4
Zɛnvu zu naavoloi é pɔlɔ liɠiiti su
1 Naa ɠa é ba, tɔɔzei GALA ná-botii ɠɛʋelei ɠana, nii é kalivaa gi ma ná-maawɔinɠai zu, gi iɲɔ ge la leʋezu.
2 Gi unfetala vai pɛ piliga ya, niiti ti ɠɛɛzu dɔɔɠuzu, gi la ziɛzu ga keleɠele ɲɔi, gi la GALA daawooi zeɠezu ma. Kɛlɛ tɔun gaamai ɠa gi dɛɛzu kpezekele, nii a kɛ gi nuɓusɛiti pɛ ta-ɠisiɛi zɔlɔɔ GALA gaazu.
3 Ni Woo Niinɛ Ʋagɔi gi daazeelizu gaaɓidiʋɛ dɛ, gaaɓidiʋɛ naati nɔ ʋɛ, niiti ti undaaʋilisu,
4 kidaaleʋelala nuiti, niiti niima eteai ná-galagi ta-ɠisiɛiti gaazuɠoleai, nii a kɛ, ti mina Kilista ná-lɛbiyai ma Woo Niinɛ Ʋagɔi ɠaa, é volozu, Kilista nii é ga GALA maaniinigi.
5 Gi la gá ɓɔɠɔi gá-vaa laazeelizu, kɛlɛ Yesu Kilista ná-maliɠi vai ɠa gi daazeelizu, gá bosu ga, gá ga wa-wotiɠɛ nuiti Yesu maaʋele ma.
6 Mazɔlɔɔ GALAGI nii é ɠɛni ma: «Wozakalagi volo kpidii zu,» tɔ ɠa ɓalaa é ná-wozakalagi volozu ade-yiimaʋɛti, naa ɠa a kɛ, de GALA ná-lɛbiyai volo ʋele ɠwɛɛ, nii é volozu Kilista ɠaazuʋɛ.
7 Gɛi gi naavoloi tɛi seɠezu pɔlɔ liɠiiti su, ti ga gi-ɓusɛiti, gá naa ɠɛɛzu, naa ɠa a kɛ, zɛbɛ wolai tɛi ge leve ga GALA nɔnɔ, gɔnɔ laade.
8 Gi ɓɔlɔʋɛ ʋele-o-ʋele, kɛlɛ gi la ɓatani. Gi ɠoozuʋiligɛ, kɛlɛ gi-ɠi ge la leʋeni.
9 Ta gi wɔinzeɠezu, kɛlɛ GALA ge la ɠɛlɛni gi ʋa. Ta gi laavalasu zooi ma, kɛlɛ gi la zaazu.
10 Gá Maliɠii Yesu ná-saai zeɠezu gi-ɓusɛi zu yeenɔpɛ, naa ɠa a kɛ, Yesu yɛnvui ɠula kɛlɛma gi-ɓusɛi zu.
11 Gá-eteai zu, yeenɔpɛ ka gi saai laawu la, Yesu maaʋele ma, naa ɠa a kɛ, Yesu yɛnvui ɠula kɛlɛma ɓalaa gi-ɓusɛi zu, é ga saa gelei.
12 Zekana é la, saai ɠa botii ɠɛɛzu gi zu, kɛlɛ zɛnvui ɠa botii ɠɛɛzu wo zu.
13 Eɠɛʋelei naama ɠidaaleʋe yɛnvu ɠilagi gi ya la, eɠɛʋelei sɛʋɛai la, é ɠɛ ma: «Gè ɠidaaleʋeni, naa ɠa é kɛa gè ɓɔɛni,» gá ɓalaagi gi ɠidaaleʋeʋɛ, naa ɠa é kɛɛzu gá ɓalaagi gi ɓɔɛzu la,
14 gi suɠwɛɛ ga GALAGI é Maliɠii Yesu wuzeɠeni, é kula saai ya, toɠa gi wuzeɠe ɓalaa, é gi ɠula saai ya, é gi ɓɔ Yesu ʋa, é ade pɛ to tɔun gaazu.
15 Naati pɛ ka ɠɛɛzu wa-vaa ma, naa ɠa a kɛ GALA ná-zaalai zeeli nu mɔinmɔin ma ga bɔɔlɔa, faanɛɛ wuuɠwɛɛ GALA falii zu ɗa wɔɔlɔ GALA ná-lɛbiyai ʋɛ.
Zɛnvui wo ga kidaaleʋei maaʋele
16 Naa ɠa é ba, ade iɲɔ ge la leʋea pɛ. Anɛɛ ni de-ɓusɛi ɠa wɔlɔzaɠasu vaavaa, ada niinɛzu de-yɛnvui letemazu folo-o-folo.
17 Mazɔlɔɔ kpɔlɔi niiti ade ti zɔlɔɔsu niizuʋɛ, naa veɠagɛ, é ɠɛ ga teʋekɔɠɔzu vaa, ti yɔɠɔzu ma ta ɠɔoɠɔ lɛbiya wolai, é kɛʋele ɓɛtɛzu de ʋɛ.
18 Tɔɔzei ade la ɠaazulosu naama aniiti ba, niiti nu ɠaazuʋɛ ti ɠaazu, kɛlɛ de ɠaazulogɛ naati ba, niiti nu ɠaazu la ti ɠaazu. Mazɔlɔɔ niiti nu ti ɠaazu, naati ta leʋesu, ti ɓe, kɛlɛ niiti nu la ti ɠaazu, naati ka ti yɛsu ná ɠɔ.