13
Wa ɠolo devei kpein bɛ, nii gè feezu wo ya, wo makɛ, à mina tanɔpɛ da ma, à mina tanɔpɛ seɠe ba.
Kɔɔɠɔ gani kɔɔ nuiti maaɠolo vai
Izelayɛle nuiti saama
Tanisu GALA goo wo nui ta ɠa wuzeɠe wo zaama, ɓaa kulakɛlɛma ɠaa nui, é poogi ta ve wo ya, é wo laavɔ, é maaɓɛlɛ vai ta lɛ ga woye. Ni poogi ɓaa maaɓɛlɛ vai é bogai, naa laa a zeelina, é ɠɛ wo ma: «Ade li, de ʋilɛ gala kiligiti polu, de ti lɛbi,» tama wo la galagi naati kwɛɛ, à mina woilo GALA goo wo nui naa wooi ma, ɓaa kulakɛlɛma ɠaa nui naa wooi ma, mazɔlɔɔ Ɠɔoɠɔ GALAGI wa-ƓALAGI seɠeʋɛ ga é wo ʋoluɠula la, nii a kɛ é kwɛɛ ni nɛɛʋɛ wo ʋɛ, gaamai zu, ga wo-yii pɛ, ta wo-yɛnvui pɛ. Ɠɔoɠɔ GALAGI wa-ƓALAGI ɠila kpe nɔ ɠa wa ʋilɛ polu, wo lua ba, wo ɠolo ná-deveiti bɛ, wo woilo goo ma, wo dɛbi, wo ɠili tɔun ba. Maanɛɛʋɛ ga ti GALA goo wo nui naa ʋaa, ɓaa kulakɛlɛma ɠaa nui naa, mazɔlɔɔ kpɔɛʋɛ ga nuiti ti kololalai ɠɛ Ɠɔoɠɔ GALAGI wa-ƓALAGI laalɔɠɔma, nii é wo ɠulani Ezipete yooi zu, é wo ɠula duɔla ʋɛlɛi wu, mazɔlɔɔ é ɠɛni pɔ ga é wo zeɠe pelei ʋa, nii Ɠɔoɠɔ GALAGI wa-ƓALAGI ma levei veeni ga wo ziɛ la. Wa faa ɲɔi lɔɔɠula ɠana ɓɔɠɔ zaama.
Wo wɔɔla mina wo ɠaka
Ni è-ɠɛɛloin, è-lee ná-doun zunui, ɓaa è-loun zunui, ɓaa è-loun anzanui, ɓaa è yiima anzai, ɓaa è-wɔɔlai nɛai è ʋɛ, naa ta a suɠɔɠɔna dɔɔɠuzu ga é è lɛ ga, é ɠɛ è ma: «De li, de gala kiligiti dɛbi,» tama ɗa-o, è-mɛmɛwolani-yo, wo la ɠɛni galagi naati kwɛɛ, galagiti ti wɛɛn nuɓusɛiti saama, ti ɓuɠama, ɓaa ɠoozama, ti zeini, é zo zou ɓela ga, é li zou ɓela ga, mina kisu vai zo, mina woilo goo ma, mina maawɔinɠa, mina maazasa, mina ná-kakagi lɔɔɠu. 10 È maanɛɛʋɛ ga è paa. Yeewuzeɠe daalɔɠɔma mɔunpa, ga è paa, naa ʋoluma, nuɓusɛiti ti ɓɔ è ʋa. 11 Ɗa sɔ ga kɔtui, é za, tɔɔzei wɔin ɠɛa ma ga é è zeɠe Ɠɔoɠɔ GALAGI ʋa, ɗa-ƓALAGI, nii é è ɠulani Ezipete yooi ʋa, duɔla ʋɛlɛi wu. 12 Izelayɛle nuiti kpein ta mɛni, ti lua, nu nɔpɛ ge la mɔ naama ɠɛɛwoti ɲɔi ma zii ta ɠɛa wo zaama.
Kololala nuiti maaɠolo vai
Izelayɛle nuiti saama
13 Ni wa mɛnina taai taɠila ná-faa zu, nii Ɠɔoɠɔ GALAGI wa-ƓALAGI feai wo ʋɛ ga wo zei su, 14 nu ɲakaiti kulaʋɛ wa-nuɓusɛiti ɓɔɠɔi nɔ zaama, ti ta-laazu nuiti kala ga: «Ade li, de gala kiligiti dɛbi,» tama wo la ɠɛni galagi naati kwɛɛ, 15 wa naa wuuzumɔ, wo ɠida bu, wo nuiti gaazaɠa ga pagɔ. Ni fai naa ɠa ga gaama, daazu ɠa ʋe nɛi, naama vaa ɲɔu wolai ɠɛɛʋɛ nɛi wo zaama, 16 wa taa nuiti kpein paa ga boɠa zɔkpɔi, ta toganiiti. Wa koloɠolo ta su anii kpein. 17 Wa kɔɔzoganii kpein gaalɛ ba zaamazuʋɛ, wo taai ɠala ɲɛgɛlɛin, é ʋɛɛ ná-kɔɔzoganii ʋa ga zalaɠai Ɠɔoɠɔ GALAGI ʋɛ. Adaʋɛ ná ɠa ɠɛ ga ʋɛ ná ɠoloɠologai, taai la mɔ loga ʋolu eyɛsu pɛ. 18 À mina anii naa tanɔpɛ seɠe, nii maaɲɛɛ ʋɛai ba, naa ɠa a kɛ, Ɠɔoɠɔ GALAGI ná-ziiɠaawanai ɠaayei, é wo maawɔinɠa, é wo maamɔin, eɠɛʋelei é ma ɠonai woni la wo-mɛmɛwolani bɛ, 19 wa woilona Ɠɔoɠɔ GALAGI wa-ƓALAGI woo ma, wo ɠolo ná-deveiti bɛ, gè ti veezu wo ya za, wo naa ɠɛ, nii sɔlegai Ɠɔoɠɔ GALAGI wa-ƓALAGI ɠaazu.