4
Samali anzanuiti
1 À woilo nii ma gè bosu wo ma,
Ɓasan nikɛ zaaiti ti zeini Samali ɠizeiti ma.
Wa toomai ɠɛɛzu ga maawɔin nuiti,
wa bala nuiti maanɔɠɔzu,
wo ɗa ɠɛ wo-zinigiti ma: «À ʋa ga gi-ɓɔɔle anii gi ʋɔ!»
2 Maliɠii Ɠɔoɠɔ GALAGI ɠonaa ná-ɲadedai ma, é ɠɛ ma:
«Foloi tanigaa ta ʋaazu, ta wo mɛɛn ga kalagi, wo ɠilagilagiti.
3 Wo pɛ wa ɠula taai ʋa ga zeɠeiti su ʋelei niiti ti siɠigi ʋa,
ɛsɛ ge ɗa li ga letegi.
Ta wo ɓɛ, wo li ga lɛkpɛmaʋɛ nu ɠɔʋɛzu ʋelei,»
Ɠɔoɠɔ GALAGI wooi ɠana.
Zɛɛ ɠala pelei
4 «À li Ɓetɛle, wo tɔgi ɠoloɠolo,
wo li Gilegale, wo ta ʋɛɛ tɔ koloɠologi ʋa ná!
À wa-zalaɠaiti kula ga sobuzobui,
wo wa-ʋuusiɛiti kula folo saʋagɔ-o-folo saʋagɔ!
5 À wa-mama fee zalaɠaiti kula ga ɓului nii lɛʋɛi su.
À zeze ga wa-vebɛaniiti wo ti veezu bɛ̀,
tɔɔzei naa ɠa nɛai wo ʋɛ, Izilayɛle nuiti,»
Maliɠii Ɠɔoɠɔ GALAGI wooi ɠana.
6 «Nà ma, gè pului loa wo ma wa-laaiti pɛ su.
Daamiani balagi ɠa wa-ʋɛlɛiti pɛ bu.
Kɛlɛ anɛɛ naa ʋe, wo la ɠaleni ma pɔ̀ bɛ,»
Ɠɔoɠɔ GALAGI wooi ɠana.
7 «Alu saʋagɔ yɛgɛ ʋoluzu molo leʋei ʋa zeeli,
gè wo ɠoma ga tonai.
Gè tonai ʋu taai gila su,
tona la ʋuuni zɔɔma laai zu.
Gè tonai ʋu kpalagi gila su,
ta la ʋuuni zɔɔma ɓalagi zu.
Kpalagi nii tona la ʋuuni su,
naa vɔ ma, tona ʋalagi ʋɛ.
8 Taa felegɔ ɓaa saʋagɔ zu nuɓusɛiti
ti ɗa li taa ɠilagi zu, ti ʋa ɓɔɔle,
tama ti la ziɛ zɔlɔɔni ga mɔinɗa
é ʋa kpɔɔle wɔin zeɠe ti ma.
Kɛlɛ anɛɛ naa ʋe, wo la ɠaleni ma pɔ̀ bɛ,»
Ɠɔoɠɔ GALAGI wooi ɠana.
9 «Gè siinziin ganigiti ta-zeeɓɛiti pɛɛni wa-ɓalaga aniiti ba.
Gè kotogiti teʋeni ti wa-ɓeleiti
ta wa-leezɛn ɓeleiti suɠoloɠolo,
naa ʋɛɛ wolive wuluiti ba ta kooleɠoole guluiti.
Kɛlɛ anɛɛ naa ʋe, wo la ɠaleni ma pɔ̀ bɛ,»
Ɠɔoɠɔ GALAGI wooi ɠana.
10 «Gè ɗɔfɔ zeeɓɛi ʋili wa-loganiiti saama,
ʋelei gè kɛɛni la ga Ezipete yooi.
Gè wo zili nui yɛ ná, é wa-zunu loungoiti paa ga boɠa zɔkpɔi, é wa-zooiti so.
Poomaiti makugi ɗa lɛ wo-zokpaiti su wa-ɠɔɔlaaɠai zu.
Kɛlɛ anɛɛ naa ʋe, wo la ɠaleni ma pɔ̀ bɛ,»
Ɠɔoɠɔ GALAGI wooi ɠana.
11 «Gè nimizai yeini wo ma,
ʋelei mɔungi gè kɛɛni la ga Sɔdɔme, ta Gomɔɔl.
Wo ɠulaʋɛ naa zu, eɠɛ koʋileʋegi nii kulaai abuzogi zu.
Kɛlɛ anɛɛ naa ʋe, wo la ɠaleni ma pɔ̀ bɛ,»
Ɠɔoɠɔ GALAGI wooi ɠana.
12 «Naa ɠa é ba, ee, Izilayɛle, wɛlɛna è zopelena ʋa bɛ̀!
Tɛi tama ʋele ɠana gè ʋaazu è zosu da,
ee, Izilayɛle, ɠɛʋele ɓɛtɛ, è ɗa-ƓALAGI laaɠomi!»
13 Mazɔlɔɔ kɛni è dama:
Tɔ ɠa é gizeiti kpɛtɛa, é fiilɛi ɓɛtɛ,
tɔ ɠa a ɗa ɠisu vai lɛ ga nuɓusɛiti,
toɠa ɗa geelaalaosuʋɛ maavalibo ga kpidii,
toɠa ɗa ziɛ zooi ma ada ɠaaɠoozagiti,
daaseigi ɠa ga Ɠɔoɠɔ GALAGI, Fai-Pɛ-Maliɠii!