɔ koloɠolo mɔinmɔin kɛɛʋɛ, da ge leʋe.
Naa ɠa é ba, gè la zeɠea nà-devei ʋolu pɛ.
Mazɔlɔɔ ti sɔbalala nui ʋɔdini,
kuye walii vaa zu nii é la zooni salazu,
ti bala nui ʋɔdi, saʋala gila fai zu.
7 Ta ziɛzu bala nuiti ma,
ti ɗa naati un golo fufiligi zu,
ti ɗa toomai ɠɛ ga maawɔin nuiti.
Doun zunui ta kɛɛɠɛ ti ɗa ɓɔɠɔ maavalibo anzalopo ɠilagi ma,
ti ɗa ɓaaɠula dàasei ɲadegai ma ga naama vai.
8 Ta-zalaɠa ɠulazuʋɛ ɠilagilagi kpein,
ta ʋuuni kpɔunma zeɠeiti su.
Ta-ɠala fali ʋɛlɛiti bu,
ta dɔɔi ɓɔlezu nii ti kulaai nuiti zea ga tɔgi.
9 Nà ma, gè Amool nuiti undaaʋilini wo ʋɛ,
nui niiti ti ɠoozani eɠɛ sɛdele gului,
ti ɓakpaai ga sɛne guluiti kɛʋele.
Gè ti ɠoloɠoloni, é zo ti-ma zapeiti ma,
é zeeli ti-ma waaiti ma.
10 Naa ʋa ɠɛ, nà ɠa gè wo ɠulani Ezipete yooi zu,
gè lo wo luɠɔ kona ʋuunaanigɔ (40) laawu teʋebai zu,
nii a kɛ gè Amool nuiti ta-yooi ve wo ʋɛ ga wɔnɔ.
11 Naa ʋoluma, gè GALA goo wo nuiti buzeɠeni wo-loun zunuiti saama,
gè tanigaa wuzeɠe wa-wuzeɠe niinɛgiti saama,
niiti ti ɓɔɠɔ ɠalivaai Ɠɔoɠɔ GALAGI ma.
Nà wo ɠaazaɠasu, Izilayɛle nuiti,
ʋele lɛi é ʋa ɠɛ la ɓaa?»
Ɠɔoɠɔ GALAGI wooi ɠana.
12 «Tama, wo dɔɔi logɛ naama nuiti da, ti kpɔɔle, niiti ti ɓɔɠɔ ɠalivaai,
wo ɠɛ GALA goo wo nuiti ma,
ti mina mɔ ɓɔɛ dàaseigi zu.
13 Naa ɠa é ba, ʋɛ wo ná, nà wo ɠoloɠolosu ná,
eɠɛʋelei wotoloi a ɗa pɔlɔi ɠolo la ɠɔɠɔwu,
siɛgi zu daavegai la ga molo ɠiliiti.
14 Zɔi suvilaai ɓizɛzu, naa la lɔɔɠuzu zɔlɔɔga,
zɛbɛsu nuiti ti la zooga zɛbɛi lɛɛzu,
kɔɔɠuluɓa wolaiti ti la zooga ɓɔɠɔ ɠizosu.
15 Mɛɛn ʋili nuiti ti la yɛga losu kpaan,
kɔɔi la ʋoola kpizɛ wo nu wolai ʋa,
soo ɓizɛ zalaʋusui la ɓalaa yɛnvui yɛga ʋoluzu.
16 Kɔɔɠuluɓa wolai ɠa ʋela ga ɠabei naama voloi,»
Ɠɔoɠɔ GALAGI wooi ɠana.